სოხუმის დაცემიდან 27 წელი გავიდა . ქუთაისში , ,,ქართული ოცნება- დემოკრატიული საქართველოს" ახალგაზრდული ორგანიზაციის წარმომადგენლებმა, მაჟორიტარი დეპუტატობისა და მერობის კანდიდატებთან ერთად , აფხაზეთის ომში დაღუპულთა მემორიალი ყვავილებით შეამკეს და კიდევ ერთხელ გაიხსენეს გმირები, რომლებმაც ქვეყანა საკუთარი სიცოცხლის ფასად დაიცვეს.
,,27 სექტემბერს, 27 წლის წინ, სოხუმი დაეცა. ძალიან ძნელია ამ სიტყვების თქმა, რადგან მათ მიღმა ათასობით დაღუპული და საკუთარი სახლიდან დევნილი ჩვენი თანამემამულეა, ჩვენი დროებით დაკარგული მიწებია. აფხაზეთის ომის გმირების ნათელ ხსოვნას მივაგეთ პატივი, სანთლები ავანთეთ, გვირგვინებით შევამკეთ დიდების მემორიალი. სიმბოლურია, რომ 27 სექტემბერს ჯვართამაღლების დღესასწაულსაც აღვნიშნავთ. საქართველო უნდა გამთლიანდეს, გაერთიანდეს და ჩვენ უნდა დავიბრუნოთ ერთმანეთი!"-განაცხადა ზაზა ლომინაძემ.
ვალდებული ვართ, მშვიდობით დავბრუნდეთ და დარწმუნებული ვარ, რუსული ოკუპაცია საქართველოში სწორედ სამშვიდობო პოლიტიკით დასრულდება, - ასე ეხმაურება იმერეთში სახელმწიფო რწმუნებული ზვიად შალამბერიძე სოხუმის დაცემის 27-ე წლისთავს.
"სოხუმის დაცემიდან 27 წელი გავიდა, დიდი დროა და ბევრი რამ მოხდა ამ წლების განმავლობაში, ახლა აფხაზეთი სამაჩაბლოსთან ერთად რუსული ოკუპაციის ქვეშ არის. 27 წლის წინაც რუსეთით დაიწყო შეიარაღებული კონფლიქტი, რომელიც 13 თვის და 13 დღის შემდეგ სოხუმის დაცემით დამთავრდა.
შეიარაღებულ დაპირისპირებას ათასობით უდანაშაულო ადამიანის სიცოცხლე ემსხვერპლა, სოხუმის დაცვას შეეწირნენ ქართველი გმირები, პატივს მივაგებ კიდევ ერთხელ მათ უკვდავ ხსოვნას, ყველა მათგანი ყოველთვის დარჩება საქართველოს ისტორიაში.
მე დავიბადე აფხაზეთში, ვიცხოვრე იქ გარკვეული წლები და მათთან ერთად, ვინც მშობლიური მიწა წლების წინ იძულებით დატოვა, ეს დღე ჩემთვისაც ორმაგად მტკივნეულია. ვალდებული ვართ, მშვიდობით დავბრუნდეთ და დარწმუნებული ვარ, რუსული ოკუპაცია საქართველოში სწორედ სამშვიდობო პოლიტიკით დასრულდება, ჩვენ დავიბრუნებთ ერთმანეთს", - წერს ზვიად შალამბერიძე ფეისბუქის ოფიციალურ გვერდზე.
