,,ტყიბულში მშრომელი გარდაიცვალა. 50 წლის კაცი შახტაში ნაშალის ქვეშ მოყვა. ვიზიარებ გარდაცვლილის ოჯახის უმძიმეს ტრაგედიას. 

შეგახსენებთ, რომ 2018 წელს მხოლოდ ერთ წელიწადში ტყიბულში 12 მეშახტე დაიღუპა. 

2022 წლის 30 იანვარს მინდელის შახტში მომხდარი აფეთქების შედეგად, ტყიბულში ერთი ადამიანი გარდაიცვალა და 8 ადამიანი დაშავდა. 

მთლიანობაში ტყიბულის შახტებში, ქალაქში სადაც 8000 მდე ადამიანი ცხოვრობს, 2007 წლიდან ამ დრომდე 41 ადამიანი დაიღუპა. 

ეს ხომ აღარ არის ინდივიდუალური ტრაგედიები, არამედ სტრუქტურული ძალადობა, რომელსაც მეშახტეების თაობები ეწირება. მართლაც ტყიბული იქცა ნეკროპოლიტიკურ სივრცედ, სადაც მეშახტეთა სიცოცხლე ითვლება განახარჯ რესურსად და სადაც ადამიანი იმთავითვე განწირულია.

კი, წინა წლებში შეიქმნა შრომითი უსაფრთხოების საკანონმდებლო გარანტიები, შრომის ინსპექციაც, მაგრამ იქ, სადაც სახელმწიფო დისფუნქციური ხდება, არაფერი აღარ მუშაობს. 

იქ, სადაც სახელმწიფო ოლიგარქიულ ინტერესებს ატარებს და ბიზნესთან მისი ინტერესები გადაჯაჭვულია, ადამიანის უსაფრთხოების, ღირსების და უფლებების ინტერესი აღარ რჩება. 

შევხედოთ თუნდაც სამუშაოს წარმოების უსაფრთხოების წესის დარღვევის ფაქტებზე მიმდინარე გამოძიების შედეგებს. 

 სისხლის სამართლის კოდექსის 240-245-ე მუხლებთან კავშირში 

2024 წელს დარეგისტრირდა 94 შემთხვევა (გახსნის მაჩვენებელი არის მხოლოდ 9.57%)

2025 წელს დარეგისტრირდა 84 შემთხვევა (აინვარი-ივნისი), ( გახსნის მაჩვენებელი იყო 9.52 % )

2023 წელს - 181 შემთხვევა (გახსნის მაჩვენებელი- 20.99%), 

2022 წელს - 157 შემთხვევა (გახსნის მაჩვენებელი -22.29 %)

ანუ ყველაზე პირველადი, მართლმსაჯულების მექანიზმითაც აღარ მუშაობს სახელმწიფო სათანადოდ.

კომპანიების ლოგიკა მარტივია და ველური: უკონტროლოდ აითვისონ ამ ქალაქებში ადამიანების სიცოცხლე, შრომა, ბუნება, სასიცოცხლო გარემო და რაც შეიძლება მეტად გამდიდრდნენ. 

ამ ინტერესს კი სახელმწიფო არა თუ არ აკავებს, არამედ კომპანიებს სრულ კარტბლანშს აძლევს უკონტროლო მოპოვებაში, განადგურებაში, ათვისებაში და თავადაც იღებს აქედან ბენეფიტს. 

ტყიბული, სხვა ინსტრუსტრიულ ქალაქებთან ერთად, ნამდვილი მსხვეპრლშეწირვის ზონებად იქცა, სადაც აქ მცხოვრები ოჯახების და ადამიანების მთელი თაობები მარცხდებიან და არაფერი იცვლება. სხვა ტიპის რეალობის წარმოსახვაც კი თითქოს შეუძლებელი ხდება ამ ქალაქებისთვის.,,-წერს სოციალურ ქსელში უფლებადამცველი თამთა მიქელაძე. 

3 თებერვლიდან 4 თებერვლის დილამდე დასავლეთ საქართველოში მოსალოდნელია ნალექი, ზოგან ძლიერი, ზღვაზე შესაძლებელია 3-4 ბალიანი შტორმული ღელვა. ქვეყნის ტერიტორიის უმეტეს ნაწილზე იქროლებს დასავლეთის ძლიერი ქარი. მაღალმთიან რაიონებში მოსალოდნელია თოვა, ზოგან ძლიერი, ნისლი, ქარბუქი და ზვავსაშიშროება. დიდთოვლობის, ქარბუქის, ხილვადობის გაუარესების და ზვავსაშიშრიების გამო საავტომობილო გზების ცალკეულ მონაკვეთებზე შესაძლებელია შეიზღუდოს ტრანსპორტის მოძრაობა.  

მოსალოდნელმა ნალექებმა შესაძლებელია დასავლეთ საქართველოს მდინარეებზე წყლის დონეების მნიშვნელოვანი მატება, ხოლო გორაკ-ბორცვიან და მთიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს (საფრთხის დონე საშუალო).

ინფორმაციას გარემოს ეროვნული სააგენტო ავრცელებს. 

ქუთაისის მთავარი ნაძვის ხე 25 დეკემბერს, 20:00 საათზე აინთება.

,,ერთად ავანთოთ ქალაქის მთავარი ნაძვის ხე,,-ამ დევიზით ქუთაისის მერია თანაქალაქელებს ცენტრალურ მოედანზე,ნაძვის ხის ანთების ცერემონიალზე ეპატიჟება.

ნაძვის ხის მონტაჟი მესხიშვილის სახელობის სახელმწიფო დრამატული თეატრის წინ რამდენიმე დღის წინ დაიწყო.

საახალწლო განათებების მონტაჟი კი უკვე დასრულებულია. 

ფოტო არქივიდან.

ველური ბუნების ეროვნული სააგენტოს მხარდაჭერითა და ბაღდათის მუნიციპალიტეტის მერიის ინიციატივით, ბაღდათის მუნიციპალიტეტში კოლხური ხოხბები გაუშვეს.

200 ფრთა კოლხური ხოხობი  ორ სოფელში -ობჩასა და ვარციხეში გაუშვეს, იქ, სადაც ფრინველების სიცოცხლისთვის   საჭირო გარემოა.

ხოხბების  გაშვებაში  მონაწილეობა ბაღდათის მუნიციპალიტეტის ახლად არჩეულმა მერმა ნოდარ გიორგიძემ, საკრებულოს თავმჯდომარის პირველმა მოადგილემ გურამ კიკნაველიძემ, მერიის სოფლის მეურნეობის განყოფილების ხელმძღვანელმა დავით მშვილდაძემ და ადგილობრივმა მონადირეებმა მიიღეს.

აღნიშნული ღონისძიების მიზანი, კოლხური ხოხბის პოპულარიზაცია და ველური ფაუნის გამრავალფეროვნებაა.

ხოხბები ბაღდათის მუნიციპალიტეტს საჩუქრად  საქველმოქმედო ფონდმა "ქართუმ" გადასცა.

შინაგან საქმეთა სამინისტროს იმერეთის პოლიციის დეპარტამენტის სამტრედიის რაიონული სამმართველოს თანამშრომლებმა, ჯანმრთელობის განზრახ მძიმე დაზიანების ბრალდებით 1989 წელს დაბადებული პ.შ. დააკავეს.

დანაშაული 4-დან 7 წლამდე ვადით თავისუფლების აღკვეთას ითვალისწინებს.

გამოძიებით დადგინდა, რომ ბრალდებულმა სამტრედიაში, ურთიერთშელაპარაკების ნიადაგზე, ცივი იარაღით 1978 წელს დაბადებული გ.ს. დაჭრა.

დაჭრილი მამაკაცი საავადმყოფოში გადაიყვანეს, სადაც შესაბამისი სამედიცინო დახმარება გაეწია.

სამართალდამცველებმა პ.შ. ცხელ კვალზე ბრალდებულის სახით დააკავეს.

პოლიციამ დანაშაული ჩადენის იარაღი - დანა ნივთმტკიცებად ამოიღო.

გამოძიება საქართველოს სისხლის სამართლის კოდექსის 117-ე მუხლის 1-ლი ნაწილით მიმდინარეობს.