შორაპნის ციხის პროექტირება დასკვნით ეტაპზეა, აღნიშნულს მუნიციპალური განვითარების ფონდი ახორციელებს, პროექტის თანახმად უნდა მოხდეს ციხის კონსერვაცია და რეაბილიტაცია. ანტიკური და შუასაუკუნეების ციხესიმაგრის ფართობი 6000 კვ.მეტრს აღემატება. პროექტის თანახმად იგეგმება.მიმდებარე ტერიტორიის აღდგენაც.
პროექტირებაში ჩართულია იმერეთის ტურიზმის ცენტრი, ცენტრის წარმომადგენლები დღეს დასახელებულ ლოკაციაზე იმყოფებიან , სადაც მოხდება ციხის ამჟამინდელი მდგომარეობის შესწავლა.
შორაპნის ციხეზე არქეოლოგიური გათხრები 1983 წელს დაიწყო. მთლიანად გაიწმინდა მიმდებარე ფართობი და გამოჩნდა აღმოსავლეთისა და დასავლეთის კედლები, ნაწილობრივ ჩრდილოეთის კედელი, რომელიც ყველაზე მეტადაა დაზიანებული. არქეოლოგიური გათხრებით გამოვლენილია ოთხკუთხა ბურჯისმაგვარი კოშკი, გაწმენდილია ნაგებობის იატაკი, რომლის ქვემოთ კიდევ უფრო ძველი ნაგებობის კედლები აღმოჩნდა, რომელშიც ჩაშენებულია წყალგაუმტარი ხსნარით შელესილი ავზი.
არქეოლოგების მიერ ნაპოვნი იქნა ასევე ადგილობრივი და უცხოური თიხისა და მინის ჭურჭელი, რკინის ნივთები. გათხრებით დადასტურდა რომ X_XI საუკუნეებში შორაპანში ცხოვრება აქტიურად მიმდინარეობდა. მდინარეების ყვირილასა და ძირულას შესართავთან ექსპედიციამ გამოავლინა ანტიკური ხანის ნაგებობები, რომლებიც ორნაირი კრამიტით(ბრტყელი და ღარიანი) ყოფილა დახურული. აღმოჩენილია კოლხური ამფორები და სხვა ჭურჭლები, მასთან ერთად იმპორტული შავლაქიანი კერამიკის ფრაგმენტები, რითაც სავაჭრო გზის რეალურად არსებობა დასტურდება.