წყალტუბოში პოლიციის მიერ დაკავებული პირის ახლობლების ინფორმაციით სპეცოპერაციისას დაიჭრა ორი ადამიანი
როგორც სოფელ საყულიაში მაცხოვრებლები ამბობენ, ახალგაზრდა მამაკაცი იმ დროს დააკავეს, როდესაც ის თანასოფლელებთან ერთად სასაფლაოზე იმყოფებოდა.
მოსახლეობა ამბობს, რომ სოფელში სპეცრაზმი შევიდა. სპეცოპერაციის შედეგად, ორი ადამიანი დაიჭრა, რომლებიც საავადმყოფოში გადაიყვანეს.
ადგილობრივები ყვებიან, რომ ირაკლი მუკბანიანის ამგვარად დაკავების საჭიროება არ არსებობდა და მუკბანიანი პოლიციას თავად ჩაბარდებოდა.
შინაგან საქმეთა სამინისტრომ დამატებითი ინფორმაცია გაავრცელა.
"როგორც უკვე ვაცნობეთ საზოგადოებას, ი.მ.-ს დაკავების დროს პოლიციის თანამშრომლებს წინააღმდეგობა გაუწიეს ადგილობრივმა მცხოვრებლებმა, მოხდა თავდასხმა სამართალდამცველებზე. ადგილობრივებმა პოლიციას გადაადგილების საშუალება შეუზღუდეს, ცდილობდნენ მოსამართლის განჩინების საფუძველზე დაკავებული ბრალდებულის გათავისუფლებას, შეეცადნენ ცეცხლსასროლი იარაღის პოლიციისთვის წართმევას და უწევდნენ წინააღმდეგობას. ამავდროულად პოლიციას ესროდნენ ქვებს და სხვადასხვა საგნებს, რის შედეგადაც ჯანმრთელობის დაზიანება მიიღო პოლიციის ორმა თანამშრომელმა.
სიტუაციის ესკალაციის და დაპირისპირების განმუხტვის მიზნით პოლიციამ განახორციელა გამაფრთხილებელი გასროლა. ასევე, გამოყენებულ იქნა სპეციალური საშუალებები.
მომხდარ ფაქტთან დაკავშირებით გამოძიება სისხლის სამართლის კოდექსის 353-ე მუხლით მიმდინარეობს."-წერია განცხადებაში.
დღეს წყალტუბოს სოფელ საყულიაში სამართალდამცაცებმა ის მამაკაცი დააკავეს, რომელმაც ნამახვანჰესების საწინაააღმდეგო აქციაზე სამართალდამცავს ფიზიკური შეურაცხყოფა მიაყენა.
შინაგან საქმეთა სამინისტროს იმერეთის, რაჭა-ლეჩხუმისა და ქვემო სვანეთის პოლიციის დეპარტამენტის თანანშრომლებმა წყალტუბოს მუნიციპალიტეტის სოფელ საყულიაში, ბრალდებულის სახით 1992 წელს დაბადებული ი. მ.დააკავეს.
დანაშაული 4-დან 7 წლამდე ვადით თავისუფლების აღკვეთას ითვალისწინებს.
გამოძიებით დადგინდა, რომ ბრალდებული მიმდინარე წლის 29 მაისს, წყალტუბოს მუნიციპალიტეტის სოფელ გუმათში, ,,ნამახვანჰესის“ მოწინააღმდეგეთა საპროტეტსტო აქციაზე, თავს დაესხა და ფიზიკური შეურაცხყოფა მიაყენა სამსახურებრივი მოვალეობის შესრულების პროცესში მყოფ პოლიციის თანამშრომელს.
ი.მ.-ს დაკავების დროს პოლიციის თანამშრომლებს წინააღმდეგობა გაუწიეს ადგილობრივმა მაცხოვრებლებმა, რის შემდეგაც პოლიციამ კანონმდებლობის შესაბამისად იძულების ღონისძიება გამოიყენა.
გამოძიება მიმდინარეობს სსკ-ის 353-ე პრიმა მუხლის პირველი ნაწილით.
