დღეს ქუთაისის მერიასთან აქცია-პერფორმანსი გაიმართა.მონაწილეების თქმით,ამ გზით ცდილობენ ადგილობრივ თვითმმართველობას ქალაქში არსებული გაუმართავი სანიაღვრე სისტემის პრობლემა და მერიის პასუხისმგებლობა შეახსენონ.
პერფორმანსის მიმდინარეობისას ვიდეო კოლაჟი აჩვენეს,რომელიც წვიმიან ამინდში არსებულ ვითარებას ასახავს.აქციის მონაწილეების თქმით, აღნიშნულ პრობლემებს მლქალაქეები სანიაღვრე სისტემების მოუწესრიგებლობა-არქონის გამო აწყდებიან, რაც მათი შეფასებით, ქალაქის მერიის არაეფექტური მუშაობის შედეგია.
" გვსურს გავაგებინოთ მერიას, რომ ქუთაისში ადამიანებს სხვადასხვა უბნებიდან აწუხებთ სანიაღვრე სისტემებთან დაკავშირებული საკითხები - მოუწესრიგებელი, გაუწმენდავი, დაბინძურებული და ზოგიერთ უბანში საერთოდ გაუქმებული სანიაღვრე სისტემა.
სანიაღვრე სისტემის მოწესრიგება ქუთაისის მუნიციპალიტეტის მერიის პასუხისმგებლობაა.
მოვუწოდებთ ქუთაისის მერიას გადადგას ქმედითი ნაბიჯები არსებული პრობლემის მოსაგვარებლად"-აცხადებენ ორგანიზატორები.
აქცია-პერფორმანსის ორგანიზატორია საინიციატივო ჯგუფი „როდემდე?!“, რომელიც ქუთაისში არსებულ პრობლემებზე მუშაობს.
