14-15 ივნისს საქართველოს უმეტეს რაიონში მოსალოდნელია წვიმა, ზოგან ძლიერი და ელჭექი, აღმოსავლეთ საქართველოს ცალკეულ რაიონებში სეტყვა. იქროლებს დასავლეთის მიმართულების ძლიერი ქარი. ჰაერის ტემპერატურა მნიშვნელოვნად დაიკლებს. 

მოსალოდნელმა ნალექებმა შესაძლებელია საქართველოს მდინარეებზე წყლის დონეების მნიშვნელოვანი მატება, პატარა მდინარეებზე წყალმოვარდნები, ხოლო გორაკ-ბორცვიან და მთიან ზონებში მეწყრულ-ღვარცოფული პროცესების ჩასახვა - გააქტიურება გამოიწვიოს (საფრთხის დონე საშუალო).

ფესტივალი ,,გემო ფესტი,, ქუთაისში სამი დღე გაგრძელდება. 14 და 15 ივნისის გარდა ფესტივალი სტუმრებს ხვალ,13 ივნისსაც უმასპინძლებს.აქტივობები 15:00 საათიდან დაიწყება და გვიან ღამემდე გაგრძელდება. 

ფესტივალი ქუთაისში წელს მესამედ გაიმართება.ვერიკო ანჯაფარიძის სახელობის სკვერში, კვების და გასართობი სივრცეები, სამეწარმეო და ღვინის ბაზარი მოეწყობა.

ქუთაისელებსა და ქალაქის სტუმრებს საშუალება ექნებათ დააგემოვნონ როგორც ტრადიციული, ასევე იშვიათი იმერული კერძები. „გემო ფესტის“ ფარგლებში გაიმართება კონცერტი.

ფესტივალის მიზანია რეგიონებში ადგილობრივი სამზარეულოს პოპულარიზაცია, მეწარმეების/ოჯახების ხელშეწყობა, შიდა და საერთაშორისო მოგზაურების ნაკადების ზრდა.

 2025 წლის 12 ივნისს, 14:30 საათზე ქუთაისის რაიონული სასამართლო ჭიათურაში დაკავებული მერაბ სარალიძის, არჩილ ჭუმბურიძის, გიორგი ნეფარიძისა და თენგიზ გველესიანის მიმართ შეფარდებულ პატიმრობას გადასინჯავს. ამავე სისხლის სამართლის საქმეზე წინასასამართლო სხდომა კი 17 ივლისს ჩატარდება .

საქმე შეეხება 2025 წლის 28 აპრილს, ჭიათურის პროტესტის მონაწილეებსა და შუქრუთის მაღაროს დირექტორს შორის მომხდარ ინციდენტს, რის შემდეგაც პროტესტის ოთხი მონაწილე დააკავეს.

 2025 წლის 1 მაისს, მერაბ სარალიძეს და გიორგი ნეფარიძეს, რომელთა ინტერესებსაც სოციალური სამართლიანობის ცენტრი იცავს, სასამართლომ აღკვეთის ღონისძიების სახით პატიმრობა შეუფარდა იმ საფუძვლით, რომ სახეზე იყო ბრალდებულების მიერ ახალი დანაშაულის ჩადენის საფრთხე. სისხლის სამართლის საპროცესო კოდექსით, სასამართლო ვალდებულია, ორ თვეში ერთხელ მაინც განიხილოს პატიმრობის ძალაში დატოვების აუცილებლობის საკითხი და დღევანდელი სასამართლო სხდომის მიზანიც სწორედ გამოყენებული აღკვეთის ღონისძიების სახის, პატიმრობის, გადახედვაა.

სოციალური სამართლიანობის ცენტრის შეფასებით, საქმის გარემოებებზე დაყრდნობით, არ იკვეთება ბრალდებულთა მიმალვის საფრთხე და ჭიათურელების კიდევ უფრო გაუარესებული სოციალური ფონის გათვალისწინებით, გირაოს გამოყენება სრულად უზრუნველყოფს, ერთი მხრივ, ბრალდებულთა პროცესში შემდგომ მონაწილეობას, ხოლო, მეორე მხრივ, სხვა კანონსაწინააღმდეგო ქმედების ჩადენის პრევენციას. შესაბამისად, სოციალური სამართლიანობის ცენტრის ადვოკატები სასამართლოს დაკავებულების პატიმრობიდან გათავისუფლების და აღკვეთის სახით გირაოს გამოყენების შუამდგომლობით მიმართავენ.

ჭიათურელი მაღაროელები უკვე მეხუთე თვეა უწყვეტად აპროტესტებენ კომპანიის მიერ მათი შრომითი უფლებების მძიმე დარღვევებს, მათ შორის, ხელფასების გადაუხდელობას, უკანონო რეორგანიზაციასა და თანამშრომლების მასობრივ გათავისუფლებას, რამაც საგანგაშო სოციალური პრობლემები გამოიწვია მათთვის და მათი ოჯახებისთვის. მიმდინარე წლის აპრილში კომპანიაში რეორგანიზაციის პროცესს ახალი ადმინისტრაცია ჩაუდგა სათავეში, რომლის ქმედებებმა მდგომარეობა კიდევ უფრო გაამწვავა.

აკადემია UNIKO-ს ქუთაისის ფილიალი ჟურნალისტიკის კურსს იწყებს.კურსს ჟურნალისტი სალომე ჩუბინიძე გაუძღვება,რომელსაც მრავალწლიან პრაქტიკულ გამოცდილებასთან ერთად მოსწავლეებისათვის ჟურნალისტიკის სწავლების ორწლიანი გამოცდილებაც აქვს.

ასაკობრივი შეზღუდვა არ არსებობს,თუ გინდა იყო ჟურნალისტი და  სამი თვის შემდეგ მიიღო ორენოვანი სერთიფიკატი ,მაშინ აკადემია UNIKO-ს ქუთაისის ფილიალში გელოდებით.

კურსის ხანგრძლივობა 3 თვე , კვირაში ორჯერ ( 60-90 წუთი)

გაინტერესებს,რას გასწავლის ეს კურსი?

როგორ მოიპოვო და გადაამუშაო ინფორმაცია;

როგორ „ისაუბრო“ შენი აუდიტორიის ენაზე;

ვიდეომონტაჟის, ფოტოგადაღების და მედიატექნიკის საფუძვლები;

პრაქტიკული უნარები ონლაინ, ბეჭდურ და სატელევიზიო მედიაში;

მეტყველება, ჟურნალისტური ეთიკა და პროფესიონალიზმი;

ადგილები შეზღუდულია .

დაგვიკავშირდი 599 13 17 91.

საქართველოს საავტომობილო გზების დეპარტამენტის ინფორმაციით, შიდასახელმწიფოებრივი მნიშვნელობის ქუთაისი(საღორია)-ბაღდათი-აბასთუმანი-ბენარას საავტომობილო გზის კმ32-კმ47.8 მონაკვეთის რეაბილიტაციო უტარდება. სამუშაოების წარმოების პერიოდში, ბაღდათი-კურორტი საირმეს მონაკვეთზე, 2025 წლის 10 ივნისიდან 10 ივლისამდე, ავტოტრანსპორტის მოძრაობა ყოველდღიურად შეიზღუდება 10:00 სთ-დან 13:00 სთ-მდე და 15:00 სთ-დან 19:00 სთ-მდე. დღე-ღამის დანარჩენ პერიოდში, ავტოტრანსპორტის მოძრაობა თავისუფალია.

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლებმა, ბრაკონიერობასთან ბრძოლის ფარგლებში, იმერეთში, სამეგრელოსა და შიდა ქართლში, ელექტროიარაღით უკანონო თევზჭერის 5 ფაქტი გამოავლინეს.

სამართალდარღვევები გამოვლენილია ტყიბულის, ხონისა და ვანის მუნიციპალიტეტებში, მდინარეებზე: წყალწითელაზე, სულორსა და კუხაზე; ქალაქ ფოთში, მდინარე კაპარჭინაზე და კასპის მუნიციპალიტეტში მდინარე მტკვარზე. 

ვინაიდან ხუთივე ფაქტი შეიცავს სისხლის სამართლის დანაშაულის ნიშნებს, მასალები, შემდგომი რეაგირების მიზნით, შესაბამის უწყებებში გადაიგზავნა.