სოხუმის დაცემიდან 32 წელი გავიდა. ამ თარიღთან დაკავშირებით, ქუთაისში პატივი მიაგეს აფხაზეთის ომში დაღუპულთა ხსოვნას.

ქუთაისის მერის მოვალეობის შემსრულებელმა დავით ერემეიშვილმა, იმერეთში სახელმწიფო რწმუნებულმა ლევან ზალკალიანმა, რწმუნებულის პირველმა მოადგილემ მამუკა ხიმშიაშვილმა, ადგილობრივი ხელისუფლების და საზოგადოების წარმომადგენლებმა გვირგვინებით შეამკეს გმირთა მემორიალი. 

აფხაზეთის ომში დაღუპულთა სულების მოსახსენებელი პანაშვიდი გადაიხადეს სასულიერო პირებმა.

სკვერში გაიმართა სოხუმის დაცემის დღისადმი მიძღვნილი ფოტოგამოფენა, სადაც წარმოდგენილი იყო ქუთაისის დავით მხეიძის სახელობის ფოტო-კინო მატიანეს მუზეუმში დაცული აფხაზეთის ომის ამსახველი ფოტომასალა.

სოხუმის დაცემის დღესთან დაკავშირებით და აფხაზეთის ომში დაღუპულთა ხსოვნის პატივგების მიზნით, ქუთაისში, ადმინისტრაციულ შენობებზე სახელმწიფო დროშა დაშვებულია.

სოხუმის დაცემის დღესთან დაკავშირებით, ბაღდათის მუნიციპალიტეტის მერმა კახა ენუქიძემ, საკრებულოს თავმჯდომარე ნოდარ გიორგიძესთან, მერის მოადგილეებთან, თვითმმართველობის წარმომადგენლებთან და საკრებულოს დეპუტატებთან ერთად, ტერიტორიული მთლიანობისთვის დაღუპულ გმირთა მემორიალი ყვავილებით შეამკო და პატივი მიაგო აფხაზეთის ომში გმირულად გარდაცვლილ მებრძოლთა ხსოვნას.

დღესვე პროექტ „ლექსი კედელზე“ ფარგლებში, კულტურის სახლის ფასადზე, პოეტ ცირა ყურაშვილის ლექსი განთავსდა, რომელიც აფხაზეთის ომში გმირულად გარდაცვლილ ბერ მამა ანდრია ყურაშვილის მიეძღვნა.

აფხაზეთის ომის გმირი, ბაღდათის მუნიციპალიტეტის მკვიდრი ბესიკ სოფრომაძე გაიხსენეს და პატივი მიაგეს მშობლიური სკოლის, ქალაქ ბაღდათის N1 საჯარო სკოლის მოსწავლეებმა.

აფხაზეთის ავტონომიური რესპუბლიკის მინისტრთა საბჭოსა და თავდაცვის საბჭოს თავმჯდომარე ჟიული შარტავა სეპარატისტებმა სოხუმის დაცემის დღეს,1993 წლის 27 სექტემბერს დახვრიტეს.

მას სიკვდილის შემდეგ მინიჭებული აქვს საქართველოს ეროვნული გმირის ტიტული.

ჟიული შარტავა აფხაზეთში შეიარაღებული კონფლიქტის დროს, 1993 წლის ივნისში, საქართველოს სახელმწიფოს მეთაურის განკარგულებით დაინიშნა აფხაზეთის ავტონომიური რესპუბლიკის მინისტრთა საბჭოსა და აფხაზეთის თავდაცვის საბჭოს თავმჯდომარედ.

1993 წლის 27 სექტემბერს უშუალოდ ხელმძღვანელობდა მთავრობის სახლის დაცვის ოპერაციას, რომლის დროსაც აფხაზურმა სეპარატისტულმა დაჯგუფებამ თანამებრძოლებთან ერთად ტყვედ აიყვანა და დახვრიტა. მოგვიანებით, ჟიული შარტავას ცხედარი ქართულ მხარეს გადაეცა.

დაკრძალულია თბილისში, ვაკის პანთეონში.

სამხედრო დაპირისპირება აფხაზეთში 1992 წლის 14 აგვისტოს დაიწყო. სოჭი-ინგირის სარკინიგზო მონაკვეთის დასაცავად აფხაზეთის ტერიტორიაზე შესულ საქართველოს თავდაცვის სამინისტროს ეროვნულ გვარდიას აფხაზეთის უმაღლესი საბჭოს თავმჯდომარის, ვლადისლავ არძინბას განკარგულებით შექმნილმა „აფხაზურმა გვარდიამ“, ოჩამჩირის რაიონის სოფელ ოხურეისთან ცეცხლი გაუხსნა.

სახელმწიფო საბჭომ სოჭი-ინგირის რკინიგზის მონაკვეთის დასაცავად აფხაზეთში ეროვნული გვარდიის შეყვანა 11 აგვისტოს, ვლადისლავ არძინბასთან შეთანხმების შემდეგ გადაწყვიტა. შეთანხმების მიუხედავად, „აფხაზურმა გვარდიამ“ საქართველოს ეროვნულ გვარდიას აფხაზეთის ტერიტორიაზე გადაადგილებისას წინააღმდეგობა ოჩამჩირისა და გულრიფშის რაიონებში და ქალაქ სოხუმში გაუწია, რასაც აფხაზეთში საომარი მოქმედებების დაწყება მოჰყვა.

აფხაზეთში სამხედრო დაპირისპირება 13 თვეს და 13 დღეს გაგრძელდა და 1993 წლის 27 სექტემბერს, სოხუმის დაცემით და საქართველოს შეიარაღებული ძალების მარცხით დასრულდა.

1993 წლის 16 სექტემრებს აფხაზურმა მხარემ დაარღვია 27 ივლისის სოჭის შეთანხმება „ცეცხლის შეწყვეტისა და ძალთა დაშორიშორების შესახებ“ და დაიწყო შტურმი სოხუმის ასაღებად. სოხუმისთვის ბრძოლა 11 დღის განმავლობაში მიმდინარეობდა. აფხაზურ-რუსულმა, ჩრდილოეთ კავკასიელთა და კაზაკთა შენაერთებმა აფხაზეთის მინისტრთა საბჭოს შენობაზე შტურმი 27 სექტემბერს დილიდანვე დაიწყეს და ტყვედ აიყვანეს აფხაზეთის მინისტრთა საბჭოს თავმჯდომარე ჟიული შარტავა, ქალაქ სოხუმის მერი გურამ გაბესკირია და მინისტრთა საბჭოს 27 თანამშრომელი და შემდეგ ყველა მათგანი დახვრიტეს.

რუსულ-აფხაზურმა შენაერთებმა მდინარე ენგურის გასწვრივ პოზიციები 1993 წლის 30 სექტემბერს დაიკავეს. აფხაზეთის თვითგამოცხადებული რესპუბლიკის ხელისუფლება „საქართველოზე გამარჯვებისა და აფხაზეთის დამოუკიდებლობის დღეს“ ყოველი წლის 30 სექტემბერს აღნიშნავს.

ქართული მხარის ამ დრომდე დაუზუსტებელი მონაცემებით, აფხაზეთში 1992-1993 წლებში მიმდინარე სამხედრო დაპირისპირებისას, ქართული მხრიდან 10 ათასზე მეტი ჯარისკაცი და მშვიდობიანი მოქალაქე დაიღუპა. 300 ათასი აფხაზეთიდან დევნილი ქართველი კი უსახლკაროდ დარჩა. აფხაზური მხარის მონაცემებით კი, დაიღუპა 3 500 და დაიჭრა 2 ათასამდე აფხაზი.

საარჩევნო ადმინისტრაცია აგრძელებს არჩევნებში ჩართული მხარეების ინფორმირებას მიმდინარე
საარჩევნო საკითხების შესახებ. ცენტრალური საარჩევნო კომისიის (ცესკო) და სსიპ საარჩევნო
სისტემების განვითარების, რეფორმებისა და სწავლების ცენტრის (სწავლების ცენტრი)
ორგანიზებით მორიგი საინფორმაციო შეხვედრა მუნიციპალიტეტის ორგანოთა არჩევნებზე
რეგისტრირებული პოლიტიკური პარტიებისა და ადგილობრივი დამკვირვებელი ორგანიზაციების
წარმომადგენლებთან გაიმართა.
ღონისძიება ცესკოს თავმჯდომარე გიორგი კალანდარიშვილმა, თავმჯდომარის მოადგილე გიორგი
შარაბიძესთან და სწავლების ცენტრის ხელმძღვანელთან ნათია ზაალიშვილთან ერთად გახსნა.
მათ ყურადღება გაამახვილეს ჩართული მხარეების ინფორმირების მნიშვნელობაზე, ისაუბრეს მათ
როლზე და საარჩევნო პროცესში პროფესიონალიზმზე დაფუძნებული ურთიერთთანამშრომლობის
განმტკიცების აუცილებლობაზე, სადაც ყველა ჩართული მხარე არის ინფორმირებული და მზად
არის საკუთარი პასუხისმგებლობის ობიექტურად შესასრულებლად, რაც დემოკრატიული
პროცესის გამართულად განხორციელების წინაპირობაა.

„ძალიან მნიშვნელოვანი შეხვედრა იმართება, რომლის მთავარი მონაწილეები პოლიტიკური
პარტიებისა და ადგილობრივი სადამკვირვებლო ორგანიზაციების წარმომადგენლები არიან.
სამუშაო შეხვედრის ფარგლებში ჩვენ გვაქვს შესაძლებლობა ინფორმაცია მივაწოდოთ იმ
ძირითადი საარჩევნო საკითხების შესახებ, რომელიც უკავშირდება მათი უფლება-მოვალეობების
განხორციელებას და სხვადასხვა საარჩევნო სიახლეს. სამუშაო პლატფორმის ფარგლებში ასევე
გვაქვს შესაძლებლობა კითხვა-პასუხის ფორმატში გავიაროთ მათთვის საინტერესო ნებისმიერი
საკითხი, რაც მნიშვნელოვნად შეუწყობს ხელს კენჭისყრის დღეს ფუნქციების ეფექტიანად
განხორციელებას“,-აღნიშნა ცესკოს თავმჯდომარემ.

„ცესკო და სწავლების ცენტრი აგრძელებს საინფორმაციო შეხვედრებს ჩართულ მხარეებთან. დღეს
განვიხილავთ ისეთ მნიშვნელოვან საკითხებს, როგორიც არის საკანონმდებლო სიახლეები,
მუნიციპალიტეტის ორგანოთა არჩევნებისთვის მზადების პროცესი, კენჭისყრის დღის
პროცედურული ასპექტები, ფოტოვიდეოგადაღების რეგულაციები საარჩევნო უბანზე და ყველა ის
მნიშვნელოვანი კომპონენტი, რომელიც მიემართება კენჭისყრის შენობაში ყოფნის უფლების მქონე
პირების უფლებრივ მდგომარეობას“, -განაცხადა ნათია ზაალიშვილმა.

ღონისძიების ფარგლებში გაიმართა აქტიური დისკუსია, მონაწილეებმა მიიღეს ამომწურავი
პასუხები მათთვის საინტერესო ყველა კითხვაზე. აღსანიშნავია, რომ მსგავსი ტიპის შეხვედრები,
რომელსაც საარჩევნო ადმინისტრაცია პერიოდულად მართავს, ქმნის სივრცეს დიალოგისთვის,
სადაც შესაძლებელია აქტუალური საკითხების განხილვა. ადმინისტრაცია აწვდის გადამოწმებულ
ინფორმაციას ჩართულ მხარეებს, რაც თავის მხრივ ქმნის ღია და ანგარიშვალდებულ გარემოს და
ზრდის მათ ინფორმირებულობას, რაც ერთობლიობაში აძლიერებს პროფესიონალიზმზე
დაფუძნებულ თანამშრომლობას და უზრუნველყოფს ინფორმაციის თანაბარ ხელმისაწვდომობას
ყველა მონაწილისთვის.
საინფორმაციო შეხვედრა 2025 წლის 25 სექტემბერს გაიმართა. მასში მონაწილეობა არჩევნებზე
რეგისტრირებული პოლიტიკური პარტიებისა და ადგილობრივი დამკვირვებელი ორგანიზაციების
70-მდე წარმომადგენელმა მიიღო.

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლებმა, ნადირობის სეზონის დაწყებიდან 1 თვის განმავლობაში, უკანონო ნადირობის 414 ფაქტი გამოავლინეს.

უკანონო ნადირობის ყველაზე მეტი - 147 ფაქტი დაფიქსირდა სამეგრელო-ზემო სვანეთში. 48 სამართალდარღვევაა გამოვლენილი იმერეთში, 44 - გურიაში, 40-40 - აჭარასა და ქვემო ქართლში, 36 - შიდა ქართლში, 29 - მცხეთა-მთიანეთში, 18 - სამცხე-ჯავახეთში, 8 - კახეთში, 2 ფაქტი კი დაფიქსირდა რაჭა-ლეჩხუმი-ქვემო სვანეთში.

სამართალდარღვევა გამოვლენილია დედაქალაქშიც - 2025 წლის 23 აგვისტოდან 23 სექტემბრის ჩათვლით, თბილისში უკანონო ნადირობის 2 ფაქტია აღკვეთილი.

გამოვლენილი სამართალდარღვევებიდან 363 აკრძალული იარაღით ან მეთოდით ნადირობის ფაქტებია. 26 შემთხვევაში სამართალდამრღვევები მუნიციპალიტეტის ტერიტორიაზე ნადირობდნენ, 20 შემთხვევაში მათ გარემოდან გადამფრენი ფრინველების ამოღებაზე დაწესებული მოსაკრებელი არ ჰქონდათ გადახდილი, 5 კი, ნადირობის წესების დარღვევის ფაქტია.

დაფიქსირდა უკანონო საშუალებით - ხელნაკეთი ხმოვანი მოწყობილობით (ე.წ. „მანოკი“) ნადირობის ფაქტებიც. სეზონის დაწყებიდან 1 თვეში ამოღებულია 358 „მანოკი“. ყველაზე მეტი - 142 „მანოკი“ დაილუქა სამეგრელო-ზემო სვანეთის რეგიონული სამმართველოს თანამშრომლების მიერ.