სურსათის ეროვნულმა სააგენტომ ხონში ყველის არალეგალური საწარმო გამოავლინა

იმერეთის დეპარტამენტის ინსპექტორებმა სახელმწიფო კონტროლის ფარგლებში ფიზიკური პირი ტ. ა.-ის (მისამართი: ხონი, სოფელი გოჩაჯიხაიში) კუთვნილი ყველის საწარმო შეამოწმეს. ინსპექტირების შედეგად ობიექტზე დაფიქსირდა კრიტიკული შეუსაბამობები. ასევე, დარღვეული იყო მომხმარებლისათვის სურსათის შესახებ ინფორმაციის მიწოდების წესიც. ამავდროულად, აღმოჩნდა რომ ბიზნესოპერატორი სულგუნის წარმოებასა და რეალიზაციას სავალდებულო აღიარებისა და ეკონომიკურ საქმიანობათა რეესტრში რეგისტრაციის გარეშე ახდენდა.

გამოვლენილი შეუსაბამობების გამო, ობიექტი დაჯარიმდა და შეუჩერდა საწარმოო პროცესი.

სურსათის ეროვნულმა სააგენტომ ვანში ცხოველთა არალეგალური სასაკლაო გამოავლინა.

იმერეთის დეპარტამენტის ინსპექტორებმა სახელმწიფო კონტროლის ფარგლებში შპს ,,შუამთა“ (მისამართი: ვანი, სოფელი შუამთა, ზ. გამსახურდიას N 2) არაგეგმურად შეამოწმეს. ინსპექტირების შედეგად ობიექტზე გამოვლინდა კრიტიკული შეუსაბამობები. ამავდროულად, აღმოჩნდა, რომ ბიზნესოპერატორი გოჭებს სავალდებულო აღიარებისა და ეკონომიკურ საქმიანობათა რეესტრში რეგისტრაციის გარეშე კლავდა. 

გამოვლენილი შეუსაბამობების გამო ობიექტი დაჯარიმდა და შეუჩერდა საწარმოო პროცესი.

ქუთაისში, რუსთაველის ქუჩის ერთ მონაკვეთსა და წერეთლის ქუჩის დასაწყისში, დაზიანებული გზის საფარი ასფალტ-ბეტონის ახალი საფარით შეიცვალა.

რუსთაველის გამზირის განახლებულ მონაკვეთზე ( ცენტრალური ბულვარისა და ქუთაისის მერიის მიმდებარედ), საგზაო მონიშვნებისა და ქვეითთა გადასასვლელების დატანა განხორციელდება უახლოეს დღეებში, ტექნოლოგიური სტანდარტით გათვალისწინებული ვადის ფარგლებში.

,,გთხოვთ, სამუშაოების დასრულებამდე, გამოიჩინოთ განსაკუთრებული სიფრთხილე და დაიცვათ უსაფრთხოების წესები.,,-ქუთაისის მუნიციპალიტეტის მერია .

1-2 სექტემბერს საქართველოს უმეტეს ტერიტორიაზე შენარჩუნებული იქნება დროგამოშვებით ნალექიანი ამინდი. ცალკეულ რაიონებში მოსალოდნელია ძლიერი ინტენსივობის წვიმა. შესაძლებელია ელჭექი, სეტყვა და ქარის გაძლიერება. 

მოსალოდნელმა ძლიერმა ნალექებმა შესაძლებელია მდინარეებზე წყლის დონეების მნიშვნელოვანი მატება, პატარა მდინარეებზე წყალმოვარდნები, ხოლო გორაკ-ბორცვიან და მთიან ზონებში მეწყრულ-ღვარცოფული პროცესების ჩასახვა-გაქტიურება გამოიწვიოს (საფრთხის დონე საშუალო).

ინფორმაციას გარემოს ეროვნული სააგენტო ავრცელებს. 

ბაღდათის მუნიციპალიტეტის სოფელ პირველ ობჩაში, მთის ძირისკენ მიმავალ გზაზე, რომელიც წყალდიდობამ დააზიანა, ხვალ საღამომდე მოძრაობა აკრძალულია.

,,მოსახლეობას მოვუწოდებთ, გამოიჩინონ სიფრთხილე და თავი შეიკავონ გადაადგილებისგან.

საჭიროების შემთხვევაში მოსახლეობას დახმარებას ბაღდათის მუნიციპალიტეტის მერიის თანამშრომლები გაუწევენ.

მიმდინარეობს მუშაობა ბურჯანაძეების უბნის გავლით ალტერნატიული გზის მოწყობაზე, სადაც გადაადგილება  საღამოდან იქნება შესაძლებელი.,,-ბაღდათის მუნიციპალიტეტის მერია.

ჭარბი ნალექის შედეგად მდინარე ჩოლშურას ადიდებამ ლენტეხის მუნიციპალიტეტში პრობლემები შექმნა. სტიქიამ საყდრის ხიდი დააზიანა და ამ დროისთვის ხიდი სრულად დანგრეულია.

ადგილზე დილიდან სალიკვიდაციო სამუშაოები მიმდინარეობს. ლენტეხის მუნიციპალიტეტის მერის, გიორგი გაზდელიანის ინფორმაციით, საყდრის ხიდის ადგილზე დროებითი ხიდი მოეწყობა, რომელიც ახალი ხიდის მშენებლობის დასრულებამდე ავტოტრანსპორტის უსაფრთხო გადაადგილებას უზრუნველყოფს.

ამ დროისთვის მაღალი გამავლობის ავტომობილები შემოვლითი გზით გადაადგილდებიან.

სტიქიის ზონაში იმყოფებიან რაჭა-ლეჩხუმისა და ქვემო სვანეთის სახელმწიფო რწმუნებული პაპუნა მარგველიძე, ლენტეხის მუნიციპალიტეტის მერი გიორგი გაზდელიანი, საავტომობილო გზების დეპარტამენტის თავმჯდომარის პირველი მოადგილე დავით გეწაძე და ადგილობრივი ხელისუფლების წარმომადგენლები.

მათი ინფორმაციით, მიმდინარე სამუშაოების შედეგად დროებითი ხიდის მოწყობა უახლოეს პერიოდში დასრულდება.

ამასთან, საყდრის ხიდის ახალი პროექტი უკვე მომზადებულია. ახალი ხიდის მშენებლობისთვის საჭირო სატენდერო პროცედურები უმოკლეს ვადაში დაიწყება.

ავტორი თეონა ფარულავა