7 სექტემბერს საქართველოში მოსალოდენელია დროგამოშვებით ნალექი, დასავლეთის ყველა რეგიონში, ხოლო აღმოსავლეთში - შიდა ქართლში, ასევე მთიან და მაღალმთიან რაიონებში ზოგან ძლიერი ინტენსივობის. შესაძლებელია ელჭექი და სეტყვა, ზღვაზე 4-5 ბალიანი შტორმი. ქვეყნის უმეტეს ტერიტორიაზე, მათ შორის დედაქალაქში, იქროლებს დასავლეთის ძლიერი ქარი. 

მოსალოდნელმა ნალექებმა შესაძლებელია მდინარეებზე წყლის დონეების მნიშვნელოვანი მატება, პატარა მდინარეებზე წყალმოვარდნები, ხოლო გორაკ-ბორცვიან და მთიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს (საფრთხის დონე საშუალო).

ინფორმაციას გარემოს ეროვნული სააგენტო ავრცელებს. 

სტიქიის შედეგად ხარაგაულის მუნიციპალიტეტის რამდენიმე სოფელში პრობლემები შეიქმნა.

ძლიერი წვიმის შედეგად მოვარდნილმა წყალმა ნაშალი ქვის, ღორღისა და მიწის მასა სოფლების ცენტრალურ და საუბნო გზებზე ჩამოიტანა, რის გამოც ცალკეულ მონაკვეთებზე გადაადგილება გართულდა.

მუნიციპალიტეტის მიერ დაქირავებული სპეციალური ტექნიკა სოფელ ხიდარში მუშაობს. ძლიერი წვიმის შედეგად გზაზე ჩამოტანილი ქვა-ღორღისა და მიწის მასისგან ცენტრალური გზა უკვე გაიწმინდა და გადაადგილება აღდგენილია.

ხიდარში სამუშაოების დასრულების შემდეგ, ტექნიკა სოფელ საქარიქედში გააგრძელებს მუშაობას, სადაც უხვი ნალექის შედეგად ასევე დაზიანდა საგზაო ინფრასტრუქტურა.

ინფორმაციას ხარაგაულის მუნიციპალიტეტის მერია ავრცელებს. 

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტი, სატრანსპორტო სექტორიდან ატმოსფერული ჰაერის დაბინძურების შემცირების მიზნით, ქვეყნის ოთხ მსხვილ ქალაქში - თბილისში, რუსთავში, ქუთაისსა და ბათუმში, გზებზე მოძრავი სატრანსპორტო საშუალებების გამონაბოლქვის კონტროლს 2023 წლის 4 სექტემბრიდან ახორციელებს.

მონიტორინგის დაწყებიდან დღემდე, დეპარტამენტის თანამშრომლების მიერ ავტოსატრანსპორტო საშუალებების გამონაბოლქვის დადგენილ ნორმასთან შეუსაბამობის 20 727 ფაქტი გამოვლინდა.

გამოვლენილი სამართალდარღვევებიდან 11 273 თბილისში, 3 627 ბათუმში, 3 366 ქუთაისში, ხოლო 2 461 ქალაქ რუსთავში დაფიქსირდა.

სამართალდარღვევების 18 032 შემთხვევა ფიზიკური პირების, ხოლო 2 695 შემთხვევა იურიდიული პირების მიერ იყო ჩადენილი. სატრანსპორტო საშუალებების ტიპების მიხედვით, 12 109 სამართალდარღვევა მსუბუქ ავტომობილებზე, 7 905 - მიკროავტობუსებზე, 694 - სატვირთო ავტომობილებზე, 18 - ავტობუსებზე, ხოლო 1 - ექსკავატორზე მოდის.

2024 წელს დეპარტამენტმა ავტოსატრანსპორტო საშუალებების გამონაბოლქვის დადგენილ ნორმებთან შეუსაბამობის 5 562 ფაქტი გამოავლინა, 2025 წელს - 6 016, ხოლო 2026 წლის 8 თვის განმავლობაში - 6 105 სამართალდარღვევა. მათგან 743 ფაქტი მხოლოდ აგვისტოში დაფიქსირდა.

მონიტორინგის დაწყებიდან სამი წლის თავზე, გამონაბოლქვის კონტროლის მექანიზმების გაუმჯობესებისა და პროცესის ეფექტიანობის გაზრდის მიზნით, დეპარტამენტში გამონაბოლქვის კონტროლის სამსახური ცალკე სტრუქტურულ ერთეულად ჩამოყალიბდა.

სურსათის ეროვნულმა სააგენტომ სამტრედიაში მწყრის კვერცხის არარეგისტრირებული საწარმო გამოავლინა. 

იმერეთის დეპარტამენტის ინსპექტორებმა სახელმწიფო კონტროლის ფარგლებში არაგეგმურად შეამოწმეს ინდივიდუალური მეწარმე კ. ბ.-ის (მისამართი: სამტრედია, სოფელი კოპიტნარი) კუთვნილი საწარმო. ინსპექტირების შედეგად დადგინდა, რომ ბიზნესოპერატორი მწყრის კვერცხს სავალდებულო აღიარებისა და ეკონომიკურ საქმიანობათა რეესტრში რეგისტრაციის გარეშე აწარმოებდა. გარდა ამისა, ობიექტზე დარღვეული იყო მომხმარებლისთვის სურსათის შესახებ ინფორმაციის მიწოდების წესიც.

კანონმდებლობის შესაბამისად, მეწარმე დაჯარიმდა და საწარმოო პროცესი შეუჩერდა.

 იმერეთში, სოფელ გოგნთან ტყეში შესასვლელი ჩაკეტეს. გამოკრული ინფორმაციით, კამერებიც დააყენეს. 2,800 ჰექტარი გადაეცა შპს "გოგნის ქარის კომპანიას", რომლის მფლობელიც საქართველოს ბანკის გენერალური დირექტორი, არჩილ გაჩეჩილაძეა.

ინფორმაციას დათო სიმონია სოციალურ ქსელში ავრცელებს. 

,,აპირებენ ქარის ელექტროსადგურის ჩადგმას. უნდა აშენდეს 28 ტურბინა-გენერატორი, ქვესადგური, მაღალი ძაბვის გადამცემი 21 კილომეტრიანი ხაზი, კაბელების 31 კილომეტრიანი მიწისქვეშა ქსელი, შიდა მისასვლელი გზები, მუშებისთვის ბანაკი და სხვა ინფრასტრუქტურა.

საამისოდ გაიჩეხება 76.42 ჰექტარი ტყე "წითელ ნუსხაში" შეტანილი იშვიათი ხეებით. ირაკლი კობახიძის ხელმოწერილი განკარგულების მიხედვით, უნდა მოიჭრას 7,533 ცალი წაბლი, 2,115 ცალი კოლხური ბზა, 40 ცალი უთხოვარი. კომპანიის დაკვეთილი კვლევის მიხედვით, ხეების უმრავლესობა საღია. გადამცემი ხაზებისთვის ტყეში დერეფანი რომ გაიჭრება, ის ტერიტორია მუდმივად გაკაფული დარჩება. გადამცემი ხაზების ქვეშ ხეები არ შეიძლება.

გამოთხოვილია, მაგრამ არ ასაჯაროვებენ კომპანიასა და სახელმწიფოს შორის დადებულ ხელშეკრულებას. ამის გამო არ ვიცით, რა პირობებით ვიყიდით დენს კერძო ბიზნესისგან. ამ ამბავზე მხოლოდ ერთი ონლაინმედია ყვება. მეტი არავინ. ამიტომ ინფორმაციის გავრცელება მნიშვნელოვანია. უმეტესობამ არ იცის, რა ხდება.,,-წერს დათო სიმონია.

პირველი სექტემბრიდან ქუთაისში, მუნიციპალურ ტრანსპორტში მგზავრობის საფასურის გადახდა მხოლოდ საქართველოს ბანკის ბარათებით გახდა შესაძლებელი. სატრანსპორტო კომპანიის ინფორმაციით, ქალაქში ტაბლეტები ხარვეზით სწორედ ამ ცვლილების გამო მუშაობს.

,,პირველი სექტემბრიდან, ქუთაისის მუნიციპალურ ტრანსპორტში მგზავრობის საფასურის გადახდა მხოლოდ “საქართველოს ბანკის” ბარათებითაა შესაძლებელი. 

აღნიშნული ცვლილების გამო, ქალაქის ტერიტორიაზე განთავსებული ტაბლოები მუშაობს ხარვეზებით. შესაბამისი სამსახურები მუშაობენ ხარვეზების გასასწორებლად და უმოკლეს ვადაში, ელექტრონული ტაბლოებით ინფორმაციები ზუსტად და დროულად იქნება მგზავრებისთვის მიწოდებული.   

ქუთაისის სატრანსპორტო კომპანია ბოდიშს გიხდით, შექმნილი დისკომფორტის გამო.,,-ქუთაისის სატრანსპორტო კომპანია.