ქუთაისის საკრებულოს თავმჯდომარე სოციალურ ქსელში წერილს აქვეყნებს.
"პოლიტიკაში ყოფნის ოთხი წლის თავზე, უფრო ნათლად იაზრებ საჯარო სივრცეში ყოფნის სირთულეს და პასუხისმგებლობას. ეს პასუხისმგებლობა ერთიათად იზრდება მაშინ, როდესაც ემსახურები მშობლიურ ქალაქს, სადაც შენს უკან არის ოჯახის, მშობლების სახელები, ადამიანები, რომლებსაც არასდროს გადაუხვევიათ იმ პრინციპეპისგან, რასაც წესიერება, ადამიანების პატივისცემა და ქალაქის ღირსეული სამსახური ქვია.
მიუხედავად იმისა, რომ მქონდა შესაძლებლობა პროფესიული კარიერა საზღვარგარეთ გამეგრძელებინა, მიღებული ცოდნით და გამოცდილებით დავბრუნდი ჩემს ქვეყანაში, რათა მემსახურა ჩემი თანაქალაქელებისთვის. მაშინ ბევრი გამოცდილი ექიმი, მოღვაწე და თავისი საქმის პროფესიონალი დამიდგა გვერდით, რაც დამატებით განცდას და მოტივაციას მძენდა, რომ დამენერგა და ახალგაზრდა თაობისთვის გადამეცა კვლევების თანამედროვე მეთოდები. განვითარება და ადამიანების მხარდაჭერა, სწორედ ეს გახლდათ პოლიტიკაში ჩემი შემოსვლის მთავრი მიზეზი.
ჩემთვის, ქალაქის წარმომადგენლობით ორგანოში საქმიანობა, პირველ რიგში, არის ჩემს ქალაქზე ზრუნვა და უდიდესი პასუხისმგებლობა თითოეული ქუთაისელის წინაშე. ეს ოთხი წელი არ ყოფილა მარტივი, შეიძლება ითქვას, რომ რთულ ტურბულენციაში მიწევდა იმ პრინციპების დაცვა, რასაც ქვია თავისუფლება, დემოკრატიული ღირებულებები, წარმომადგენლობითი ორგანოს გაძლიერება და განვითარებისთვის თანასწორი გარემოს უზრუნველყოფა. ამ პრინციპებით იყო ნაკარნახები ჩემი ყველა საჯარო განცხადება თუ განხორციელებული პროექტი.
ამ ოთხი წლის განმავლობაში, ჩვენი პრიორიტეტი იყო ადგილობრივი თვითმმართველობის გაძლიერება და დეცენტრალიზაციის გზაზე მნიშვნელოვანი ნაბიჯების გადადგმა, მოქალაქეთა მხარდაჭერა და გადაწყვეტილების მიღების პროცესში მათი ჩართულობის უზრუნველყოფა, ქალაქის ინფრასტრუქტურის განვითარება და ტურიზმის სექტორის მხარდაჭერა, ქალთა ეკონომიკური გაძლიერება, ახალგაზრდული ინიციატივების მხარდაჭერა და სხვა მრავალი.
მადლობა მათ, ვინც ჩვენთან ერთად იზიარებდა ამ პოზიციებს. მადლობა მათაც, ვინც ჯანსაღი კრიტიკით მოდუნების საშუალებას არ გვაძლევდა. არაერთხელ მითქვამს და გავიმეორებ, გადაწყვეტილების მიღების პროცესში უაღრესად მნიშვნელოვანია არგუმენტაცია და განსხვავებული პოზიციების შეჯერება. სწორედ ამიტომაც, მიმაჩნია, რომ ჯანსაღი ოპონირება არის დემოკრატიის ფუნდამენტი, მათ შორის, მედიის და სამოქალაქო სექტორის ჩართულობა.
დემოკრატიული ინსტიტუტების გაძლიერების, ქვეყნის განვითარებისთვის მიმართული რეფორმირების მხრივ, საქართველომ მნიშვნელოვანი ნაბიჯები გადადგა, თუმცა კვლავ გამოწვევად რჩება სოციალური მდგომარეობა და დასაქმება, რაც პანდემიამ განსაკუთრებით დაამძიმა. სწორედ ამიტომ, ჩვენ ადგილობრივ დონეზე მაქსიმალური უნდა შევძლოთ და გავაკეთოთ იმისათვის, რომ შევქმნათ ბიზნესის განვითარების ახალი შესაძლებლობები, რაც, პირველ რიგში, გულისხმობს ქალაქის ინფრასტრუქტურის განახლებას და ტურიზმის სექტორის მხარდაჭერას.
ამავდროულად მნიშვნელოვანია ახალი სოციალური თუ ჯანდაცვითი პროექტების შემუშავება, არსებულის გადაფასება მოქალაქეთა საჭიროებების შესაბამისად. განვითარებისთვის პოლიტიკურ ნებასთან ერთად, მნიშვნელოვანია ახალგაზრდების ჩართულობა. სწორედ ახალმა თაობამ, თანამედროვე მიდგომებით და გამოცდილ ადამიანებთან თანამშრომლობით უნდა შექმნას ჩვენი ქალაქის მომავალი.
გამარჯვების ოლქის თითოეულ მაცხოვრებელს მინდა, კიდევ ერთხელ ვუთხრა მადლობა მხარდაჭერისთვის და თანამშრომლობისთვის. ამ ოთხი წლის განმავლობაში ვიყავი თქვენ გვერდით, თუმცა გასაკეთებელი კიდევ ბევრია. ჩემთვის ყველაზე ძვირფასია ის დამოკიდებულებები და ურთიერთობები, რაც ამ ხნის განმავლობაში ჩამოგვიყალიბდა.
ვიცი და მესმის თითოეული საცხოვრებელი სახლის, ქუჩის და უბნის საჭიროებები, მაქვს თქვენი მხარდაჭერის იმედი, რათა მეტის გაკეთება შევძლო აქ მცხოვრები თითოეული ოჯახის კეთილდღეობისთვის.
მეორე წელია მსოფლიო და ჩვენი ქვეყანა ებრძვის გლობალურ პანდემიას თავისი უმძიმესი შედგებით. ამ ბრძოლაში წინა ხაზზე, რა თქმა უნდა, არის სამედიცინო პერსონალი. ბოლო ერთი წელია მეც, მათთან ერთად, ჩემი წვლილი შემაქვს, როგორც ექიმს, დიაგნოსტიკის ნაწილში. მინდა, მადლობა გადავუხადო ჩემს კოლეგებს იმ გმირული თავდადებისთვის, რასაც თითოეული ადამიანის გადასარჩენად იჩენენ.
ამ ბრძოლაში არაერთი ექიმი, სამედიცინო პერსონალის წევრი და ძვირფასი მოქალაქე დავკარგეთ, დავკარგეთ მეგობრები და ოჯახის წევრები. უდიდესი გულისტკივილით ვუსამძიმრებ გარდაცვლილთა ოჯახებს, მშობლებს, შვილებს და მეგობრებს.
ჩვენ, საქართველოს მოქალაქეებს, განურჩევლად სქესისა, ეროვნული კუთვნილებისა და აღმსარებლობისა გვაკავშირებს თანადგომის და ტოლერანტობის მრავალსაუკუნოვანი ისტორია. დღეს, როგორც არასდროს, გვჭირდება ერთმანეთის გვერდით დგომა და სამოქალაქო პასუხიმგებლობის გამოჩენა. ეს გულისხმობს რეკომენდაციების გათვალისწინებას, სოციალური დისტანციის დაცვას და პირველ რიგში, ვაქცინაციის პროცესის ხელშეწყობას. მხოლოდ ასე შევძლებთ პანდემიის დამარცხებას.
ბოლოს, როგორც რიგითმა მოქალაქემ, ექიმმა, და ქუთაისის მკვიდრმა, მინდა გითხრათ რომ მე ვიქნები იქ, სადაც მოქალაქეები გადაწყვეტენ, ვიქნები იქ, სადაც არის ჩემი ოჯახი, მისი წარსული და მომავალი, ჩემი შვილების სახით, იქ, სადაც არიან ჩემი კოლეგები და ჩემი ქუთაისელები, რომელთაც უდიდეს პატივს ვცემ, ვიქნები იქ, სადაც ჩვენს თანაქალაქელებს დახმარება დაჭირდებათ, ვიქნები ის, სადაც ქუთაისს დავჭირდები.
ეს არის ჩემი პოლიტიკაში ყოფნის და ექიმობის მიზანი.-წერს ირაკლი შენგელია.
,,სამართლიანი არჩევნებისა და დემოკრატიის საერთაშორისო საზოგადოების” მიერ მომზადებული, წინასაარჩევნო პერიოდის მონიტორინგის შუალედური ანგარიშის მიხედვით, სამსახურიდან სავარაუდოდ პოლიტიკური ნიშნით გათავისუფლების/წასვლის იძულების 15 ფაქტი გამოვლინდა.
როგორც შუალედური ანგარიშის წარდგენისას ორგანიზაციაში განაცხადეს, სავარაუდოდ, პოლიტიკური ნიშნით ზეწოლის/მუქარის/ხელის შეშლის - 11, ადმინისტრაციული რესურსის სავარაუდო გამოყენების - 13, სოციალური ქსელით აგიტაციის - 6, ამომრჩევლის სავარაუდო მოსყიდვის - 4, მოქმედი თანამდებობის პირების კამპანიის - 8 ფაქტი გამოვლინდა.
ISFED-ის ინფორმაციით, ასევე გამოვლინდა მმართველი პარტიის მიერ, „სამართლიანი არჩევნების“ წარმომადგენლებისთვის დაკვირვებაში ხელშეშლის ტენდენცია მთელი საქართველოს მასშტაბით. ასევე, გამოიკვეთა, საგანმანათლებლო დაწესებულებაში დასაქმებული პირების „ქართული ოცნების“ კამპანიაში ჩართვის პირაპირ ან/და ირიბად იძულების შემთხვევები.
ანგარიშის მიხედვით, მონიტორინგის პერიოდში დაკომპლექტდა საოლქო და საუბნო საარჩევნო კომისიები.
"დადებით შეფასებას იმსახურებს საოლქო საარჩევნო კომისიის წევრობის მსურველთათვის გასაუბრების ჩატარება და ამის პირდაპირ ეთერში გადაცემა, თუმცა კანდიდატების ნაწილის გასაუბრების ტრანსლაციაზე უარმა, უთანასწორო პირობები შექმნა. აღსანიშნავია, რომ ყველა ჯერზე ვერ მოხერხდა საარჩევნო კომისიის წევრთა მაღალი კვორუმით არჩევა, რასაც დიდი მნიშვნელობა ექნებოდა ადმინისტრაციისადმი ნდობის ამაღლების თვალსაზრისით. მაგალითად, საოლქო კომისიის წევრთა 55% დაბალი კვორუმით აირჩა. საუბნო კომისიის წევრთა შემთხვევაში, აირჩიეს რამდენიმე პირი, რომელთაც წინა არჩევნებზე დისციპლინური პასუხისმგებლობა ჰქონდათ დაკისრებული. გამოვლინდა შემთხვევები, როცა საოლქო საარჩევნო კომისიის წევრებს წინასწარ ჰქონდა მომზადებული იმ კანდიდატთა სია, ვისთვისაც მხარი უნდა დაეჭირა. საუბნო საარჩევნო კომისიების დაკომპლექტების პროცესში, უმრავლეს შემთხვევაში, „ერთიანი ნაციონალური მოძრაობის“, „ევროპული საქართველოს“ და „ლელოს“ მიერ დანიშნული საოლქო საარჩევნო კომისიის წევრები არ მონაწილეობდნენ.
საარჩევნო რეფორმით გათვალისწინებულ სიახლეს წარმოადგენს საკონსულტაციო საბჭოს შექმნა, რომელიც საანგარიშო პერიოდში დაკომპლექტდა. საბჭოს სარეკომენდაციო რჩევების გაცემის ფუნქცია აქვს, საჩივრების განხილვის პროცესთან დაკავშირებით. „სამართლიანმა არჩევნებმა“, რომელიც მიწვეული იყო საბჭოს წევრთა შესარჩევ ჯგუფში, დატოვა ის, გადაწყვეტილების მიღების კონსენსუსზე დაფუძნებული წესის ცვლილებისა და, ასევე, ჯგუფის წევრთა ნაწილის არასანდო რეპუტაციის და მიკერძოების გამო“, - ნათქვამია ორგანიზაციის შუალედურ ანგარიშში.