ქუთაისის ყვავილების ბაზრის დირექცია , ქალაქის მერიასთან შეთანხმებით, ყვავილებით გარემოვაჭრეებს ბაზრის ტერიტორიაზე შესვლას სთავაზობს. მოვაჭრეები ერთი თვის მანძილზე სავაჭრო ადგილის მოსაკრებელსარ გადაიხდიან , ხოლო მომდევნო თვეებში საშეღავათო პირობებით ისარგებლებენ.

შეგახსენებთ,  ყვავილებით მოვაჭრეებს ქუთაისის მერიის ზედამხედველობის სამსახურმა გარევაჭრობა აუკრძალა და ე.წ. ყვავილების ბაზრის ტერიტორიაზე შესვლა მოთხოვა. საპასუხოდ მოვაჭრეებმა აქცია ადგილობრივი თვითმმართველობის შენობის წინ 9 თებერვალს გამართეს.

გარემოს დაცვისა და სოფლის მეურნეობის მინისტრის განცხადებით, ნამახვანჰესთან დაკავშირებით ზოგიერთი ვითომ ექსპერტი მოსახლეობის გრძნობებზე თამაშობს, რაც მისი შეფასებით, უპასუხისმგებლობაა . ლევან დავითაშვილის თქმით, მას ნამახვანჰესთან დაკავშირებით მოსახლეობასთან კომუნიკაციაზე უარი არასდროს უთქვამს.

„ძალიან დიდი გულისტკივილით მინდა ვთქვა, რომ როდესაც საუბარი იყო ამ კონკრეტულ მიმართულებებზე, როგორიც არის კლიმატზე ზემოქმედება, გეოლოგიური საფრთხეები, როგორია ქანები და ასე შემდეგ, ერთი მხრივ ამბობდნენ, რომ საჯარო და გამჭვირვალე არ არის პროცესი, არ გვაქვს ინფორმაციაზე წვდომაო, თქვენ ყველამ იცით, რომ ნებისმიერი გადაწყვეტილება ქვეყნდება ვებგვერდზე, სხვანაირად პროცესი უბრალოდ არ იმართება. ის ადამიანები, რომლებიც ხშირ შემთხევაში ოპონირებენ, სამწუხაროდ უნდა ვთქვა, ზოგიერთ შემთხვევაში, ვითომ ექსპერტები, მათ ეს პროცედურები ყველაზე კარგად იციან, ისინი არაერთი გადაწყვეტილების ნაწილში ან გვიჩივიან ან ოპონირების რეჟიმში არიან. ეჭვიც მაქვს, რომ გარკვეული დღის წესრიგიც გააჩნიათ. სამწუხაროდ, ისინი ადგილობრივი მოსახლეობის გრძნობებზე თამაშობენ და ცდილობენ, მოსახლეობის გრძნობები გამოიყენონ, რაც უპასუხისმგებლობაა. 

პირადად ვიყავი ჩემს კოლეგებთან ერთად ჩართული. ჩვენ უნდა გავაგრძელოთ კომუნიკაცია, ამაზე იყო საუბარი პრემიერის მხრიდან. ჩვენ უნდა შევქმნათ მოსახლეობის სწორი აზრი და პატივი უნდა ვცეთ მოსახლეობის აზს. რამდენადაც დიდი იქნება გამოწვევა, იმდენად დიდი იქნება ჩვენი მხრიდან პასუხი,,-განაცხადა დავითაშვილმა.

გარემოს ეროვნული სააგენტო მოსალოდნელი ამინდის შესახებ ინფორმაციას ავრცელებს.

5 - 6 მარტს საქართველოში მოსალოდნელია თბილი და უნალექო ამინდი. 6 მარტს დასავლეთ საქართველოს დაბლობში +18, +20, ხოლო აღმოსავლეთ საქართველოს ბარში +15, +17 გრადუსამდე დათბება.

პრემიერ-მინისტრ ირაკლი ღარიბაშვილის განცხადებას, რომლის მიხედვითაც ღარიბაშვილმა ეკონომიკისა და სოფლის მეურნეობის მინისტრებს დაავალა უშუალოდ ჩავიდნენ ნამახვანჰესის მშენებლობის ადგილზე და მოსახლეობის წუხილს პირადად გაეცნონ, ,,რიონის ხეობის მცველები,, ეხმაურებიან.

ვარლამ გოლეთიანის განცხადებით, თუ დიალოგი დიალოგისთვის უნდა იყოს, ვერანაირი შედეგი ვერ იქნება.

კომუნიკაციის საჭიროებას რომ ხედავენ, ეს ცუდი ნამდვილად არ არის და მივესალმებით, მაგრამ კომუნიკაცია არ უნდა იყოს ფორმალური ხასიათის და შინაარსის და შეხვედრას უნდა მოყვეს ადეკვატური ნაბიჯები მათი მხრიდან. ის მოთხოვნები, რაც გვაქვს, ძალაშია ყველაფერი და ამ ნაწილში არანაირ კომპრომისზე წასვლას არ ვაპირებთ, მაგრამ შემდგომი დიალოგის გაგრძელებისკენ ვართ ორიეტირებულები. ამ დისკუსიაში უნდა ჩაერთოს ყველა დაინტერესებული მხარე და თავისი სათქმელი ყველამ უნდა დააფიქსიროს.,,-აცხადებს ვარლამ გოლეთიანი.

რიონის ხეობაში პროტესტი 131 დღეს აგრძელდება. მოსახლეობა ითხოვს, არ აშენდეს ნამახვაჰესი და ხეობა დატოვოს კომპანია ,,ენკამ,,

ამ დღეებში, სხვადასხვა მედიასაშუალების მიერ გავრცელდა ინფორმაცია, ქუთაისის მერიის მიერ საბიუჯეტო სახსრების არამიზნობრივი ხარჯვის შესახებ. 

„ ჩვენ, როგორც ანგარიშვალდებულ და პასუხისმგებლიან ადგილობრივ თვითმმართველობას, გვსურს მოსახლეობას მივაწოდოთ სანდო და ზუსტი ინფორმაცია, ქუთაისის მერიის მიერ გაწეული და დაგეგმილი ადმინისტრაციული ხარჯების შესახებ. საზოგადოების მიზანმიმართულად შეცდომაში შეყვანის მიზნით, ბოლო პერიოდში, სხვადასხვა მედიასაშუალებით გავრცელებულ ინფორმაციაში ერთმანეთში არეულია 2020 წლის ფაქტობრივი და 2021 წლის გეგმური ხარჯები. 2020 წელს, ჯამურად, დაახლოებით 200 000 ლარის ადმინისტრაციული ხარჯი დაიზოგა, რაც სოციალური მიმართულებებით გადანაწილდა. 2020 წელს 65 000 ლარით შემცირდა სამივლინებო ხარჯები, ხოლო 65%-თ შემცირებულია წარმომადგენლობითი ხარჯები. გასულ წელს, წარმომადგენლობითი ხარჯებიდან დაფინანსდა ქორქია-საკანდელიძის სახელობის სტუმრების მომსახურება, ახალი კორონა ვირუსის (COVID-19) გავრცელების პრევენციის მიზნით ქალაქ ქუთაისში შექმნილი მოხალისეთა ჯგუფების კვებითი მომსახურება. ასევე, შეძენილი იქნა კოვიდ 19-თან ბრძოლაში ჩართული ექიმებისთვის გადასაცემი საჩუქრები. 2021 წელს ქუთაისის მერიას არ გაუწევია არანაირი სარესტორნე ხარჯი და ტყუილია ინფორმაცია, რომ მერიის ხელმძღვანელი პირები რესტორნებს სტუმრობდნენ. 2020 წელს დაწესებული შეზღუდვების შესაბამისად, როდესაც ქალაქში არ მოძრაობდა საქალაქო ტრანსპორტი, მერიის თანამშრომლებს უხდებოდათ მოქალაქეების კონკრეტული საჭიროებების მიხედვით უშუალოდ მისამართზე მომსახურება. მიუხედავად ამისა, საწვავის მოხმარება არ გაზრდილა და წინა წლების საშუალო სტატისტიკურ მონაცემებს ემთხვევა. ამასთან, განვმარტავთ, რომ მერიის სტრუქტურული ერთეულების სამუშაო პროცესი არ შეწყვეტილა პანდემიის მიუხედავად. შესაბამისად, ტყუილია ინფორმაცია გახარჯული საწვავის არამიზნობრიობის შესახებ. თვითმმართველობის 2021 წლის ბიუჯეტის პრიორიტეტები არის მოსახლეობის სოციალური დაცვა და ინფრასტრუქტურული პროექტების განხორციელება. გასულ წელთან შედარებით, ნახევარ მილიონზე მეტითაა გაზრდილი სოციალური პროგრამების ბიუჯეტი. ქალაქში ყველა აუტისტური სპექტრის მქონე ბავშვი უზრუნველყოფილი იქნება შესაბამისი სერვისით, რისთვისაც ბიუჯეტიდან დამატებით 200 000 ლარი გამოიყო. ბიუჯეტში გათვალისწინებულია 200 000 ლარიანი ფონდი ქალაქში პანდემიის წინააღმდეგ სხვადასხვა ღონისძიების დასაფინანსებლად, ასევე, 40 000 ლარით დაფინანსდება სოციალურად დაუცველი ბავშვებისათვის ონლაინ სწავლების მიზნით ინტერნეტ მომსახურების მიწოდება. 60 000 ლარით დაფინანსდება საგანმანათლებლო პროექტი სოციალურად დაუცველი ბავშვებისათვის. ქვეყანაში და ქალაქში პანდემიით გამოწვეული სხვადასხვა სოციალური გამოწვევის დასაფინანსებლად, საჭიროების შემთხვევაში, დამატებით გამოიყოფა სხვა რესურსები, პრიორიტეტების მიხედვით გამოთავისუფლდება ხარჯები, როგორც ეს თვითმმართველობამ გასულ წელს გააკეთა. 2021 წელს ქალაქი 4 მნიშვნელოვან საერთაშორისო და ადგილობრივ ღონისძიებას მასპინძლობს. მსგავსი მასშტაბის და რანგის ღონისძიებებისათვის ბიუჯეტში გაწერილი ადმინისტრაციული ხარჯების მიზანია ქალაქის ისტორიული, ეკონომიკური, საინვესტიციო , კულტურული, ტურისტული პოტენციალის წარმოჩენა. 2021 წელს, ადმინისტრაციული და წარმომადგენლობითი ხარჯებისათვის გამოყოფილია 310 000 ლარი და შესაბამისად, გავრცელებული ინფორმაცია, რომ ამ მიმართულებით ქალაქი მილიონობით ლარს დახარჯავს, წარმოადგენს ტყუილს და ემსახურება საზოგადოების შეცდომაში შეყვანას. ინფრასტრუქტურულ პროექტებზე ქალაქში 20 მილიონზე მეტი დაიხარჯება. აღნიშნული თანხის მოცულობა და პროექტების ჩამონათვალი წლის განმავლობაში კიდევ გაიზრდება.“- აცხადებს ქუთაისის მერიის ადმინისტრაციული სამსახურის უფროსი პეტრე ადამაძე.

პრემიერ-მინისტრის  განცხადებით, ნამახვანჰესთან დაკავშირებით საზოგადოებაში არსებულ ყველა კითხვას პასუხი უნდა გაეცეს. მან მთავრობის დღევანდელ სხდომაზე მინისტრებს დაავალა, უშუალოდ ჩავიდნენ ადგილზე და მოსახლეობის წუხილს პირადად გაეცნონ.

 შესაძლებელია  საკომიტეტეო მოსმენებიც გაიმართოს.

„მინდა გამოვეხმაურო ნამახვანჰესთან დაკავშირებით მოსახლეობის წუხილს, რომელიც ჩვენს საზოგადებაში გაჩნდა. ბუნებრივია, კითხვები არსებობს და ყველა კითხვას დასაბუთებული, პროფესიონალური პასუხი უნდა გაეცეს. ვფიქრობ, აუცილებელია მოსახლეობაში ამ კითხვებს უშუალოდ მინისტრების მხრიდანაც გაეცეს პასაუხი. ამიტომ, მინდა ვთხოვო ქალბატონ ნათია თურნავას და ასევე, ბატონ ლევან დავითაშვილს, პირადად ჩავიდნენ ადგილზე, მაგალითად, ხვალ. დაიწყეთ უშუალო კომუნიკაცია მოსახლეობასთან, პირადად გაესაუბრეთ, აუხსენით, თუ რასთან დაკავშირებით აქვთ მათ წუხილი. ასევე, მინდა ვთხოვო ჩვენს მინისტრებს, რომ შესაბამისი საკომიტეტეო მოსმენები გამართონ. პარლამენტშიც შეიძლება, ამ საკითხის ირგვლივ დაინტერსებული პირების მონაწილეობით გაიმართოს აღნიშნული მოსმენები, რომ ყველა ცხარე კითხვას პასუხი გაეცეს.

მოგეხსენებათ, ჩვენი ქვეყნისთვის ენერგოდამოუკიდებლობა მთავარი პრიორიტეტია და ამ გამოწვევას ადეკვატურად უნდა ვუპასუხოთ. ისიც კარგად მოგეხსენებათ, რომ წლიდან წლამდე იზრდება იმპორტირებული ელექტროენერგია, პროგნოზები, რომელიც ენერგეტიკის მიმართულებით არსებობს, არის ის, რომ ყოველ წელს მინიმუმ საშუალოდ, 100 მეგავატი სიმძლავრის ჰესი უნდა შენდებოდეს ქვეყანაში, რაც ამ ეტაპზე არ ხორციელდება. აქ ჩვენ უნდა ვიპოვოთ ოქროს შუალედი. ამისთვის აუცილებელია მოსახლეობასთან უშუალო კომუნიკაცია, რომ პასუხგაუცემელი კითხვა არ დარჩეს“,-განაცხადა ღარიბაშვილმა.