პრემიერ-მინისტრის
ინფორმაციით, საჯარო მოხელეების ხელფასი 2026 წლამდე ყოველწლიურად, მინიმუმ 10%-ით გაიზრდება.
„რა თქმა უნდა, მეტი თანხები გვექნება გადასანაწილებელი უწყებების მიხედვით და უფრო მეტი პროექტები დაფინანსდება. ეს ასევე გვაძლევს საშუალებას, რომ საჯარო სექტორში დასაქმებულთათვის შრომითი ანაზღაურება გაიზარდოს, 2020 წლამდე პრაქტიკულად არცერთ წელს არ გაზრდილა ხელფასები საჯარო სექტორში, რაც ვფიქრობ, დიდი შეცდომა იყო. ჩამორჩენა კერძო და საჯარო სექტორში არსებულ შრომის ანაზღაურებებს შორის ძალიან დიდია, ამიტომ ამას სჭირდება მოწესრიგება. იანვარში ანაზღაურება 10%-ით გაიზარდა ყველა საჯარო მოხელისთვის, ამის შემდეგ ყოველ წელს, 2026 წლამდე მინიმუმ 10%-ით გაიზრდება საჯარო მოხელეების ხელფასები და ჯამში გამოვა 50%-იანი მატება უახლოესი წლების განმავლობაში. ამ დინამიკას სჭირდება შენარჩუნება, გვაქვს კარგი ინიციატივები რომლებსაც გავაჟღერებთ და დავიწყებთ სექტემბრიდან. მინდა ხაზი გავუსვა იმ სტაბილურობის მნიშვნელობას, რომელიც მმართველმა გუნდმა შევინარჩუნეთ ამ პერიოდში, მინდა მოსახლეობას ვუთხრა, რომ ჩვენთან შენარჩუნდება მშვიდობა და მაღალი ეკონომიკური ზრდა, რაც ნიშნავს მეტ კეთილდღეობას ჩვენი მოქალაქეებისთვის და ქვეყნისთვის“, - აღნიშნა ირაკლი ღარიბაშვილმა.
ქუთაისმა ქალაქის მომავლის ახლებურად გამოსახვისადმი მიძღვნილ პირველ ურბანულ ფორუმს -„Show&Tell (მაჩვენე და მიამბე)“ უმასპინძლა. ღონისძიება სასტუმრო „ქუთაისი ინნ“-ში ჩატარდა.
კონფერენცია გაიმართა ევროკავშირისა და გაეროს განვითარების პროგრამის ერთობლივი პროექტის - “მერები ეკონომიკური ზრდისთვის” (M4EG) ფარგლებში.
ღონისძიებაში მონაწილეობდნენ ქუთაისის მერი იოსებ ხახალეიშვილი, რეგიონული განვითარებისა და ინფრასტრუქტურის მინისტრის მოადგილე მზია გიორგობიანი, იმერეთში სახელმწიფო რწმუნებული ზვიად შალამბერიძე, ევროკომისიის გენერალური დირექტორატის პროგრამის მენეჯერი ტიბო შარლე, საქართველოში გაეროს განვითარების პროგრამის ხელმძღვანელის მოადგილე ანა ჩერნიშოვა, M4EG რეგიონული მენეჯერი თინა სტოუმი, M4EG პროექტის მენეჯერი თიკო ტყეშელაშვილი, M4EG ადგილობრივი ეკონომიკური განვითარების კოორდინატორი ოთარ კონჯორია, ადგილობრივი თვითმმართველობების წარმომადგენლები 5 ქვეყნიდან.
შეხვედრა მიზნად ისახავდა მუნიციპალური განვითარების ახალ გზებზე მსჯელობას, მდგრადი სისტემების დანერგვისა და შემოსავლის ახალი წყაროების შექმნის შესაძლებლობებს.
კონფერენციაზე წარმოდგენილი იქნა ანგარიში იმ საქმიანობის შესახებ, რასაც აღმოსავლეთ პარტნიორობის ქვეყნების მუნიციპალიტეტები ბოლო ექვსი თვის განმავლობაში აწარმოებენ გამოწვევების საპასუხოდ.
„დღეს, ქუთაისისთვის ძალიან მნიშვნელოვანი პროექტის ფარგლებში, ვუმასპინძლეთ ევროკავშირის პროგრამის „მერები ეკონომიკური ზრდისთვის“ რეგიონულ ფორუმს- „Show&Tell (მაჩვენე და მიამბე)“, რომელიც მიმართულია მუნიციპალიტეტების ტრანსფორმირებისკენ, მუნიციპალური განვითარების ახალი გზებით.
ქუთაისი არის ერთ-ერთი გამარჯვებული აღნიშნული საგრანტე კონკურსის ფარგლებში და მიიღებს 225 000 ევროს იმისთვის, რომ გახდეს „ეკო სმარტ ქალაქი“.
„მუნიციპალური გარდაქმნის პორტფელი“ ჩვენი ქალაქისთვის რამდენიმე ძირითად მიმართულებას მოიცავს - ნარჩენების მართვა, ეკოლოგიური ტრანსპორტი, მწვანე ქალაქის კონცეფცია. რაც მთავარია, ეს ყველაფერი უნდა განხორციელდეს ინოვაციური გზებით, ისე, რომ ქუთაისი უკეთ მოერგოს მომავლის მოთხოვნებს.
ქუთაისის მუნიციპალიტეტის გუნდმა უკვე შეიმუშავა პილოტური გეგმა, რომლის განხორციელების შემდეგ, ჩვენს ქალაქში ცხოვრება იქნება ბევრად უფრო კომფორტული. ჩვენი გუნდის მიერ გაწეული მუშაობა შეფასდა , როგორც რეგიონში ერთ-ერთი საუკეთესო.
ასეთი შეხვედრები კარგი შანსია ჩვენი ქალაქის საერთაშორისო ასპარეზზე კიდევ უფრო მეტად წარმოსაჩენად, ამასთანავე , სხვა მუნიციპალიტეტების საუკეთესო პრაქტიკის გასაზიარებლად.
მადლობა მინდა ვუთხრა UNDP-ის ხელმძღვანელებსა და წარმომადგენლებს, რომლებმაც ქუთაისს ეს შანსი მისცეს!“- განაცხადა იოსებ ხახალეიშვილმა.
კონფერენციაზე პროექტში მონაწილე მუნიციპალიტეტების სამუშაო ჯგუფების წევრებს გადაეცათ შესაბამისი სერთიფიკატები.
„მერები ეკონომიკური ზრდისთვის“ (M4EG) არის M4EG ინიციატივის ნაწილი, რომელიც დაიწყო და ფინანსდება ევროკავშირის მიერ 2017 წლიდან. მერები ეკონომიკური ზრდისთვის (M4EG) იმართება გაეროს განვითარების მიერ 2021 წლიდან, ევროკავშირთან, ადგილობრივ ხელისუფლებასთან და სხვა პარტნიორებთან მჭიდრო კავშირში.
