21 მარტი დაუნის სინდრომის მსოფლიო დღეა,რომელიც პირველად 2006 წელს აღინიშნა,ხოლო 2011 წლიდან გაერომ მოუწოდა ყველა ქვეყანას,ჩართულიყვნენ საგანმანათლებლო კამპანიაში.

დაუნის სინდრომი 21-ე ქრომოსომით გამოწვეული გენეტიკური მდგომარეობაა.სწორედ ამიტომ აღინიშნება წლის მესამე თვის 21-ე დღეს,ანუ 21 მარტს.

მთავარი მიზანი კი არის საზოგადოების ცნობიერების ამაღლება დაუნის სინდრომის მქონე ადამიანთა მხარდასაჭერად.

დაუნის სინდრომის მსოფლიო დღეს საქართველოს დაუნის სინდრომის ასოციაცია უკვე მეცამეტედ აღნიშნავს  და ყოველწლიურ კამპანიას #წინდამინდა ატარებს

ქართული ჟურნალისტიკის დღე საქართველოს ჟურნალისტთა ფედერაციამ და თბილისის სახელმწიფო უნივერსიტეტმა 1993 წელს, ერთობლივად დაარსეს.

ჟურნალისტიკის დღედ პირველი ქართული გაზეთის,ჯერ "საქართველოს გაზეთის", შემდეგ კი "ქართული გაზეთის დაარსების დღე დაწესდა.სწორედ 1819 წლის 21 მარტს გამოვიდა გამოცემის პირველი ნომერი.

საინფორმაციო სააგენტო "აქტორი" ულოცავს ჟურნალისტებს პროფესიულ დღეს და წარმატებებს უსურვებს.

 ადამიანის უფლებათა ევროპულმა სასამართლომ დაარეგისტრირა საიას საჩივარი, რომელიც 2024 წლის საპარლამენტო არჩევნებზე კენჭისყრის ფარულობის მასობრივ დარღვევას შეეხება. 

საქართველოს ახალგაზრდა იურისტთა ასოციაციამ“, ადამიანის უფლებათა ევროპულ სასამართლოს სარჩელით მიმართა, რომელიც, ორგანიზაციის ინფორმაციით, 2024 წლის საპარლამენტო არჩევნებზე, კენჭისყრის ფარულობის მასობრივი დარღვევას შეეხება. აღნიშნულის შესახებ საია-ს თავმჯდომარემ, ნონა ქურდოვანიძემ ორგანიზაციის ოფისში გამართულ ბრიფინგზე განაცხადა.

საქართველოს ახალგაზრდა იურისტთა ასოციაცია დავობს, რომ დაირღვა ევროპული კონვენციის პირველი დამატებითი ოქმის მე-3 მუხლი - თავისუფალი არჩევნების უფლება.

 საჩივარში აღნიშნულია, რომ ჩატარებული არჩევნების დროს საარჩევნო ადმინისტრაციის მიერ საკუთარი ვალდებულებების არაჯეროვნად შესრულებამ მასობრივად დაარღვია კენჭისყრის ფარულობის ფუნდამენტური პრინციპი, ხოლო საარჩევნო დავების განხილვის დროს დაირღვა საარჩევნო დავების ეფექტიანი მექანიზმებით განხილვის უფლება. 

 საია საჩივარში ასევე დავობს, რომ საქართველოს კანონმდებლობაში არსებული ბლანკეტური დანაწესი, რომელიც მოქალაქეებს საარჩევნო დავაზე საჩივრის წარდგენის შესაძლებლობას უზღუდავს, არ შეესაბამება ადამიანის უფლებათა ევროპული კონვენციის მოთხოვნებს.

ადამიანის უფლებათა ევროპული სასამართლოს წინაშე წარდგენილი საჩივარი თავისი შინაარსით პრეცედენტულია და სასამართლოს აძლევს შესაძლებლობას, კონვენციის ჭრილში შეაფასოს როგორც 2024 წლის 26 ოქტომბრის არჩევნების დროს გამოვლენილი ფარულობის სისტემური დარღვევა, ისე არჩევნებთან დაკავშირებული საჩივრების განხილვის სისტემის სამართლიანობა.

ჭიათურაში მაღაროელები უკვე 20 დღეა საპროტესტო რეჟიმში არიან.24 მარტიდან კი გეგმავენ,აქციევი დედაქალაქში გააგრძელონ. 

,,ორშაბათს 24 მარტს მივდივართ თბილისში , რადგან ჩვენი ხმა უფრო მკაფიოდ გავაგონოთ ხელისუფალს. ,,-აცხადებენ ორგანიზატორები.

აქციის მონაწილეები ითხოვენ, კრიზისი მოგვარებაში სახელმწიფო ჩაერთოს და კომპანია ,,ჯორჯიან მანგანეზმა,, დატოვოს ქალაქი. ისინი აგრეთვე კუთვნილი ხელფასების დარიცხვას მოითხოვენ.

2024 წლის პირველი ნოემბრიდან კომპანია ,,ჯორჯიან მანგანეზმა,,მაღაროებში მოპოვების პროცესი გააჩერა და მაღაროელებს ხელფასის 60%-ს დაპირდა. 

პირველი მარტიდან სამუშაო პროცესი უნდა განახლებულიყო, თუმცა კომპანიამ მიწისქვეშა მაღაროების დახურვის გადაწყვეტილება მიიღო და 3500 ოჯახი შემოსავლის გარეშე დარჩა. 

შინაგან საქმეთა სამინისტროს ცენტრალური კრიმინალური პოლიციის დეპარტამენტის ნარკოტიკების უკანონო ბრუნვის წინააღმდეგ ბრძოლის მთავარი სამმართველოს თანამშრომლებმა, ბოლო პერიოდში ჩატარებული ოპერატიული ღონისძიებებისა და საგამოძიებო მოქმედებების შედეგად, ნარკოდანაშაულის ბრალდებით 9 პირი დააკავეს, მათ შორის 4 ნარკორეალიზატორია.

დაკავებულებს შორის არიან, როგორც საქართველოს, ასევე, უცხო ქვეყნის მოქალაქეები.

დანაშაულები 20 წლამდე ან უვადო თავისუფლების აღკვეთას ითვალისწინებს.

პოლიციამ ნარკოტიკების უკანონოდ გასაღების ბრალდებით დაკავებული პირებისგან, მოსამართლის განჩინების საფუძველზე, რამდენჯერმე განახორციელა ნარკოტიკების საკონტროლო შესყიდვა და აღნიშნული შესყიდვების ფარული აუდიო-ვიდეო ჩაწერა.

სამართალდამცველებმა, დაკავებულების პირადი, საცხოვრებელი სახლებისა და ავტომობილების ჩხრეკისას, სხვადასხვა სახის განსაკუთრებით დიდი ოდენობით ნარკოტიკული საშუალებები, მათ შორის „ჰეროინი“, „კოკაინი“, „ალფა პვპ“ „მეტადონი“, „ტრამადოლი“, „პრეგაბალინი“, „ლირიკა“ და „ბუპრენორფინის“ შემცველი „სუბოტექსის“ 3000-მდე აბი ნივთმტკიცებად ამოიღეს.

„ქართული ოცნების“ ხელისუფლებამ ადმინისტრაციულ სამართალდარღვევათა კოდექსის 174¹ მუხლში ცვლილებები შეიტანა, რის შედეგადაც დემონსტრაციების დროს გზის სპონტანურად გადაკეტვისთვის ჯარიმა 10-ჯერ, 500 ლარიდან 5000 ლარამდე გაიზარდა.

 ამ მუხლით საქმის წარმოებისას პოლიცია იყენებს სახის ამომცნობ კამერებს. როგორც წესი, ასეთ საქმეებში ერთადერთ მტკიცებულებას სახის ამომცნობი კამერებიდან ამოღებული ფოტოები წარმოადგენს, რომლებიც, ძირითადად, შესაბამისი კონტექსტის იგნორირებით, პირის სამართალდამრღვევად მიჩნევისათვის სასამართლოს საკმარის მტკიცებულებად მიაჩნია.

2024 წლის ნოემბრიდან 2025 წლის 18 მარტის ჩათვლით, აქციის მონაწილეებზე ამ მუხლით გამოწერილი ჯარიმების ოდენობა 2 000 000 ლარს აღწევს.

საქართველოს ახალგაზრდა იურისტთა ასოციაციის შეფასებით, სპონტანური შეკრებების დროს გზის გადაკეტვისთვის დემონსტრანტების დაჯარიმების პრაქტიკა შეკრებისა და გამოხატვის თავისუფლების უფლების მძიმე დარღვევას წარმოადგენს.