შიდასახელმწიფოებრივი მნიშვნელობის გომი-საჩხერე-ჭიათურა-ზესტაფონის საავტომობილო გზის კმ25-კმ41 მონაკვეთზე  სარეაბილიტაციო სამუშაოები მიმდინარეობს. ხვალიდან, 30 აგვისტოდან 4 სექტემბრის ჩათვლით, აღნიშნული საავტომობილო გზის კმ1-კმ41 მონაკვეთზე სატვირთო ავტოტრანსპორტის გადაადგილება დროებით შეიზღუდება, ხოლო დანარჩენი სახის ავტოტრანსპორტის მოძრაობა თავისუფალია. 

ინფორმაციას საქართველოს საავტომობილო გზების დეპარტამენტი ავრცელებს. 

ჭიათურელი მაღაროელები 182 დღეა უწყვეტი პროტესტის რეჟიმში იმყოფებიან.

,,ეს მხოლოდ პროტესტი კი არა, სოლიდარობის გამოხატულებაა — ჩვენ ვდგავართ და ვიდგებით აქ მანამ, სანამ ჩვენი ოთხი უსამართლოდ დაკავებული მეგობრის ბედი საბოლოოდ არ გაირკვევა. ჩვენი მოთხოვნა ერთია: მათი დაუყოვნებელი გათავისუფლება.

აქ მყოფებმა თითქმის დავივიწყეთ საკუთარი ოჯახები, პირადი პრობლემები და უამრავი სირთულე, რომლებიც ყოველდღიურად გვხდება. მიუხედავად იმისა, რომ ჩვენს წინააღმდეგ ჭორებს და ცრუ ინფორმაციას ავრცელებენ, ჩვენ მაინც შეუპოვრად ვაგრძელებთ სოლიდარობას ჩვენი მეგობრებისადმი.

ვინც ჩვენზე სხვა წარმოდგენები გაქვთ, გთხოვთ, ერთი წუთით წარმოიდგინეთ თავი ჩვენს ადგილას: თქვენ მიატოვებდით თქვენს მეგობრებს? იმ ადამიანებს, რომელთა დიდი წვლილია, რომ დღეს ჭიათურაში შრომობთ და ცხოვრობთ? ჩვენ ვერ მივატოვეთ. პირად და ოჯახურ კეთილდღეობაზე უარი ვთქვით, რადგან მეგობრობა და სამართლიანობა უფრო მნიშვნელოვანია.

აქ ყოფნა არც მარტივია, არც კომფორტული — კარავში ცხოვრება მძიმეა, თან ამავდროულად ვზრუნავთ ციხეში მყოფ მეგობრებზეც. ეს ბრძოლა სავსეა გამოწვევებით, მაგრამ ჩვენ არავის არაფერს ვამადლით და თავს არავის ვაცოდებთ. უბრალოდ, ახლა განსაკუთრებით გვჭირდება საზოგადოების დახმარება.

დღეს გაკეთებული სიკეთე განსაკუთრებით მადლიანი იქნება თითოეულისთვის.

ქვემოთ გიზიარებთ ანგარიშის ნომერს. თქვენი შესაძლებლობის ფარგლებში, გთხოვთ, შემოგვიერთდით და შეიტანეთ წვლილი ჩვენსა და იმ ბიჭების თანადგომაში.

#GE40BG0000000604733786,,-წერია მაღაროელთა საინიციატივო ჯგუფის მიერ გავრცელებულ ინფორმაციაში. 

27 აგვისტოს ზოგან გაწვიმდება, ხოლო 28-29 აგვისტოს ცხელი და უმეტესად უნალექო ამინდია მოსალოდნელი.

ქ. თბილისში ცხელი და უნალექო ამინდია მოსალოდნელი. ჰაერის ტემპერატურა დღისით +33, +35 გრადუსი დაფიქსირდება. 

სანაპირო რაიონებში (ბათუმი, ქობულეთი, ანაკლია, ფოთი): 27 აგვისტოს შესაძლებელია მცირე ხანმოკლე წვიმა ელჭექით, 28-29 აგვისტოს კი უმეტესად უნალექო ამინდი იქნება. ჰაერის ტემპერატურა დღისით +28, +30 გრადუსი დაფიქსირდება.  

დასავლეთ საქართველოს დაბლობ რაიონებში (ზესტაფონი, ქუთაისი, სამტრედია, ზუგდიდი, მარტვილი, ოზურგეთი) 27 აგვისტოს შესაძლებელია მცირე ხანმოკლე წვიმა ელჭექით, 28-29 აგვისტოს კი ცხელი და უმეტესად უნალექო ამინდი იქნება. ჰაერის ტემპერატურა დღისით +31, +33 გრადუსი დაფიქსირდება.  

დასავლეთ საქართველოს მთიან რაიონებში (ამბროლაური, ონი, ცაგერი, შოვი, ჭიათურა, საჩხერე, ხულო, რიკოთის უღელტეხილი): 27 აგვისტოს შესაძლებელია მცირე ხანმოკლე წვიმა ელჭექით, 28-29 აგვისტოს კი ცხელი და უმეტესად უნალექო ამინდი იქნება. ჰაერის ტემპერატურა დღისით +28, +33 გრადუსი დაფიქსირდება.  

დასავლეთ საქართველოს მაღალმთიან რაიონებში (მესტია, ბახმარო): 27 აგვისტოს შესაძლებელია მცირე ხანმოკლე წვიმა ელჭექით, 28-29 აგვისტოს კი უმეტესად უნალექო ამინდი იქნება. ჰაერის ტემპერატურა დღისით +25, +30 გრადუსი დაფიქსირდება.  

ქართლში (რუსთავი, ბოლნისი, მარნეული, გარდაბანი, გორი, ცხინვალი): ცხელი და უმეტესად უნალექო ამინდია მოსალოდნელი. ჰაერის ტემპერატურა დღისით +33, +35 გრადუსი დაფიქსირდება. 

კახეთში (საგარეჯო, თელავი, გურჯაანი, სიღნაღი, ლაგოდეხი, ყვარელი, ახმეტა, დედოფლისწყარო): ცხელი და უმეტესად უნალექო ამინდია მოსალოდნელი. ჰაერის ტემპერატურა დღისით +33, +35 გრადუსი დაფიქსირდება. 

აღმოსავლეთ საქართველოს მთიან რაიონებში (ახალციხე, ბორჯომი, დუშეთი, თიანეთი, ფასანაური): ცხელი და უმეტესად უნალექო ამინდია მოსალოდნელი. ჰაერის ტემპერატურა დღისით +28, +33 გრადუსი დაფიქსირდება. 

აღმოსავლეთ საქართველოს მაღალმთიან რაიონებში (ახალქალაქი, წალკა, ბაკურიანი, გუდაური, ომალო): უმეტესად უნალექო ამინდია მოსალოდნელი. ჰაერის ტემპერატურა დღისით +23, +28 გრადუსი დაფიქსირდება. 

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლებმა სამეგრელოში, იმერეთსა და კახეთში 4 უკანონო სახერხი საამქრო გამოავლინეს. 

2 სამართალდარღვევა გამოვლენილია წალენჯიხის მუნიციპალიტეტში - სოფელ მუჟავაში ცირკული, სოფელ ლიაში კი - ქარხნულად დამზადებულ მისაბმელზე დამონტაჟებული ლენტური ტიპის სახერხი დანადგარებია დალუქული. 

ლენტური ტიპის სახერხი დანადგარი ჰქონდა მოწყობილი მოქალაქეს ვანის მუნიციპალიტეტის სოფელ სალომინაოში, საკარმიდამო ნაკვეთში. 

ქალაქ ახმეტაში კი, მოქალაქეს, კუთვნილ მიწის ფართობზე მოწყობილი არარეგისტრირებული ცირკული ტიპის სახერხი საამქროს მიმდებარე ტერიტორიაზე, 0,2 კუბური მეტრი მოცულობის ვერხვის სახეობის პირველადი გადამუშავების პროდუქტი (ფიცარი) ჰქონდა განთავსებული.

ვინაიდან ოთხივე ფაქტი შეიცავს სისხლის სამართლის დანაშაულის ნიშნებს, მასალები შემდგომი რეაგირების მიზნით, შესაბამის უწყებებში გადაიგზავნა.  

ხარაგაულის მუნიციპალიტეტის სოფლებში, ღვერკსა და ხემაღალში, მდინარე ყარნებას ხეობაში განვითარებულ მეწყრულ პროცესებზე ეფექტური რეაგირების მიზნით შექმნილი სწრაფი რეაგირების შტაბი ინტენსიურ რეჟიმში მუშაობს.

ინფორმაციას იმერეთის სამხარეო ადმინისტრაცია ავრცელებს. მათივე ცნობით, მდინარის ხეობაში შექმნილი მდგომარეობის შესწავლა და მართვა კოორდინირებულად ხორციელდება. 

პროცესში ჩართული არიან გარემოს ეროვნული სააგენტოს გეოლოგები, საგანგებო სიტუაციების მართვის სამსახური, რეგიონული განვითარებისა და ინფრასტრუქტურის სამინისტროების წარმომადგენლები, იმერეთის მხარის რწმუნებულის ადმინისტრაცია, საავტომობილო გზების დეპარტამენტი და საქართველოს რკინიგზის წარმომადგენლები.

კონტროლდება მდინარის კალაპოტში დაგუბებული წყლის გამტარობა, ასევე მეწყრული პროცესების დინამიკა. შესაბამისი სამსახურები მუშაობენ მდინარის კალაპოტის გაფართოებასა და დაგუბების ზონების აღმოფხვრაზე. მდინარის კალაპოტი გაიწმინდება მეწყრული მასისგან, რათა უზრუნველყოფილი იყოს წყლის უსაფრთხო გადინება.

მდინარის ხეობაში არსებული ვითარება სრულად ექვემდებარება კონტროლს და მოსახლეობას საფრთხე არ ემუქრება.

სოფელ ხემაღალსა და ღვერკში დღეს იმყოფებოდნენ რეგიონული განვითარების მინისტრის მოადგილე ლევან ზაუტაშვილი, იმერეთის მხარის სახელმწიფო რწმუნებული ლევან ზალკალიანი და ხარაგაულის მერი კობა ლურსმანაშვილი, რომლებიც არსებულ ვითარებას გაეცნენ და მიმდინარე ღონისძიებების შესახებ დეტალური ინფორმაცია მიიღეს.

ხარაგაულის მუნიციპალიტეტის სოფლებში - ხემაღალსა და ღვერკში მეწყერი გააქტიურდა.  მდინარე ყარნება სამ ადგილას არის შეაგუბებული. 

,სამ ადგილას არის უკვე შეგუბება. სიღრმე 8 მეტრი. რკინიგზამ ტექნიკის მობილიზება მოახდინა. იმისთვის რომ წამოსულ მასას რკინიგზისვე ხიდის ქვეშ კალაპოტი გაუწმინდოს და მოუმზადოს.,,-წერს სოციალურ ქსელში ადგილობრივი მარადი გელაშვილი.