"სასიხარულოა, რომ შეიქმნა ახალი ტურისტული ადგილი, სადაც ვიზიტორებს შესაძლებლობა ექნებათ დაათვალიერონ მღვიმე და გაეცნონ მის უნიკალურ ისტორიას"- ამის შესახებ საქართველოს პრემიერ-მინისტრმა ირაკლი ღარიბაშვილმა წყალტუბოს მუნიციპალიტეტის სოფელ ხომულში თეთრა მღვიმის დათვალიერებისას განაცხადა.
ახალი ტურისტული სივრცის შესახებ ინფორმაცია პრემიერს გარემოს დაცვისა და სოფლის მეურნეობის მინისტრმა, ვიცე-პრემიერმა ლევან დავითაშვილმა გააცნო.
როგორც ლევან დავითაშვილმა აღნიშნა, თეთრა მღვიმე 2021 წელს გაიხსნა და ნაღვენთებით გამორჩეულ უძველეს მღვიმეს წარმოადგენს. მღვიმეში მოწყობილია სპეციალური სივრცე, სადაც ღვინის დაძველებისთვის შესაბამისი გარემოა შექმნილი. აღნიშნულ სივრცეში ვიზიტორებს საშუალება ექნებათ, სხვადასხვა ადგილობრივი წარმოშობის ღვინოები დააგემოვნონ.
ეკოტურისტული სივრცე საშუალებას იძლევა, მოეწყოს ქართული და უცხოური ღვინის გამოფენები, კონფერენციები და ტრადიციული ფესტივალები. დაგეგმილია პირველი ღვინის მაღაზიის მოწყობა, სადაც წარმოდგენილი იქნება მღვიმეში დაძველებული ღვინოები.
კერძო ინვესტიციის ფარგლებში განხორციელებული პროექტის ღირებულება 400 000 ლარამდეა. მღვიმის ტერიტორიაზე აშენდა ვიზიტორთა ცენტრი, მოეწყო ღვინის სადეგუსტაციო და ტურისტული დანიშნულების ლოკაცია და ბილიკები. მღვიმე აღიჭურვა საერთაშორისო სტანდარტების შესაბამისი სახანძრო და ავარიული უსაფრთხოების სისტემებით, დამონტაჟდა თანამედროვე გარე და შიდა განათების სპეციალური სისტემა. თეთრა მღვიმე პირველია, რომელიც ადაპტირებული იქნება შშმ პირებისთვის.
თეთრა მღვიმეში პრემიერი პარლამენტის თავმჯდომარე კახა კუჭავასთან, ინფრასტრუქტურისა და რეგიონული განვითარების მინისტრ ირაკლი ქარსელაძესთან, იუსტიციის მინისტრ რატი ბრეგაძესთან და იმერეთის მხარეში სახელმწიფო რწმუნებულ ზვიად შალამბერიძესთან ერთად იმყოფებოდა.
ინფორმაციას "საპატრიარქოს უწყებანი" ავრცელებს.
" გარდაიცვალა ქუთაის-გაენათის ეპარქიის ქუთაისის საფიჩხიის ყოვლადწმინდა სამების სახელობის ტაძრის მღვდელმსახური, გელათის სასულიერო აკადემიისა და სემინარიის ლექტორი, დეკანოზი პეტრე ახვლედიანი.
დეკანოზ პეტრეს დაკრძალავენ ხუთშაბათს, 2021 წლის 2 სექტემბერს, საფიჩხიის ყოვლადწმინდა სამების სახელობის ტაძართან.
მწუხარებას გამოვთქვამთ დეკანოზ პეტრეს გარდაცვალების გამო და თანავუგრძნობთ განსვენებულის ოჯახს, ახლობლებსა და სამწყსოს.
უფალმა სავანესა მართალთასა დააწესოს მისი უკვდავი სული." წერია სამძიმრის წერილში.
სამძიმრის წერილს ავრცელებს თეოლოგი ლაშა დეისაძე -შარვაშიძე.
"დღეს დილით კიდევ დეკანოზი პეტრე ახვლედიანი (დგას პირველი რიგის ცენტრში) შეემატა მათ რიგებს. 63 წლის ასაკში კორონავირუსულმა ინფექციამ იმსხვერპლა.
მამა პეტრე გელათის სასულიერო აკადემიის აღდგენიდან (1990 წ.) მოღვაწეობდა ამ სასწავლებელში, წლების მანძილზე გახლდათ აკადემია-სემინარიის სულიერი მოძღვარი, ხოლო გარდაცვალებამდე იყო პედაგოგი.
დეკანოზი პეტრე ნამდვილად იყო ღირსეული პიროვნება, გამორჩეული სასულიერო პირი, ცნობილი თამადა, გამოირჩეოდა თავისი იუმორით... ბევრი საუკეთესოს თქმა შეიძლება მამა პეტრეს შესახებ..."-წერს ლაშა დეისაძე-შარვაშიძე.
