საქართველოში დელტა შტამის 7 ახალი შემთხვევა დადასტურდა - ამის შესახებ საკოორდინაციო საბჭოს სხდომის დასრულების შემდეგ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ განაცხადა.
"გიდასტურებთ, რომ გაიზარდა დელტა შტამის დადასტურებული შემთხვევები საქართველოში, გუშინ ლაბორატორიაში დადასტურდა 7 ახალი შემთხვევა. დაახლოებით, შემთხვევათა რაოდენობის 10-15 პროცენტი საქართველოში შესაძლოა იყოს დელტა, ანუ ე.წ ინდური შტამი.
სხვადასხვა პროგროზირებადი მაჩვენებლებით, როგორც საერთაშორისო ინსტიტუციების, ისე ჩვენი მოდელირებით, დღეს უკვე 10-20% -მდე შეიძლება მერყეობს „დელტა“ შტამის ცირკულაცია ქვეყანაში. ეს პროგნოზირებადი იყო იმდენად, რამდენადაც „დელტა“ შტამი თანდათან ბრიტანეთში და ევროპის რიგ ქვეყნებში ე.წ. ბრიტანულ შტამს ანაცვლებს. მისი გავრცელება სულ უფრო და უფრო ინტენსიური ხდება. დღევანდელი მონაცემით, 85 ქვეყანაშია ის უკვე დაფიქსირებული. მეტი სიფრთხილე გვმართებს, იმ რეგულაციებისა და რეკომენდაციების მეტად დაცვა, რაც ქვეყანაში არსებობს და მეტად უნდა მოვუფრთხილდეთ ერთმანეთს.
ჩვენ ახლა ე.წ. ოქროს შუალედით მივდივართ ანუ დანის პირზე გავდივართ. ზაფხულია, ეკონომიკა მეტად იხსნება, აუცილებელია რომ მეტი თავისუფლება მიეცეს ეკონომიკას, მაგრამ მეორე მხრივ, აუცილებელია ყველა რეგულაციისა და ყველა რეკომენდაციის დაცვა, რომ ეპიდსიტუაცია არ გაუარესდეს. მთელი ივნისის განმავლობაში ეპიდსიტუაცია მსგავს მაჩვენებელზე დგას, თუ არ ჩავთვლით დღევანდელ მონაცემს, რომელსაც ჩვენ „სამშაბათის სინდორმს“ ვეძახით. შაბათ-კვირას ვინც ვერ მიდის ტესტის გასაკეთებლად, მიდის ორშაბათს და ამიტომ გვაქვს სამშაბათობით გაზრდილი მონაცემი. ჩვენ ამ ბოლო ორი-სამი კვირის განმავლობაში როგორც ინციდენტობის მაჩვენებლით, ასევე დადებითობის მაჩვენებლით ერთ დონეზე ვმერყეობთ. არც იზრდება და არც მცირდება. სიფრთხილე აუცილებელია" - განაცხადა ამირან გამყრელიძემ.
ამ დრომდე საქართველოში დელტა შტამის 20 შემთხვევა იყო ლაბორატორიულად დადასტურებული.
ბოლო 24 საათში ქვეყნის მასშტაბით ჩატარდა 29 709 კვლევა ტესტით, მათ შორის 18 220 კვლევა ანტიგენის ტესტით და 11 489 PCR ტესტით.
ჩატარებული ტესტირების შედეგად, ბოლო 24 საათში გამოვლინდა ვირუსით ინფიცირების 1 194 ახალი დადასტურებული შემთხვევა. ქვეყანაში კოვიდ-19-ის პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 365 068-ს.
რაც შეეხება დადებითობის მაჩვენებელს, 28 ივნისის მდგომარეობით, დადებითობის დღიური მაჩვენებელი არის 4.02 %, ბოლო 14 დღის მანძილზე - 2.5%, ხოლო 7 დღის მანძილზე - 2.45%.
ბოლო 24 საათში ვირუსისგან გამოჯანმრთელდა 678 პირი, ხოლო ჯამში გამოჯანმრთელებულთა რაოდენობა გაიზარდა 351 144-მდე.
ბოლო 24 საათში კორონავირუსით გარდაცვალების 22 ახალი შემთხვევა დაფიქსირდა. პანდემიის გავრცელებიდან დღემდე ვირუსს ჯამში 5 297 პირი ემსხვერპლა.
დღეს ქვეყანაში გამოვლენილი ინფიცირების 1 194 ახალი შემთხვევიდან თბილისში გამოვლენილია 749 შემთხვევა, აჭარა - 41, იმერეთი - 122, ქვემო ქართლი - 102, შიდა ქართლი - 29, გურია - 1, სამეგრელო - ზემო სვანეთი - 44, კახეთი - 71, მცხეთა-მთიანეთი - 20, სამცხე-ჯავახეთი - 8, რაჭა-ლეჩხუმი და ქვემო სვანეთი - 7.
ამ ეტაპზე ინფიცირების მიმდინარე აქტიური შემთხვევა არის 8 601 საიდანაც 2 639 ადამიანი მკურნალობს საავადმყოფოში, მათ შორის, თბილისის საავადმყოფოებში - 1 467, აჭარაში - 154, იმერეთში - 318.
ამ ეტაპზე მძიმე პაციენტია 594 პირი, მათ შორის, თბილისში - 298, აჭარაში - 41, იმერეთში -124. ხელოვნური სუნთქვის აპარატზე იმყოფება 158 პირი, მათგან თბილისში - 103, აჭარაში - 9, იმერეთში - 12.
611 ადამიანი მოთავსებულია კლინიკურ-სასტუმროებში, მათ შორის 366 - თბილისში, 232- აჭარაში.
5 351 პირი ვირუსის მკურნალობის კურსს გადის საცხოვრებელ ბინაზე.
საკარანტინე სივრცეებში მოთავსებულია 42 ადამიანი, მათ შორის, თბილისში - 38, ხოლო აჭარაში - 4.
სულ 6 ოქტომბრიდან - 29 ივნისის პერიოდში, სახელმწიფო საზღვრიდან საკარანტინე სივრცეებში გადაყვანილია - 24 889 პირი.
ამ ეტაპისთვის თვითიზოლაციაში იმყოფება 7 041 ადამიანი, მათ შორის თბილისში - 2 334, პირი, აჭარაში - 572, იმერეთში - 1 123.