საზოგადოება

: საზოგადოება; 06 ოქტომბერი 2022; გადასვლები: 895

23 ოქტომბერს ზესტაფონი ქალაქის დღესასწაულს აღნიშნავს

23 ოქტომბერს ,,ზესტაფონქალაქობის" 150 წლისთავი აღნიშნება.ზესტაფონის მუნიციპალიტეტის მერიის ინფორმაციით, დაგეგმილია რამდენიმე ღონისძიება.ამავე დროს, 23 ოქტომბერს ქალაქშ ღვინის ფესტივალი გაიმართება.

11 : 00 სთ - ოფიციალური მიღება მუნიციპალიტეტის მერიაში დამეგობრებული ქალაქების დელეგაციებთან (პოლონეთი, ისრაელი, ლიეტუვა);

14 : 00 სთ - კულტურული სივრცეების გამოფენა (აღმაშენებლის ქუჩა)

რეწვის ოსტატების მიერ წარმოდგენილი ნამუშევრების გამოფენა;

ნახატების გამოფენა;

საბავშვო სივრცე;

იმერული სამზარეულო საგანგებოდ მოწყობილ ფაცხებში;

სამეწარმეო მარკეტი;

14 – 17 სთ - ადგილობრივი შემოქმედებითი ანსამბლების საკონცერტო პროგრამა; ( აღმაშენებლის ქუჩა)

14 – 17 სთ ღვინის ფესტივალი; ფესტივალში გამარჯვებული საოჯახო წარმოების ღვინოების დაჯილდოება ( აღმაშენებლის ქუჩა)

„ზესტაფონის საპატიო მოქალაქეების“ დაჯილდოება;

18 : 00 სთ საზეიმო კონცერტი ;

20 : 00 სთ - საზეიმო ფოიერვერკი.

: საზოგადოება; 05 ოქტომბერი 2022; გადასვლები: 831

შრომის უსაფრთხოების მიმართულებით შემოწმების პროცესში 4538 დარღვევა გამოვლინდა

,,შრომის უსაფრთხოების მიმართულებით 446 ობიექტი პირველადად შემოწმდა, განმეორებითად კი ჯამში 1074-მა ობიექტმა გაიარა ინსპექტირება. შემოწმების პროცესში 4538 დარღვევა გამოვლინდა,,- ამის შესახებ შრომითი ინსპექციის სამსახურის უფროსმა ბექა ფერაძემ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტზე 2021 წლის ანგარიშის წარდგენისას ისაუბრა.

როგორც მან აღნიშნა, განმეორებითი ინსპექტირების დროს კომპანიების 28%-მა გამოასწორა პირველად გაცემული მითითებები, რაც 2020 წელთან შედარებით, საგრძნობ გაუმჯობესებას ასახავს.

„ანგარიშში წარმოდგენილია თუ რომელი სექტორებია შემოწმებული და შრომის უსაფრთხოების მიმართულებით იქ, სადაც ყველაზე მაღალია დარღვევების მაჩვენებელი, ჩვენ მთავრობის დადგენილებით, განსაზღვრული გვაქვს სექტორები და სექტორული მიმართულებით პრიორიტეტები, რომელიც უკავშირდება სამთო-მოპოვებით მრეწველობას, ასევე სამშენებლო სექტორს. ამ ტიპის ობიექტების შემოწმება იყო პრიორიტეტი გასულ წელს. რაც შეეხება გამოვლენილ დარღვევებს - არ არის შეფასებული საფრთხეები და რისკები 11%-ში, არ არის დაცული სანიტარულ -ჰიგიენური ნორმები და მოუწესრიგებელია ეკონომიკა 9,3%-ში, დასაქმებულები არ არიან აღჭურვილი ინდივიდუალური დაცვის საშუალებებით 7,7%-ში, არ არის შემოწმებული ტექნიკური აღჭურვილობა 7,6%-ში, არ არის დაფარული ღიობები 7,4%-ში, არ არის ჩატარებული სწავლება და ინსტრუქტაჟი, არ არის შემუშავებული უსაფრთხოების გეგმა, არ არის მოაჯირების სტანდარტი მშენებლობებზე და არ გამოიყენება უსაფრთხოების მანიშნებელი ნიშნები“,- განაცხადა ბექა ფერაძემ.

: საზოგადოება; 04 ოქტომბერი 2022; გადასვლები: 922

9 ოქტომბერს ქუთაისი ღვინის ფესტივალს უმასპინძლებს

საქართველოს პრემიერ-მინისტრის ინიციატივით, 9-დან 15 ოქტომბრამდე, მთელი ქვეყნის მასშტაბით, იმართება ახალი, ყოველწლიური, ღვინის ფესტივალი „ღვინის დღეები საქართველოში“.

9 ოქტომბერს ფესტივალს ქუთაისი უმასპინძლებს. ღონისძიებები ცისფერყანწელების ქუჩაზე, „ვერიკოს სკვერში“ გაიმართება.

14:00–20:00 იმერული ღვინის დეგუსტაცია და გამოფენა-გაყიდვა.

14:00–17:00 კულინარიული მასტერკლასი მანჯისთან ერთად.

14:00–20:00 ფელამუშის დამზადება; ჩურჩხელების ამოვლება; ჭაჭის გამოხდა.

14:00–20:00 ხელნაკეთი ნივთების დამზადების მასტერკლასი.

14:30/16:30 / 18:00 - DJ Levi Love Disco.

17:00–20:00 გაცოცხლებული ფიროსმანის ნახატი.

17:00–20:00 მიმების წარმოდგენა.

17:00–20:00 ტრადიციული იმერული სუფრა.

17:00–20:00 ინსტალაცია - „8000-წლიანი უწყვეტი ტრადიცია“.

17:00–20:00 ფოტო-კუთხე „ქვევრი“.

20:00 სუხიშვილების კონცერტი „ქარაბშა“.

: საზოგადოება; 04 ოქტომბერი 2022; გადასვლები: 993

სამტრედია-გრიგოლეთის გზა 10 წელია შენდება,თუმცა 4 ლოტიდან 3 ამ დრომდე დაუსრულებელია

ფლანგვის დეტექტორის ინფორმაციით,სამტრედია-გრიგოლეთის 4 მონაკვეთიდან ყველაზე გვიან – 2019 წელს – მე-3 ლოტი უნდა დასრულებულიყო,თუმცა ამჟამად მხოლოდ ერთი მონაკვეთია დასრულებული, 3 კი კვლავ დაუსრულებელია,

2013 წლის ბიუჯეტის თანახმად მშენებლობისთვის სულ 237 მილიონი ლარი იყო საჭირო, თუმცა 2021 წელს თანხა 1 მილიარდ ლარს გასცდა.

სამტრედია-გრიგოლეთის გზის მშენებლობა 4 ლოტად ხორციელდება, დაფინასების წყარო კი ევროპის საინვესტიციო ბანკია (EIB). სამშენებლო მონაკვეთის სიგრძე ჯამში 51.5 კმ-ია.

ყველაზე ნაკლებად პრობლემური მე-2 ლოტი აღმოჩნდა. მიუხედავად იმისა, რომ თავდაპირველი გეგმის თანახმად სამუშაოები 2018 წელს უნდა დასრულებულიყო, დასრულების ვადები 2020 წლამდე გადაიწია. თუმცა მიმდინარე მონაცემებით ეს ერთადერთი მონაკვეთია, რომელიც გაიხსნა.

დაუსრულებელია 3 ლოტი, საიდანაც ყველაზე პრობლემურად პირველი ლოტია,რომლის მშენებლობაც 2014 წლის 21 მაისს დაიწყო და 2016 წლის 21 ნოემბერს უნდა დასრულებულიყო, თუმცა კონტრაქტორის მხრიდან („Road Building ALTCOM“) ხელშეკრულებით ნაკისრი ვალდებულებების შეუსრულებლობის გამო, გზების დეპარტამენტმა 2017 წლის 2 ოქტომბერს ხელშეკრულება შეწყვიტა.

დეპარტამენტს ახალ კონტრაქტორთან („Akkord lndustry Construction Investment Corporation“) მოუწია ხელშეკრულების გაფორმება. ამჯერად სამუშაოები 2018 წლის 3 დეკემბერს დაიწყო და 2020 წლის 3 დეკემბერს უნდა დასრულებულიყო, თუმცა დეპარტამენტმა კონტრაქტორის მხრიდან ხელშეკრულებით ნაკისრი ვალდებულებების შეუსრულებლობის გამო, 2021 წლის 3 აგვისტოს შეწყვიტა ხელშეკრულება.

პირველი ლოტის მშენებლობის დასრულების მიზნით დეპარტამენტს მესამე კონტრაქტორთან (“შპს ჯეუ გრუპი”) მოუწია ხელშეკრულების გაფორმება. კომპანიამ სამშენებლო სამუშაოები 2021 წლის 22 ნოემბერს დაიწყო და 2022 წლის 25 აგვისტოს უნდა დაესრულებინა. თუმცა როგორც გზების დეპარტამენტი აღნიშნავს, სამშენებლო სამუშაოების მიმდიანრეობისას გამოვლენილი დამატებით შესასრულებელი სამუშაოებიდან გამომდინარე მშენებლობის ვადა გაგრძელდა 2022 წლის 15 ნოემბრის ჩათვლით.

რაც შეეხება მე-3 ლოტს კონტრაქტორმა კომპანიამ („Todini Costruzioni Generali S.p.A.“) სამუშაოები 2017 წლის 12 ივნისს დაიწყო და 2019 წლის 12 ივლისს უნდა დაესრულებინა. დეპარტამენტმა კონტრაქტორის მხრიდან ხელშეკრულებით ნაკისრი ვალდებულებების შეუსრულებლობის გამო ხელშეკრულება 2019 წლის 4 მარტს შეწყვიტა.ამჟამად კი ტენდერში გამარჯვებულ კომპანიასთან ხელშეკრულების გაფორმებისთვის საჭირო პროცედურები მიმდიანრეობს.

მეოთხე ლოტის მშენებლობის 2015 წლის 24 მაისს დაიწყო და 2017 წლის 24 მაისს უნდა დასრულებულიყო, თუმცა ამჟამად დასრულების ვადად 2022 წლის ბოლოა მითითებული.

ფოტო-საავტომობილო გზების დეპარტამენტი. სამტრედია-გრიგოლეთის გზის მშენებლობა.

: საზოგადოება; 03 ოქტომბერი 2022; გადასვლები: 1590

ბაღდათის მუნიციპალიტეტში საგზაო ინფრასტრუქტურული პროექტები მიმდინარეობს

ქალაქ ბაღდათში, თბილისის ქუჩის რეაბილიტაცია დასასრულს უახლოვდება. აღნიშნული ქუჩის ჩიხებში ასფალტის საფარი დაიგო. ამ ეტაპზე სანიღვრეების მოწყობა მიმდინარეობს. სამუშაოებს ტენდერში გამარჯვებული სამშენებლო კომპანია შ.პ.ს."მეკა"ასრულებს.

საავტომობილო გზის სარეაბილიტაციო სამუშაოები მიმდინარეობს სოფელ ფერსათში,

ე .წ თავხელიძეების ბოგირიდან პირველ საჯარო სკოლამდე მისასვლელ გზაზე. სამუშაოებს სამშენებლო კომპანია "გი-ან11" ასრულებს.

ორივე საგზაო პროექტი რეგიონებში განსახორციელებელი პროექტების ფონდიდან ფინანსდება.

მიმდინარე სამუშაოების მონიტორინგს ბაღდათის მუნიციპალიტეტის მერი კახა ენუქიძე, მერიისა და საკრებულოს წარმომადგენლებთან ერთად პერმანენტულად ახორციელებს და სამუშაო პროცესს ეცნობა.

: საზოგადოება; 03 ოქტომბერი 2022; გადასვლები: 1750

ქუთაისელი ნუგზარ კოხრეიძის კანდიდატურას სახალხო დამცველის პოსტზე მხარს 40 რეგიონული არასამთავრობო ორგანიზაცია უჭერს

სამეცნიერო - ინტელექტუალური კლუბი "თაობათა დიალოგის" თანადამფუძნებელს ნუგზარ კოხრეიძეს საქართველოს სახალხო დამცველის არჩევის კონკურსში ღია მხარდაჭერას უკვე 40-მდე რეგიონული არასამთავრობო ორგანიზაცია უცხადებს. ამის შესახებ კოხრეიძემ დღეს გამართულ ბრიფინგზე ისაუბრა.

მხარდამჭერი ორგანიზაციები მოუწოდებენ საქართველოს პარლამენტში შემავალ ყველა პოლიტიკურ სუბიექტს, კოხრეიძე განიხილონ, როგორც საქართველოს სახალხო დამცველის პოტენციური კანდიდატი.

ბრიფინგზე ნუგზარ კოხრეიძემ აღნიშნა, რომ სახალხო დამცველის პოზიციის დაკავების შემთხვევაში მისი სურვილია ომბუდსმენის მთავარი ოფისი ქუთაისში იყოს.

"მადლობა მინდა ვუთხრა ყველა ორგანიზაციას, რომელმაც ჩემ მიმართ მხარდაჭერა გამოხატა. ვფიქრობ, მნიშვნელოვანია, რომ რეგიონული არასამთავრობო ორგანიზაციები აქტიურად არიან ჩართული ამ პროცესში. ჩემი ერთ-ერთი ამოცანაც სწორედ ეს არის. ვფიქრობ, ასეთი აქტურობა და ჩართულობა ინსტიტუციურ დონეზეც შეიძლება გაგრძელდეს .თუ მხარდაჭერა ექნება ჩემ სურვილს ,ქვეყნის ეს მნიშვნელოვანი სტრუქტურა თავის მთავარ ოფისს ქუთაისში დაიდებს. მიმაჩნია, ეს იქნება შესაძლებლობა დასავლეთ საქართველოსთვის და განსაკუთრებით გააძლიერებს ადამიანის უფლებათა დაცვის ორგანიზაციებს რეგიონებში. რა თქმა უნდა, წარმატებებს ვუსურვებ ყველა კანდიდატს და ჩვენს ქვეყანას ,რადგან ეს მნიშვნელოვანი პროცესია 12 პუნქტის აღსრულების მიმართულებით"-განაცხადა ნუგზარ კოხრეიძემ.

ნუგზარ კოხრეიძეს ადგილობრივ და საერთაშორისო ორგანიზაციებში მუშაობის 25 წლიანი გამოცდილება აქვს.

ის 2007-2018 წლებში მუშაობდა გაეროს მიგრაციის სააგენტოში (მიგრაციის საერთაშორისო ორგანიზაცია) ქუთაისის ოფისის საველე კოორდინატორად;

2018 წლიდან თანამშრომლობს გერმანულ არასამთავრობო ორგანიზაციასთან “ბერგჰოფის ფონდი”, რომელიც საქართველოში ქართულ-აფხაზურ და ქართულ-სამხრეთ ოსურ სამშვიდობო დიალოგის საკითხებზე მუშაობს; 2021 წლიდან არის აღმოსავლეთ პარტნიორობის სამოქალაქო საზოგადოების ფორუმის საქართველოს ეროვნული პლატფორმის თავმჯდომარის მოადგილე და მესამე სამუშაო ჯგუფის თანაკოორდინატორი;

2022 წლიდან აღმოსავლეთ ევროპის, კავკასიისა და ცენტრალური აზიის რეგიონში კლიმატის მოქმედებათა ქსელის (Climate Action Network - CAN) საბჭოს წევრი.

დღის სიახლეები

საზოგადოება

Search