განათლება

: განათლება; 09 ივნისი 2022; გადასვლები: 1036

ქუთაისის მერი საჯარო სკოლების დირექტორებს შეხვდა

ქუთაისის მერი იოსებ ხახალეიშვილი ქალაქის საჯარო სკოლების დირექტორებს შეხვდა. შეხვედრას, ქალაქის მერთან ერთად, ქუთაისის განათლების რესურსცენტრის ხელმძღვანელი მაია ცქიტიშვილი უძღვებოდა.

შეხვედრაზე ისაუბრეს სასწავლო დაწესებულებების ინფრასტრუქტურასა და იმ გამოწვევებზე, რაც ამ ეტაპზე აქვთ.

ქუთაისის მერია, განათლების სამინისტროსთან ერთად, აპირებს გარკვეული სახის სამუშაოები ჩაატაროს სკოლებში, სადაც გადაუდებელი ჩარევაა საჭირო.

„ დღეს ქუთაისის საჯარო სკოლების დირექტორებს შევხვდი. სასწავლო წელი დასასრულს უახლოვდება და უკვე უნდა დავიწყოთ მზადება ახალი სასწავლო წლისთვის.

დირექტორებთან და პედაგოგებთან შეხვედრაზე ვისაუბრეთ ჩვენი სკოლების ინფრასტრუქტურაზე.

მივიღეთ გადაწყვეტილება, რომ შევქმნათ მონაცემთა ერთიანი ბაზა და სამინისტროსთან ერთად, სწრაფად და ეფექტურად ვიმოქმედოთ საჯარო სკოლების ინფრასტრუქტურის კიდევ უფრო გასაუმჯობესებლად.“- განაცხადა იოსებ ხახალეიშვილმა.

ამ დრომდე ქუთაისში, მილენიუმის პროგრამით , 2017-2019 წლებში სრულად გარემონტდა 7 სკოლა. 2020-2022 წლებში , მუნიციპალური განვითარების ფონდის მიერ, ასევე სრული რეაბილიტაცია ჩაუტარდა კიდევ 5 სკოლას . წელს სრული რეაბილიტაცია ჩაუტარდება 3 სკოლას.

ადგილობრივი თვითმმართველობის ჩართულობით გარემონტდა სველი წერტილები და მოგვარდა სხვადასხვა ინფრასტრუქტურული საკითხი.

: განათლება; 07 ივნისი 2022; გადასვლები: 1403

ერთიანი ეროვნული გამოცდები 4 ივლისს დაიწყება

2022 წლის ერთიანი ეროვნული გამოცდები 4 ივლისს ქართული ენისა და ლიტერატურის გამოცდით დაიწყება და 22 ივლისს სამოქალაქო განათლების გამოცდით დასრულდება.

განათლების და მეცნიერების მინისტრის მოადგილის, ნუნუ მიცკევიჩის თქმით, გამოცდებზე წელს არ იქნება პირბადის ტარების აუცილებლობა. ამასთან, მინისტრის მოადგილის განმარტებით, იმ შემთხვევაში, თუ აბიტურიენტს კოვიდი დადასტურდება, მათთვის დამატებითი სესია დაინიშნება და ისინი საგამოცდო პროცესს არ ჩამოშორდებიან.

სტუდენტთა საგრანტო კონკურსში მონაწილეობის მსურველები გამოცდის ჩაბარებას 6 ივლისს შეძლებენ.

6 ივლისიდანვე ჩაერთვებიან საგამოცდო პროცესში მასწავლებლები - მასწავლებლის საგნისა და პროფესიული უნარების გამოცდებზე დარეგისტრირებულთათვის გამოცდები 25 ივლისის ჩათვლით გაგრძელდება.

მაგისტრობის კანდიდატებისთვის გამოცდა კი 26-27 ივლისსაა დანიშნული.

ერთიანი ეროვნული გამოცდებისათვის დარეგისტრირდა 41 000-ზე მეტი აბიტურიენტი;

სტუდენტთა საგრანტო კონკურსისათვის დარეგისტრირდა 2 500-ზე მეტი სტუდენტი;

საერთო სამაგისტრო გამოცდისათვის დარეგისტრირდა 9 500-ზე მეტი მაგისტრანტობის მსურველი;

მასწავლებლის საგნისა და პროფესიული უნარების გამოცდების ჩასაბარებლად დარეგისტრირდა სულ 34 500-ზე მეტი მსურველი (საგნის გამოცდა 19 500-მდე მსურველმა აირჩია, 2 500-ზე მეტმა - უფროსი სპეციალური მასწავლებლის გამოცდა, ხოლო 12 500-ზე მეტმა - წამყვანი და მენტორი მასწავლებლის გამოცდა).

ფოტო არქივიდან

: განათლება; 25 მაისი 2022; გადასვლები: 1317

ქუთაისში ფიზიკის საზაფხულო სკოლა მოეწყობა

ქუთაისში ფიზიკის საზაფხულო სკოლა ევროკავშირის დაფინანსებით , ქუთაისის საერთაშორისო უნივერსიტეტის ბაზაზე მოეწყობა. საზაფხულო სკოლაში წამყვანი ფიზიკოსები მთელი მსოფლიოდან მოიყრიან თავს,მათ შორის 100-მდე მეცნიერი და მაღალი კლასის ლექტორი.

საკითხთან დაკავშირებით ქუთაისის მერიაში შეხვედრა გაიმართა.

ქუთაისის მერი იოსებ ხახალეიშვილი და ვიცე-მერი დავით ერემეიშვილი GSI Helmholtzzentrum ( ჰელმჰოლცცენტრი)-ის წარმომადგენლებს შეხვდნენ.

შეხვედრას ესწრებოდნენ კრისტიან შმიდტი, ჰელმჰოლცცენტრის დეტექტორების ლაბორატორიის დირექტორი, ლაბორატორიის წამყვანი მეცნიერი ირაკლი ქეშელაშვილი და ფონდი "ქართუს" პროექტების დირექტორი ვახტანგ ცაგარელი.

შეხვედრაზე ასევე ქსუ-ში დეტექტორული ლაბორატორიის მოწყობაზე ისაუბრეს, რომელსაც GSI Helmholtzzentrum ევროკავშირის დაფინანსებით უზრუნველყოფს.

: განათლება; 23 მაისი 2022; გადასვლები: 1288

ხვალ პირველკლასელთა საყოველთაო ელექტრონული რეგისტრაცია იწყება

საქართველოს განათლებისა და მეცნიერების სამინისტრო 24 მაისს, დილის 09:00 საათიდან საქართველოს ზოგადსაგანმანათლებლო დაწესებულებებში პირველკლასელთა საყოველთაო ელექტრონულ რეგისტრაციას იწყებს, რომელიც 15 ივნისს დღის ბოლოს დასრულდება.

რეგისტრაციას ბავშვის მშობელი ან მისი კანონიერი წარმომადგენელი განათლების მართვის საინფორმაციო სისტემის ოფიციალური ვებგვერდის – https://registration.emis.ge – მეშვეობით ელექტრონული ფორმით უზრუნველყოფს.

ბავშვის რეგისტრაციისთვის აუცილებელი დოკუმენტაციის წარდგენა სკოლებში 2022 წლის 16 ივნისიდან 30 ივნისის ჩათვლით განხორციელდება. დადგენილ ვადებში დოკუმენტაციის წარუდგენლობის შემთხვევაში რეგისტრაცია ავტომატურად გაუქმდება.

საქართველოს ზოგადსაგანმანათლებლო დაწესებულებაში მოსწავლის პირველ კლასში ჩასარიცხად წარსადგენი აუცილებელი დოკუმენტების ნუსხა:

მოსწავლის კანონიერი წარმომადგენლის განცხადება, რომელიც უნდა შეიცავდეს კანონიერი წარმომადგენლის საცხოვრებელი ადგილისა და ტელეფონის ნომრის თაობაზე ინფორმაციას;

მოსწავლის დაბადების მოწმობის ან პირადობის დამადასტურებელი დოკუმენტის ასლი ან საქართველოში ბინადრობის დამადასტურებელი დოკუმენტის ასლი (ასეთის არსებობის შემთხვევაში);

კანონიერი წარმომადგენლის პირადობის დამადასტურებელი მოწმობის ასლი ან საქართველოში ბინადრობის დამადასტურებელი დოკუმენტის ასლი (ასეთის არსებობის შემთხვევაში).

დოკუმენტების უცხოურ ენაზე წარდგენის შემთხვევაში, მათ უნდა დაერთოს საქართველოს კანონმდებლობით დადგენილი წესით შესრულებული თარგმანი ქართულ ენაზე.

შეგახსენებთ, რომ „ზოგადი განათლების შესახებ კანონში“ შესული ცვლილების გათვალისწინებით, 2022-2023 სასწავლო წელს პირველ კლასში განხორციელდება იმ ბავშვების ჩარიცხვაც, რომელთაც 6 წელი 1-ელ ოქტომბრამდე უსრულდებათ. აღნიშნული გადაწყვეტილება საქართველოს განათლებისა და მეცნიერების სამინისტროსა და პარლამენტის განათლებისა და მეცნიერების კომიტეტის ერთობლივი გადაწყვეტილებით, მოქალაქეთა თხოვნის საფუძველზე იქნა მიღებული.

III ეტაპის – საყოველთაო ელექტრონული რეგისტრაციის დასრულების შემდეგ, 4 ივლისიდან 12 ივლისის ჩათვლით სკოლებში რეგისტრაციის IV ეტაპი დაიწყება. ამ ეტაპზე გამოთავისუფლებულ ვაკანტურ ან დარჩენილ თავისუფალ ადგილებზე მოხდება იმ მოსწავლეების რეგისტრაცია, რომლებიც ვერ დარეგისტრირდნენ I, II და III ეტაპებზე, ან რეგისტრაციის შეცვლა სურთ.

საქართველოს განათლებისა და მეცნიერების სამინისტრო მშობლებს მოუწოდებს, ყურადღებით გაეცნონ რეგისტრაციის ვადებს და პირობებს, რათა ბავშვის სკოლაში შეყვანა დროულად და შეუფერხებლად შეძლონ.

: განათლება; 19 მაისი 2022; გადასვლები: 1180

სკოლებში ჭადრაკის სწავლება სავალდებულო ხდება

საქართველოს განათლებისა და მეცნიერების მინისტრის, მიხეილ ჩხენკელის გადაწყვეტილებით, მოსწავლეები ჭადრაკს პირველი კლასიდან სავალდებულო საგნად შეისწავლიან.

მოსწავლეებში ანალიტიკური, ლოგიკური, კრიტიკული აზროვნებისა და პრობლემების პრაქტიკული გადაჭრის უნარ-ჩვევების განვითარების მიზნით, ჭადრაკი ზოგადი განათლების დაწყებითი საფეხურის პირველ კლასში სავალდებულო საგნად ემატება.

სავალდებულო საგნად ჭადრაკის შესწავლა 2022-2023 წლის სექტემბრიდან იგეგმება, მანამდე კი ჭადრაკის ეროვნულ ფედერაციასთან თანამშრომლობით აქტიურად მიმდინარეობს მოსამზადებელი სამუშაოები, მასწავლებლების ტრენინგების ორგანიზებისა და სასწავლო რესურსების მომზადების კუთხით.

ჭადრაკი აუმჯობესებს მოსწავლეთა მრავალმხრივ უნარებს, როგორებიცაა: ყურადღება, კონცენტრირება, მეხსიერება, ანალიზი, ლოგიკა, გადაწყვეტილების მიღება, სივრცეში ორიენტირება და სხვა. ეს კი, პირდაპირ კავშირშია მათემატიკისა და სხვა საგნების სტანდარტებით განსაზღვრულ კომპეტენციებთან.

აღსანიშნავია, რომ სკოლებში ჭადრაკის სწავლება გათვალისწინებულია ევროკავშირის 2012 წლის დეკლარაციით, რომელიც საგანმანათლებლო სისტემებში ჭადრაკის სწავლების დანერგვას ითვალისწინებს.

: განათლება; 06 აპრილი 2022; გადასვლები: 1641

სოფელ გეგუთში ახალი სკოლის მშენებლობა დასრულდა

საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდმა, სკოლების მშენებლობისა და რეაბილიტაციის პროგრამის ფარგლებში, წყალტუბოს მუნიციპალიტეტის სოფელ გეგუთში ახალი სკოლის სამშენებლო სამუშაოები დაასრულა.

ახალაშენებული სკოლა ადგილზე იმერეთში სახელმწიფო რწმუნებულმა ზვიად შალამბერიძემ, მუნიციპალური განვითარების ფონდის აღმასრულებელი დირექტორის პირველმა მოადგილე გიორგი ციბაძემ და საქართველოს განათლებისა და მეცნიერების მინისტრის მოადგილე ვალერიან გობრონიძემ, ადგილობრივი ხელისუფლების წარმომადგენლებთან ერთად, დაათვალიერეს.

,,საგანმანათლებლო ინფრასტრუქტურა ჩვენი ხელისუფლებისთვის ყოველთვის იყო და მომავალშიც იქნება პრიორიტეტი. მიმდინარე წელს იმერეთის მასშტაბით 3 ახალი სკოლის მშენებლობა გვაქვს დაწყებული და 13 სკოლის რეაბილიტაცია მიმდინარეობს, ჯამში საერთო ღირებულება არის 43 000 000 ლარამდე. სამშენებლო-სარეაბილიტაციო სამუშაოები წლის ბოლომდე დასრულდება და რამდენიმე თვეში ჩვენს მომავალ თაობას ექნება საშუალება სრულად განახლებულ სკოლებში გააგრძელონ სასწავლო პროცესი“ - ზვიად შალამბერიძე.

სოფელ გეგუთის 240 მოსწავლეზე გათვლილი №1 საჯარო სკოლა თანამედროვე სტანდარტების შესაბამისად აშენდა. საკლასო ოთახების გარდა, კეთილმოეწყო სკოლის ეზოც, დამონტაჟდა გათბობის, წყალსადენის და კანალიზაციის სისტემები. სკოლები სრულად ადაპტირებულია განსაკუთრებული საჭიროების მქონე მოსწავლეებისათვის.

240-მდე მოსწავლე უკვე გამართული სასკოლო ინფრასტრუქტურის პირობებში და კეთილმოწყობილ გარემოში შეძლებს განათლების მიღებას.

ახალი სკოლის მშენებლობა საქართველოს მთავრობის მიერ დაფინანსდა. სამშენებლო სამუშაოები 2019 წლის ივლისში დაიწყო.

საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდის მიერ, საგანმანათლებლო ინფრასტრუქტურის მშენებლობისა და რეაბილიტაციის პროგრამის ფარგლებში, 67 სკოლის მშენებლობა, 100 სკოლის რეაბილიტაცია და ენერგო-ეფექტური კომპონენტის გაძლიერება მიმდინარეობს. საგანმანათლებლო პროგრამას საქართველოს მთავრობა და დონორები (CEB და NEFCO) აფინანსებენ. პროგრამის საერთო ღირებულება 300 მილიონ ლარზე მეტია.

მუნიციპალური განვითარების ფონდი საგანმანათლებლო ინფრასტრუქტურის მშენებლობისა და რეაბილიტაციის პროგრამაში 2019 წელს ჩაერთო.

დღის სიახლეები

განათლება

Search