დღეისათვის ეროვნული უმცირესობების წარმომადგნელები საქართველოს მოსახლეობის 13 პროცენტზე მეტს შეადგენენ. მათი საზოგადოებრივ თუ პოლიტიკურ ცხოვრებაში ინტეგრაცია, განათლების მიღებისა და პროფესიული განვითარებისთვის თანაბარი შესაძლებლობების შექმნა სახელმწიფო სტრატეგიის ნაწილია. თუმცა სახელმწიფო ენის არცოდნა ერთ-ერთი მთავარი ბარიერია ამ გზაზე. ქართული ენის შესწავლა და ხარისხიან განათლებაზე ხელმისაწვდომობა პოზიტიური ცვლილებების მისაღწევად შემუშავებული სახელმწიფო პოლიტიკის ნაწილია. ზურაბ ჟვანიას სახელობის სახელმწიფო ადმინისტრირების სკოლა სწორედ ამ მიმართულებით არსებულ გამოწვევებზე მუშაობს და სახელმწიფო ენის სწავლებისა და ინტეგრაციის პროგრამის ფარგლებში ახორციელებს 22 პროგრამას, რომლებიც სრულად ფინანსდება სახელმწიფოს მიერ. მათი ნაწილი ზოგადი ენობრივი კომპეტენცების შეძენაზე ორიენტირებული პროგრამებია, ნაწილი კი- სხვადასხვა პროფესიული მიმართულების კურსი. კურსის შემუშავება ბენეფიციარების იმ ინტერესების გათვალისწინებით ხდება, რომლებიც სკოლის მიერ წინასწარ ჩატარებული კვლევების საფუძველზე იკვეთება. რაც შეეხება ენის ზოგად კურსს, როგორც სკოლის ხელმძღვანელი ქეთევან ჯაყელი აღნიშნავს, მას ბენეფიციარებს ინტეგრაციის კომპონენტთან ერთად სთავაზობენ.
„სასწავლო პროცესს იმ საჭიროებებზე დაყრდნობით ვაგებთ, რომლებიც კვლევების შედეგად ვლინდება. სწორედ ასეთმა მიგნებებმა გვიბიძგა პროფესიული კურსების შემუშავებისკენ. მაგალითად, ჩვენ გვაქვს სახელმწიფო ენის პროგრამა იურისტებისთვის, მენეჯერებისთვის, სამედიცინო სფეროში დასაქმებულთათვის, აგრონომიით, მშენებლობით, ელექტრობით დაინტერესებულთათვის, ამ დროისთვის სულ 16 პროფესიული მიმართულებით,“- განაცხადა ქეთევან ჯაყელმა.
ჟვანიას სახელობის სახელმწიფო ადმინისტრირების სკოლის სერვისები განკუთვნილია ნებისმიერი მოქალაქისთვის 16 წლის ასაკიდან და მორგებულია სხვადასხვა მიზნობრივი ჯგუფების საჭიროებებზე, მაგალითად, სკოლის ბენეფიციარები არიან რეკრუტები, რელიგიის მსახურები, ბაღის აღმზრდელები, პედაგოგები და ა.შ. როგორც ქეთევან ჯაყელი განმარტავს, ჟვანიას სკოლაში ხშირად გადიან გადამზადებას უწყებრივი დაკვეთის საფუძველზე და რეფორმების პარალელურად დარგობრივი პროგრამები განსაკუთრებით აქტუალური ხდება
„ხშირად კურატორი უწყებები გვიკვეთავენ კონკრეტული მიზნობრივი ჯგუფისთვის სახელმწიფო ენის სწავლის მიმართულებით დახმარების გაწევას. მაგალითად, განათლებისა და მეცნიერების სამინისტროს დაკვეთით 1200 მასწავლებელი გახდა ჩვენი ბენეფიციარი, რაც ჟვანიას სკოლის სერტიფიკატის მიმართ მაღალ სანდოობაზე მეტყველებს. ასევე, თავდაცვის სამინისტროს მოთხოვნით უკვე მესამე წელია რეკრუტებს ვასწავლით სახელმწიფო ენას. ამ დროის განმავლობაში სახელმწიფო ენის სწავლებისა და ინტეგრაციის პროგრამით ისარგებლა 1290-მა რეკრუტმა სხვადასხვა სამხედრო ბაზიდან. ასევე, ჩვენი ბენეფიციარია სხვადასხვა რელიგიის 86 მსახური. პროგრამის სამიზნე შეიძლება გახდეს ყველა ის პროფესიული ჯგუფი, რომლებშიც რეფორმები იგეგმება ან მიმდინარეობს. მაგალითად, სკოლამდელი განათლების რეფორმა წელს აქტიურ ფაზაში შედის და იმისთვის, რომ თანაბარ პირობებში იყვნენ სკოლამდელი დაწესებულებების ეროვნული უმცირესობების წარმომადგენელი თანამშრომლები, მათაც ვთავაზობთ ჩვენს მომსახურებას. ჟვანიას სკოლის პროგრამები საკმაოდ დიდი პოპულარობით სარგებლობდა მუნიციპალიტეტების სკოლამდელ დაწესებულებებში და რეფორმის დაწყებისთანავე მომართვიანობა კიდევ უფრო ინტენსიური ხდება. ასევე, საგრძნობლად გაიზარდა სახელმწიფო ენის შესწავლის მსურველთა რაოდენობა თვითმმართველობის ორგანოებში დასაქმებულ ეროვნული უმცირესობების მხრიდან, რაც დაკავშირებულია დეცენტრალიზაციის რეფორმასთან,“- განაცხადა ქეთევან ჯაყელმა.
ეროვნული უმცირესობების წარმომადგენელ კურსდამთავრებულთა შედეგებს რაც შეეხება, როგორც ქეთევან ჯაყელი აღნიშნავს, სკოლა მუდმივად ცდილობს მათთან უკუკავშირის საშუალებით მიიღოს ინფორმაცია, რამდენად დაეხმარა მათ კურსი დასახული მიზნის მიღწევაში. ქეთევან ჯაყელის თქმით, განსაკუთრებით კარგი შედეგები აქვთ ახალგაზრდებს, რომლებმაც კურსი უმაღლეს სასწავლებლებში განათლების გაგრძელების მიზნით გაიარეს.
„არის შემთხვევები, როცა ეროვნული უმცირესობების წარმომადგენლები ენობრივი ბარიერის გამო ვერ ძლევენ დარგობრივ მიმართულებას და უხდებათ სწავლის პროცესის მიტოვება, ასეთი ფაქტი არ დაფიქსირებულა ჟვანიას სკოლის კურსდამთავრებულებში. ჩვენი სკოლის აბსოლუტურად ყველა კურსდამთავრებული აგრძელებს სწავლას ძალიან წარმატებულად და საუკეთესო შედეგებით. ჩვენ მუდმივ რეჟიმში ვიკვლევთ, რა შედეგი გამოიღო ჩვენთან ენის სწავლამ, მეტსაც გეტყვით, იმდენად ხშირია უკუკავშირი ჩვენს კურსდამთავრებულებთან, რომ წლის ბოლოს ვგეგმავთ კურსდამთავრებულთა ქსელის შექმნას, ისინი თავად ჩაერთვებიან სახელმწიფო ენის პოპულარიზაციის პროცესში და აუხსნიან თანატოლებს, თანასოფლელებს, მეგობრებს, რამდენად მნიშვნელოვანია სახელმწიფო ენის სწავლა საზოგადოებაში ინტეგრაციისთვის,“- აღნიშნავს ჯაყელი.
ამ ეტაპზე ჟვანიას სახელობის სახელმწიფო ადმინისტრირების სკოლაში სახელმწიფო ენის სწავლებისა და ინტეგრაციის პროგრამაში 182 ჯგუფია ჩართული. უნდა აღინიშნოს, რომ ელექტრონული სწავლება ჟვანიას სკოლისთვის პანდემიით მოტანილი სიახლე არ ყოფილა. ამ ფორმატში სწავლება მომავალში, პანდემიის დასრულების შემდეგაც გაგრძელდება.
„ბენეფიციარებისთვის ელექტრონული სწავლების შეთავაზება დღის წესრიგში იყო ჯერ კიდევ პანდემიამდე, 2018- 2019 წელსაც და კონკრეტული სამუშაოებიც გატარდა ამ მიმართულებით, მოვახდინეთ სასწავლო მასალების გაციფრულება და ა.შ. ჩვენთვის ეს ახალი არ იყო, უბრალოდ, პანდემიამ დაგვიჩქარა ეს პროცესები და 2020 წლის მარტში დავიწყეთ ელექტრონული სწავლება. 2 კვირის განმავლობაში სასწავლო პროცესში 800 მეტი მსმენელის ჩართვა მოვახერხეთ, რაც ძალიან რთული და შრომატევადი პროცესი იყო. თუმცა, ჩვენმა გუნდმა ეს შეძლო. ჩვენ მომავალშიც ვაპირებთ ელექტრონული სწავლების შენარჩუნებას, რადგან ენის სწავლება მორგებადია როგორც საკლასო, ასევე ელექტრონულ სწავლებაზე. ამიტომ ვგეგმავთ როგორც რეალურ სივრცეში სწავლება, ასევე ელექტრონული და ჰიბრიდული კურსები შევთავაზოთ ბენეფიციარებს,“- აღნიშნავს ქეთევან ჯაყელი.
ამჟამად ზურაბ ჟვანიას სახელობის სახელმწიფო ადმინისტრირების სკოლა ქვეყნის მასშტაბით თბილისისა და 3 რეგიონის- ქვემო ქართლის, სამცხე -ჯავახეთისა და კახეთის 12 სასწავლო ცენტრში ახორციელებს საქმიანობას. ონლაინ სწავლებამ გეოგრაფიული არეალის მოცვის პრობლემა ქვეყნის მასშტაბით არა თუ მოხსნა, არამედ, უფრო მეტიც, სკოლა გასცდა საზღვრებს და ახლა სკოლის პროგრამებით უკვე ემიგრანტებიც სარგებლობენ.