ქუთაისის მელიტონ ბალანჩივაძის სახელობის ოპერისა და ბალეტის პროფესიული სახელმწიფო თეატრი 58-ე სეზონს ზაქარია ფალიაშვილის ოპერით ,,აბესალომ და ეთერი,, გახსნის.
სეზონის გახსნაზე მაყურებელი სამმოქმედებიან თეატრალიზებულ წარმოდგენას იხილავს, რომელშიც თეატრის სოლისტები, გუნდი, ორკესტრი და ქორეოგრაფიული დასი მონაწილეობს.
აბესალომის პარტიას მოწვეული სოლისტი,საქართველოს სახალხო არტისტი თეიმურაზ გუგუშვილი შეასრულებს. ეთერისა და მურმანის პარტიებს კი ქუთაისის ოპერის თეატრის სოლისტები -თამარ ლებანიძე და ბაკურ კვირიკაშვილი იმღერებენ.
ზაქარია ფალიაშვილის „აბესალომ და ეთერი“ ქართული საოპერო ხელოვნების ერთ-ერთი გამორჩეული ნაწარმოებია, რომელიც სიყვარულის, ერთგულების, ღალატისა და ადამიანური ტრაგედიის მარადიულ თემებს ასახავს.
თეატრალიზებული წარმოდგენა 16 ოქტომბერს, 19:00 საათზე, ქუთაისის ლადო მესხიშვილის სახელობის პროფესიულ სახელმწიფო დრამატულ თეატრში გაიმართება.
შეგახსენებთ, ოპერის თეატრის სარეაბილიტაციო სამუშაოები ამ დრომდე არ დასრულებულა.
ბაღდათის მუნიციპალიტეტის მერმა ნოდარ გიორგიძემ, მოადგილეებთან და საკრებულოს თავმჯდომარე გურამ კიკნაველიძესთან ერთად, 80 წლის იუბილე მიულოცა ბაღდათის სახალხო თეატრის დამსახურებულ მსახიობს ეთერ დევაძეს.
როგორც მერმა აღნიშნა, ეთერ დევაძის წვლილი დიდია ბაღდათის თეატრის განვითარებაში. ნოდარ გიორგიძემ მსახიობს მადლობა გადაუხადა.
"ქალბატონო ეთერ გილოცავთ 80 წლის იუბილეს, გისურვებთ ჯანმრთელობას და დღეგრძელობას. თითქმის ნახევარ საუკუნეზე მეტია დგახართ სცენაზე და ქმნით საინტერესო როლებს. თქვენ ხართ ბაღდათის სახალხო თეატრის ცოცხალი მემატიანე, თქვენი ღვაწლი დიდია ჩვენი თეატრის განვითარებაში, სწორედ ამის დასტურია ის რეგალიები რასაც ღირსეულად ატარებთ დღემდე, მომავალში ველოდებით თქვენგან არაერთ საინტერესო როლს, როგორც გჩვევიათ გამორჩეული არტისტიზმით და ნიჭიერებით", - განაცხადა ბაღდათის მერმა ნოდარ გიორგიძემ.
ეთერ დევაძე ბაღდათის სახალხო თეატრიში 56 წელი მოღვაწეობს და მას 90 როლი აქვს შესრულებული. არის ღირსების ორდენის კავალერი, ბაღდათის საპატიო მოქალაქე და არაერთი თეატრალური ფესტივალის ლაურეატი.