მართლმადიდებელი ეკლესია დღეს გიორგობის დღესასწაულს აღნიშნავს. ამასთან დაკავშირებით ტაძრებში წირვა-ლოცვა სრულდება.
წმინდა საკვირველთმოქმედი და ძლევაშემოსილი გიორგი ქართველი ერის მფარველად მიიჩნევა და საქართველოში განსაკუთრებულად უყვართ.
წმინდანი მესამე საუკუნის მეორე ნახევარში, კაბადოკიაში, მდიდარ ქრისტიანულ ოჯახში დაიბადა. მოგვიანებით, წმინდა გიორგი რომის იმპერატორ დიოკლიტიანეს მმართველობის დროს მხედართმთავარი გახდა. ქრისტიანებზე დევნის დაწყების შემდეგ იგი იმპერატორს განუდგა.
კერპთაყვანისმცემელმა რომის იმპერატორმა წმინდა გიორგის ქრისტეს უარყოფა მოსთხოვა. უფლის შეწევნით მან მრავალი სატანჯველი დაითმინა, მათ შორის - ბორბალზე გაკვრა. მისი თხოვნით უფალმა მიცვალებული მკვდრეთით აღადგინა. წმინდანს 303 წელს თავი მოკვეთეს. წმიდა გიორგი 30 წლის ასაკში ეწამა. იგი ეკლესიის ისტორიაში შევიდა, როგორც ძლევაშემოსილი და უძლეველი ზეციური მხედარი.
მართლმადიდებელი ეკლესია წმინდა გიორგის ხსენებას ორჯერ დღესასწაულობს: 6 მაისს - წმიდანის აღსრულების დღეს და 23 ნოემბერს - მისი ბორბალზე წამების დღეს. ამ უკანასკნელ დღესასწაულს ქართული ეწოდება, რადგან სხვა ეკლესიებში საქართველოდან გადავიდა.
23 ნოემბერი საქართველოში უქმე დღედ არის გამოცხადებული.
15 ნოემბერს, ჭიათურაში, საზეიმო გალა-კონცერტით დავით გამრეკელის სახელობის საერთაშორისო საოპერო ფესტივალი დაფუძნდება.
პროექტი „ოპერა შენს ქალაქში“ კიდევ ერთ მნიშვნელოვან კულტურულ ინიციატივას წარადგენს, რომლის მიზანი საოპერო ხელოვნების პოპულარიზაცია და რეგიონებში მისი ხელმისაწვდომობის გაზრდაა.
ფესტივალი სახელოვანი ქართველი ბარიტონის, დავით გამრეკელის სახელს ატარებს.
დავით გამრეკელი ჭიათურაში დაიბადა.მან საოპერო ხელოვნების განვითარებაში მნიშვნელოვანი წვლილი შეიტანა.
ფესტივალის იდეის ავტორი და ინიციატორია თბილისის ზაქარია ფალიაშვილის სახელობის ოპერისა და ბალეტის პროფესიული სახელმწიფო თეატრის სოლისტი, ამავე თეატრთან არსებული ანსამბლ „სულიკოს“ წევრი - ვანო გალუაშვილი.
ფესტივალის დაფუძნების აღსანიშნავად საზეიმო გალა-კონცერტი 15 ნოემბერს, 18:00 საათზე, ჭიათურის კულტურის ცენტრის დარბაზში გაიმართება.
გალა-კონცერტში მონაწილეობას მიიღებენ თბილისის და ქუთაისის ოპერის თეატრების სოლისტები და მოწვეული სოლისტები.
საღამოში ასევე მონაწილეობენ:
ქუთაისის მელიტონ ბალანჩივაძის სახელობის ოპერისა და ბალეტის პროფესიული სახელმწიფო თეატრის ორკესტრი;
ქუთაისის იოსებ კეჭაყმაძის სახელობის აკადემიური კამერული გუნდი - ხელმძღვანელი და დირიჟორი ირინე ლომინაძე.
გალა-კონცერტის დირიჟორია რევაზ ჯავახიშვილი.
ფესტივალის დაფუძნება განხორციელდა შემოქმედებითი საქართველოსა და საქართველოს კულტურის სამინისტროს მხარდაჭერით, ასევე ჭიათურის მუნიციპალიტეტის მერიის ხელშეწყობით.