ქუთაისის სახელმწიფო ისტორიული მუზეუმი ტრადიციულად უერთდება მუზეუმების საერთაშორისო დღეს და კვლავაც მრავალფეროვანი გამოფენებითა და მუსიკალური წარმოდგენებით უმასპინძლებს დამთვალიერებელს.
18 მაისს, დილის 10:00 საათიდან მუზეუმში დამთვალიერებელთათვის ცხადდება ღია კარის დღე!
18 მაისი, 15:00 სთ
გაიხსნება დროებითი გამოფენა ,,მონეტებში არეკლილი ისტორია’’.
ქუთაისის სახელმწიფო ისტორიული მუზეუმის ფონდებს შორის გამორჩეული ადგილი უჭირავს ნუმიზმატიკური კოლექციების ფონდს. აქ დაცული მასალები ნათლად მიგვანიშნებენ დასავლეთ საქართველოს, კერძოდ, ქუთაისის წამყვან როლზე საქართველოს პოლიტიკურ, ეკონომიკურ თუ კულტურულ ცხოვრებაში. ფონდში დაცული კოლხური, ქართული, ბიზანტიური, თურქული, სპარსული, არაბული და სხვა მონეტები ძირითადად აღნიშნულ რეგიონშია აღმოჩენილი, რაც იმაზე მეტყველებს, რომ ქუთაისს და მთლიანად იმერეთს გარკვეულ ეტაპზე სავაჭრო--ეკონომიკური და კულტურული ურთიერთობა ჰქონდა გარე სამყაროსთან. მუზეუმის არსებობის 110 წლის მანძილზე ეს იქნება პირველი შემთხვევა, როდესაც აქ დავანებული ქართული, აღმოსავლური თუ ევროპული მონეტების საუკეთესო ნიმუშები მთელი თავისი ბრწყინვალებით წარსდგება ფართო საზოგადოების წინაშე.
ქალაქ ქუთაისის მუნიციპალიტეტის მერია ქუთაისის მუზეუმების ღვაწლმოსილ და წარმატებულ თანამშრომელებს დაჯილდოვებს.
ქუთაისის სახელმწიფო ისტორიულ მუზეუმში დაგეგმილ ღონისძიებებს მუსიკალურად გააფორმებენ ქუთაისის აკ. წერეთლის სახელმწიფო უნივერსიტეტის ქართული ხალხური ცეკვის ანსამბლი „კოლხა’’ ედუარდ მურცხვალაძის ხელმძღვანელობით და ი.ოცხელის საჯარო სკოლის საეკლესიო საგალობლების და ხალხური სიმღერის გუნდი ,,პატარა ადილა’’, ხელმძღვანელი- ღირსების ორენის კავალერი, ლოტბარი მაიზერ გაზდელიანი.
20 მაისი, 17:00 სთ
მუზეუმების საერთაშორისო დღისადმი მიძღვნილი კვირეულის ფარგლებში გაიმართება პროფესიულ კოლეჯ "იბერია''-ს შემეცნებითი პერფორმანსი მუზეუმში დაცული ისტორიული ექსპონატების ილუსტრირებით- "იმერული ღვინის გზა".
პროფესიული კოლეჯი ,,იბერია’’ არის დასავლეთში ერთადერთი, რომელმაც 2022 წელს დაიწყო სერთიფიცირებული სახელმწიფო პროგრამა სპეციალობით "მეღვინე- დეგუსტატორი". ამ ინიციატივის მხარდამჭერი გახლავთ გაეროს ორგანიზაცია და საქართველოს განათლებისა და მეცნიერების სამინისტრო.
პროფესიული კოლეჯის ეს საგანმანათლებლო სიახლე ხელს უწყობს იმერული ღვინის განვითარებას და პოპულარიზაციას. მისი მიზანია თვითნასწავლი მეღვინეების გადამზადება.
16 მაისს , ქუთაისის ილია ჭავჭავაძის სახელობის საჯარო ბიბლიოთეკაში თბილისის არქიტექტურის, დიზაინისა და შემოქმედებითი ინდუსტრიების ცენტრმა, „Domus Georgia" და საქართველოში ისრაელის საელჩომ ერთობლივი პროექტი წარადგინა.
პრეზენტაციის თემა ,, ბაუჰაუზის მემკვიდრეობა და თელავივის თეთრი ქალაქი’’ იყო.
პროექტი საქართველოში ისრაელის საელჩოს მხარდაჭერით ხორციელდება და საქართველო-
ისრაელის დიპლომატიური ურთიერთობების 30-ე საიუბილეო წლისთავს ეძღვნება.
პროექტი აერთიანებს: თელავივის ბაუჰაუზის-‘თეთრი ქალაქის’ უნიკალური ურბანული მემკვიდრეობის მოძრავ გამოფენას,
ამერიკაში მოღვაწე ხელოვანის მარკ პოლიაკოვის ‘თეთრი ქალაქის’ ფოტო დღიურს.
სოფო ოდიკაძე
