დღეს,"ინდუსტრიული ქუთაისის" ბიბლიოგრაფიაზე მუშაობისას, ამ გაზეთის ლეგენდარულ ნომერს მივადექი.

ბედის უკუღმართობამ ისინი ქუთაისში გადმოისროლა. რას იფიქრებდნენ, რომ მზიანი აფხაზეთი სადღაც ოცნებებში ჩაიკარგებოდა და მხოლოდ სევდიანი მოგონებები აიკინძებოდა მეხსიერებაში. წლები მოანდომეს  ქუთაისში დაფუძნებას და მათ კარ-მიდამოში პატარა აფხაზეთის შექმნას. დევნილთა დასახლებაში, უზარაშვილების მყუდრო სახლში,  საოცარი სილამაზე, სითბო, ხელოვნების სიყვარული იკვეთება.  მიხვდებით, რომ ხელოვანთა სამყაროში მოხვდით.

ქეთევან და ჯიმი უზარაშვილებზე გიამბობთ.ვინც მათ იცნობს, ბედნიერია. საოცარი სტუმარ-მასპინძლობით გამორჩეულებს, განსაკუთრებული თავმდაბლობა სამკაულივით თან დაჰყვებათ. ცოლ-ქმარი უპრეტენზიოდ ცხოვრობს იმ სამყაროში, რომელიც დიდხანს აშენეს  და ყველასთვის სასურველი გახადეს.  აფხაზეთი კი ყოველთვის იყო და დარჩება მუდმივ ტკივილად, თუმცა იმედს მაინც არ კლავენ.

ჯიმშერ უზარაშვილისთვის  მოგონებები ცრემლიანია, რომელსაც თან სდევს მშობლების, ახლობლების გახსენება. მაინც არ ნებდება. უკვე გაშორეულებულ  და უზომოდ მონატრებულ აფხაზეთში დატოვებულ სულს ,   მაინც ათასნაირ სიცოცხზლეს შთაბერავს და მოდუნების საშუალებას არ აძლევს.თანამედროვე ოპიზარი მის ირგვლივ ფერად სამყაროს  დაუღალავად ქმნის. ჭედურობა, მხატვრობა,  ტყავსა და ხეზე მუშაობა, ყველაფერი ეხერხება, თანაც როგორ...ჩვენს ქვეყანაში რომ შინაურ მღვდელს შენდობა არასდროს აქვს, იმაზეა ეს ამბავი. ჯიმშერ უზარაშვილის მსგავს ხელოვანს ხელის გულზე უნდა  ატარებდნენ, ქუთაისი უნდა ამაყობდეს და თავს იწონებდეს იმით, რომ მის წიაღში დიდი ხელოვანი ბედის უკუღმართობით და სასწაულით მოხვდა, და რომ მისი შედევრები განუმეორებელა. ყველა სტუმართან თუ ტურისტთან შეხვედრა ,,უზარელს’’ ნამუშევრების წარმოჩენით უნდა იწყებოდეს...ჩვენში კი ,,ღელავს და ღელავს გულგრილობის ზღვა’’,  თანაც ქრონიკულად..ეს კიდევ ერთ ამბავს მაგონებს: ,,ძლიერს და ნიჭიერს უჭირს ამქვეყნად, მიტომაც მუდამ დაღვრენილნი დადიან ლომები, ვეფხვები და ავაზები, ხოლო თრითინები და ციყვები მუდამ მხიარულად დაცუნცულებენ.’’ /კონსტანინე გამსახურდია./

დიდოსტატი  ,,უზარელი’’ ჭედურობის ხელოვნების უდიდესი მესაიდუმლეა. ძალიან უნდა შთამომავლობას დაუტოვოს ცოდნა, გამოცდილება, ახალგაზრდებს შეასწავლოს ეს საოცარი საქმე, მაგრამ ვის რაში აინტერესებს...ნეტა როდის ისწავლიან ,,ზევით’’ ხელოვნების სიყვარულს და ხელოვანთა პატივისცემას?!..

ჯიმშერ უზარაშვილის გვერდით მუდამ არიან ძმა და რძალი, ისინიც მოკრძალებული ხელოვანები. ძმიშვილი დათო კი მართლაც თანამედროვე საგანძურია. ამაყად მიჰყვება ბიძის კვალს, გვერდიდან არ შორდება, სწავლობს, შრომობს, ქმნის...დათო უზარაშვილში უკვე ჩასახლდა ბიძის ნიჭიერება, საუკეთესო საქმეს გამგრძელებელი ჰყავს. ქუთაისის 30-ე საჯარო სკოლის მოსწავლე უკვე ცნობადი და გამორჩეულა ნიჭიერებით, პატარა ასაკშივე შექმნილი ნამუშევრებით

.ქუთაისს შეიძლება დაუგვიანდეს ჯიმი უზარაშვილის შემოქმედების დაფასება და მისთვის მადლობის გადახდა, თუმცა ვიტყვი, რომ ,,უზარელის’’ გვერდით დიდი სიყვარული და აღიარებაა. უბრალო ადამიანები ხედავენ, აფასებენ, უყვართ, მუდამ მის გვერდით არიან. იციან მისი შემოქმედების ფასი, ამაყობენ ...ქუთაისის სახელით მადლობასაც ეუბნებიან, თავსაც მდაბლად უკრავენ, რადგან იციან, რომ ,,უზარელი’ საქართველოა, მისი აწმყო და მომავალი....

,,უზარელის ‘’ ულამაზეს ოაზისში ყოფნის პატივი ყველას როდი აქვს... ვინც ეს დაიმსახურა, ბედნიერია, რადგან ამ ულმობელ სამყაროში დიდი სულიერების მიღება საოცარი მადლია...იქნებ თქვენც სცადოთ ეზიაროთ ამ პატივს, თქვენ, პატარა მეფეებო. და მიხვდებით, როგორ გაგითბებათ სული და როგორ თავისთავად მოვა თქვენში კეთილ საქმეთა კეთების სურვილი, რასაც ჯიმი უზარაშვილის შემოქმედების წარმოჩენა ჰქვია, და რომლის წაყრუება-მიჩქმალვა დანაშაულია!....

 ავტორი ნინო ძოწენიძე

ციფრულ სამყაროში ტრადიციული საგადახდო ინსტრუმენტები და მიდგომები უკანა პლანზე იწევს, პარალელურად კი დისტანციური საბანკო მომსახურებები ვითარდება, რაც მომხმარებლებს საშუალებას აძლევს საბანკო ოპერაციები სრულიად ელექტრონულად განახორციელონ.

საქართველოში საგადახდო ბარათების ბაზრის ჩამოყალიბების პირველი ნაბიჯები გასული საუკუნის 90-იანი წლების ბოლოდან გადაიდგა. პირველად კომერციულმა ბანკებმა დაიწყეს ლოკალური ბარათების გამოშვება, ხოლო 1998 წელს დღის შუქზე Visa-ს პირველი საერთაშორისო, ხოლო 1999 წელს - Mastercard-ის ბარათები გამოვიდა.

დღეისათვის საქართველოში მოქმედი შვიდი კომერციული ბანკი საერთაშორისო საგადახდო სისტემების ინტერნეტ-ექვაირინგის ლიცენზიას ფლობს და წარმატებით ემსახურება სავაჭრო და მომსახურების, მათ შორის სახელმწიფო, სფეროებს.

ეროვნული ბანკის მონაცემებით ამ ეტაპზე საქართველოში მიმოქცევაში 6,065,074 სადებეტო და 600,501 საკრედიტო ბარათია. ამ ბარათებით ყოველდღიურად მილიონზე მეტი ტრანზაქცია ხორციელდება, განხორციელებული ოპერაციების მოცულობა კი საშუალოდ 80 მილიონ ლარს აღემატება.

ეროვნული ბანკის ოფიციალური სტატისტიკის მიხედვით, 2020 წლის იანვრის მდგომარეობით, საქართველოში Mastercard/Maestro-ს სადებეტო ბარათების რაოდენობა 4,067,234-ს, Visa-ს ბარათები კი 1,668,009 შეადგენს. სხვა სისტემების სადებეტო ბარათების რაოდენობა კი 329,831-ია. სადებეტო ბარათების წილი გადახდის სისტემების მიხედვით, Mastercard/Maestro-ს ბაზრის 63% უკავია.

Mastercard-ის რეგიონული დირექტორი, იგორ სტეპანოვი აღნიშნავს, რომ მოხარულია უნაღდო ანგარიშსწორების რაოდენობის ზრდით საქართველოში. “ის, რომ დღეს საქართველო, ციფრულ გადახდებში, უკვე მესამე ადგილზეა ევროპის მასშტაბით, ძალიან მნიშვნელოვანი შედეგია. Mastercard მუდმივად ცდილობს შემოიტანოს ინოვაციური ციფრული პროდუქტები და მომხმარებლებისთვის უნაღდო ანგარიშსწორება მეტად კომფორტული და ხელმისაწვდომი გახადოს” - ამბობს სტეპანოვი.

რა არის მუნი,როგორ ამოვიცნოთ ეს დაავადება, რამდენად გადამდებია  და როგორ იკურნება-საინფორმაციო სააგენტო ,,აქტორი,, საზოგადოების დიდი ინტერესის დასაკმაყოფილებლად პედიატრს,ოჯახის ექიმს კესო გვარაკიძეს ესაუბრა.

- ექიმო,როგორ ,,ამოვიცნოთ,, მუნი?

- თუ ოჯახში ორს ან მეტს ექავება სხეული, დიდი ალბათობით მუნია. თუ გექავებათ მეტ წილად ღამით, ცხელი შხაპის მიღების დროს, საწოლში ჩაწოლის შემდეგ, მუნია. თავიდან როცა გექავება, არაფერი ჩანს, რამდენიმე დღეში ხაზოვნად განლაგებული გამონაყარი ან დაწყვილებული გამონაყარი გაჩნდება -ეგაა ტკიპას კანში შესასვლელი და გამოსასვლელი გზები.

- რამდენად ადვილად იკურნება,რა ზოგადი რეკომენდაცია შეგიძლიათ მისცეთ ჩვენს მკითხველს?

- თავიდან ვთქვათ, რომ მუნი, ბღერი და სკაბიესი ერთი და იგივეა. მუნი არ არის არც ბაქტერიული და არც ვირუსული, ის არის პარაზიტული დაავადება, რომელსაც იწვევს ტკიპა. ის ჩადის კანში, დებს კვერცხებს, მრავლდება და იკვებება კანის ეპიდერმისით. 

მკურნალობა ექიმის დანიშნულებით ხდება.ბენიზლ-ბენზოატის ემულსიას აქვს მალამოს ვერსიაც, გოგირდის მალამო, პერმეტრინი, ან სპრეგალი. აუცილებლად ექმის დანიშნულებით, თქვენი მდგომარეობიდან გამომდინარე. თუ ოჯახში ერთს აქვს მუნი, მკურნალობას იტარებას ყველა( მუნის მართვის პროტოკოლი). არ გეგონოთ მარტივი მოსაშორებელი ,საჭიროა ზეწრების გამოხარშვა ,დაუთოვება, რბილი ავეჯის დაუთოვება და განიავება, სველი წესით დალაგება, მოკლედ, დიდი სამუშაოებია ჩასატარებელი. რასაც ვერ გამოხარშავთ და დააუთოვებთ, გაყინეთ, ან ცელოფნებში ჩაალაგეთ და ერთი თვე დაივიწყეთ. საკმაოდ სიცოცხლისუნარიანია ეს ტკიპა და სერიოზულად მიუდექით ,არ გაირთულოთ ,თორე შეიძლება 1-2 წელიც კი დაგჭირდეთ მკურნალობა.

- მუნი-სიბინძურის დაავადება-ასეთი ინფორმაცია არის გავრცელებული ხალხში.თქვენ რას გვეტყვით?

-მ უ ნ ი არ ჩნდება სიბინძურით და დაუბანლობით. ეს გქონდეთ საზეპიროდ! მუნმა არ იცის არც სუფთა, არც ბინძური, არც ღარიბი, არც მდიდარი. ნებისმიერი სოციალური ფენის წარმომადგენელს შეიძლება გადაედოს, ნებისმერ დროს და ნებისმიერ ადგილას. თუ მუნი ძალიან აქვს მოდებული ადამიანს , შეიძლება ხელის ჩამორთმევით გადმოგდოთ.

მუნის პრევენციის საუკეთესო საშუალებას წარმოადგენს ჰიგიენური პირობების დაცვა და სხვა პიროვნების პირადი მოხმარების ნივთების გამოყენებისგან თავის შეკავება.

ინტერვიუს უძღვებოდა ჟურნალისტი ნანა რობაქიძე.