ქუთაისში, დამოუკიდებლობის დღესთან დაკავშირებით ადგილობრივი ხელისუფლების წარმომადგენლებმა საქართველოს ეროვნული გმირის მერაბ კოსტავას ძეგლი გვირგვინით შეამკეს და მისი სახელობის რეაბილიტირებული სკვერი გახსნეს.
,, გილოცავთ საქართველოს დამოუკიდებლობის დღეს, რომელიც უმნიშვნელოვანესია თითოეული ჩვენი მოქალაქისთვის. ჩვენს ქვეყანას არასდროს არ შეუწყვეტია დამოუკიდებლობისთვის ბრძოლა და შესაბამისად მივაღწიეთ მიზანს, რომელიც ასე მნიშვნელოვანია ჩვენნაირი პატარა, თავისუფლების მოყვარული ერისთვის. ამ პერიოდში რა თქმა უნდა ძალიან ბევრი ქართველი ადამიანი შეეწირა დამოუკიდებლობისთვის ბრძოლას. ჩვენთვის და მათი ხსოვნისათვის მნიშვნელოვანია, რომ შევინარჩუნოთ დამოუკიდებლობა და კიდევ უფრო გავამტკიცოთ“ - ზვიად შალამბერიძე.
„მინდა ეს დღე მივულოცო მთელს ქვეყანას. საქართველოს დამოუკიდებლობისათვის ბრძოლას სხვადასხვა დროს უამრავი ადამიანის სიცოცხლე შეეწირა. საქართველოს ნებისმიერი მოქალაქისთვის 26 მაისი განსაკუთრებული დღეა. მუდამ ძლიერი გვენახოს ჩვენი ქვეყანა!“-განაცხადა იოსებ ხახალეიშვილმა.
ეროვნული საბჭოს დადგენილებით, 1918 წლის 26 მაისს საქართველო დამოუკიდებელ რესპუბლიკად გამოცხადდა. რესპუბლიკის თავმჯდომარედ ნოე ჟორდანია აირჩიეს.
1918 წლის 26 მაისს მიიღეს „საქართველოს სახელმწიფოებრივი დამოუკიდებლობის აქტი“.
დაცული ტერიტორიების სააგენტოს ინფორმაციით, მარტვილის კანიონი, ოკაცეს კანიონი, ოკაცეს ჩანჩქერი(სოფ.კინჩხა), პრომეთეს მღვიმე და სათაფლია ვიზიტორებისთვის იხსნება. 26 მაისიდა, დილის 10 საათიდან 18:00 საათამდე ობიექტები რეგულაციების დაცვით იმუშავებს.
ტურისტული ატრაქციების გახსნას იმერეთში სახელმწიფო რწმუნებული ეხმიანება.
,,იმ ფონზე როდესაც ჩვენი ახალი აეროპორტის საშუალებით 5 ქვეყნის 9 ქალაქიდან ვიღებთ ტურისტებს, ძალიან მნიშვნელოვანია, რომ მათ შევთავაზოთ ის ატრაქციები, რომლებიც მუშაობდა პანდემიამდე. თავისთავად მათ შორის არის ის დაცული ტერიტორიები, რომლებიც საკმაოდ დიდი მონახულების სფერო იყო ჩვენი ტურისტებისთვის. განსაკუთრებით მინდა აღვნიშნო პრომეთე, რომელიც ყველაზე დიდ ინტერესს იწვევდა ჩვენს ტურისტებს შორის. ახლა უკვე ყველა მზად არის იმისთვის, რომ 26 მაისს გაიხსნას და მიიღოს ტურისტები და ჩვენი ქვეყნის მოქალაქეები“ - განაცხადა ზვიად შალამბერიძემ.
დაცული ტერიტორიების სააგენტოს მიერ გავრცელებული ინფორმაციით, აუცილებელია პირბადე და სოციალური დისტანციის დაცვა.ვიზიტორთა ცენტრში მხოლოდ 5 ვიზიტორის ყოფნაა დაშვებული და რეკომენდებულია თანხის გადახდა უკონტაქტო გზით ან ბილეთების დისტანციურად შეძენა.
