საზოგადოება

: საზოგადოება; 06 იანვარი 2021; გადასვლები: 989

ხონსა და წყალტუბოში ხანძარი ლოკალიზებულია

შინაგან საქმეთა სამინისტროს საგანგებო სიტუაცების მართვის სამსახურის ინფორმაციით, ქვეყნის მასშტაბით ხანძრების სალიკვიდაციო სამუშაოები გრძელდება

რამდენიმე კერაა იმერეთში- წყალტუბო, სოფელი ზარათი - იწვის ფოთლოვანი ტყის ქვედა საფარი, ამ დროისთვის ხანძარი ლოკალიზებულია. ხანძრის სიახლოვეს არ არის დასახლებული პუნქტი. მთელი ღამის განმავლობაში ადგილზე მობილიზებული იყო მეხანძრე- მაშველთა პირადი შემადგენლობა და 9 ერთეული სახანძრო-სამაშველო ტექნიკა. მიმდინარეობს სალიკვიდაციო სამუშაოები. სიტუაცია კონტროლს ექვემდებარება.

ხონი, სოფელი ძეძილეთი - იწვის ფოთლოვანი ტყის ქვედა საფარი და ბუჩქები. მოსახლეობას საფრთხე არ ემუქრება.

ხანძარი ლოკალიზებულია. სიტუაცია კონტროლს ექვემდებარება. მთელი ღამის განმავლობაში ადგილზე მობილიზებული იყო 5 ერთეული სახანძრო-სამაშველო ავტო ტექნიკა და მეხანძრე-მაშველითა პირადი შემადგენლობა.

: საზოგადოება; 06 იანვარი 2021; გადასვლები: 986

ე.წ.კომენდანტის საათი ერთი ღამით უქმდება

მართლმადიდებელი ეკლესია დღეს შობას აღნიშნავს, რის გამოც, ერთი ღამით მოიხსნება გადაადგილების შეზღუდვა.კერძოდ,დღეს,6 იანვრის 21 საათიდან მოქალაქეებს ღამით გადაადგილების საშუალება ექნებათ, ხოლო 7 იანვრის 21 საათიდან, შეზღუდვა ისევ ამოქმედდება.

ხელისუფლებამ ეს გადაწყვეტილება შობის დღესასწაულის გამო მიიღო.6 იანვარს ტაძრებში მსახურება ღამის თევით ეწყობა.

ქვეყანაში ე.წ.წერტილოვანი შეზღუდვები 28 ნოემბრიდან მოქმედებს. გადაადგილებაზე შეზღუდვა ხელისუფლებამ 31 დეკემბრის ღამეს,საახალწლოდ მოხსნა.

ქვეყანის მასშტაბით არ მოძრაობს საქალაქთაშორისო ტრანსპორტი.ქუთაისსა და კიდევ 7 დიდ ქალაქში გაჩერებულია საზოგადოებრივი ტრანსპორტიც.

გეგმის მიხედვით, ქვეყანაში შეზღუდვები 18 იანვრიდან უნდა შემსუბუქდეს.უნდა აღდგეს მუნიციპალური და საქალაქთაშორისო ტრანსპორტის მუშაობა, ასევე გაიხსნას სავაჭრო ობიექტები და ღია და დახურული ბაზრობები.გამონაკლისი იქნება შაბათ-კვირა.

: საზოგადოება; 05 იანვარი 2021; გადასვლები: 1104

ქუთაისში ავტოსაგზაო შემთხვევა მსხვერპლით დასრულდა

ქუთაისში ავტოსაგზაო შემთხვევას 30 წლამდე ქალის სიცოცხლე ემსხვერპლა.

როგორც შინაგან საქმეთა სამინისტროში განაცხადეს, ავარია ავტომშენებლის გამზირზე მოხდა.

ქალი, რომელიც მსუბუქ ავტომობილს მართავდა, ბენზინმზიდ სატვირთოს დაეჯახა და ადგილზე გარდაიცვალა.

გამოძიება სსსკ-ის 276-ე მუხლის მე-6 ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესი დარღვევას გულისხმობს, რამაც ადამიანის სიცოცხლის მოსპობა გამოიწვია.

: საზოგადოება; 05 იანვარი 2021; გადასვლები: 950

იმერეთში ხანძრის 4 კერა ისევ რჩება

იმერეთში ხანძრის 26 კერა დაფიქსირდა,მათგან 22 ლიკვიდირებულია,4 -ზე სამუშაოები ისევ მიმდინარეობს.

შინაგან საქმეთა სამინისტროს საგანგებო სიტუაციების მართვის სამსახურში 04.01.2021 09:00 საათის შემდეგ, ტყისა და მინდვრის ხანძრების შესახებ სულ 136 შეტყობინება შევიდა.მათგან 116 ლიკვიდირებულია, 3 ლოკალიზებული, 17-ზე მიმდინარეობს აქტიური სალოკალიზაციო სამუშაოები. ამ დროისთვის ცეცხლის კერებთან იმყოფება 700-ზე მეტი მეხანძრე-მაშველი და 70-ზე მეტი ერთეული სახანძრო-სამაშველო ტექნიკა.

იმერეთის გარდა,ხანძარის კერები სხვა რეგიონებშიც ფიქსირდება.

სამეგრელოში - დაფიქსირდა 96 კერა, მათგან 84 ლიკვიდირებულია, 3 ლოკალიზებული, 9 კერაზე კი გრძელდება სალოკალიზაციო სამუშაოები.

აჭარაში - დაფიქსირდა 4 კერა, მათგან 2 ლიკვიდირებულია, 2 კერაზე გრძელდება სალოკალიზაციო სამუშაოები.

რაჭა-ლეჩხუმი და ქვემო სვანეთში - დაფიქსირდა 3 კერა, მათგან ერთი ლიკვიდირებულია, 2 კერაზე გრძელდება სალოკალიზაციო სამუშაოები.

გურიაში - დაფიქსირდა 7 კერა, მათგან ყველა ლიკვიდირებულია.

ხანძრების შედეგად არავინ დაშავებულა. არც ერთ შემთხვევაში მოსახლეობას საფრთხე არ ემუქრება.

სამეგრელოში დაფიქსირდა შემთხვევა, სადაც ლიკვიდირებულ მინდორზე ხელახლა გაჩნდა ხანძარი.

შინაგან საქმეთა სამინისტროს საგანგებო სიტუაციების მართვის სამსახური მოუწოდებს მოსახლეობას თავი შეიკავონ სასოფლო სამეურნეო სავარგულების გადაწვისგან, ეს საფრთხეს უქმნის როგორც ტყის მასივებს, ასევე საცხოვრებელ სახლებს.

: საზოგადოება; 05 იანვარი 2021; გადასვლები: 1057

იმერეთში ხანძრის 18 კერაა ლიკვიდირებული

ბოლო 24 საათში მეხანძრე-მაშველებმა ტყეებსა და მინდვრებში ხანძრის 100 კერა ჩააქრეს.

საგანგებო სიტუაციების მართვის სამსახურის 500-ზე მეტი მეხანძრე-მაშველი 50-ზე მეტი ერთეული სახანძრო-სამაშველო ტექნიკით, მთელი ქვეყნის მასშტაბით, 24 საათიან რეჟიმში აქრობს ცეცხლს, რის შედეგადაც 105 აქტიური კერიდან, 100-ის სრული ლიკვიდაცია მოხერხდა, ხოლო ხუთ კერაზე აქტიურად მიმდინარეობს სალოკალიზაციო სამუშაოები.

ამ დროისთვის

სამეგრელოში - 77 კერიდან 74 ლიკვიდირებულია, სამზე მიმდინარეობს ქრობის სამუშაოები.

რაჭაში - ორი კერიდან ერთი ლიკვიდირებულია, ერთზე მიმდინარეობს სალოკალიზაციო სამუშაოები.

აჭარაში - ერთ კერაზე მიმდინარეობს სალოკალიზაციო სამუშაოები.

იმერეთში - 18 კერიდან ყველა ლიკვიდირებულია.

გურიაში - 7 კერიდან ყველა ლიკვიდირებულია.

კერების უმრავლესობაზე ცეცხლი ეკიდა ეკალ-ბარდს და მინდორს. ასევე, დაფიქსირდა ტყის ქვედა საფარის ხანძარიც. ამ დროისთვის, აღნიშნული ხანძრების შედეგად არავინ დაშავებულა. ძლიერი ქარის გამო, რამდენიმე ლოკაციაზე იყო საფრთხე მინდვრიდან ხანძარი საცხოვრებელ სახლს ან ტყის მასივს გადადებოდა, თუმცა მეხანძრე-მაშველებმა საფრთხის თავიდან არიდება შეძლეს.

შინაგან საქმეთა სამინისტროს საგანგებო სიტუაციების მართვის სამსახური მოსახლეობას მოუწოდებს - თავი შეიკავონ მინდვრებში და სახნავ მიწებზე ბალახის დაწვისგან. დასავლეთ საქართველოში ძლიერი ქარია და მშრალი ამინდი, რაც ხელს უშლის მეხანძრე-მაშველებს ხანძრების სალიკვიდაციო სამუშაოებში.

მინდორში და სახნავ მიწებზე ბალახის დაწვამ შეიძლება გამოიწვიოს ხანძრის გავრცელება როგორც საცხოვრებელ სახლებზე, ასევე ტყის მასივებზე.