საზოგადოება

: საზოგადოება; 27 ოქტომბერი 2023; გადასვლები: 679

იმერეთსა და კიდევ რამდენიმე რეგიონში ფსიქოტროპული მედიკამენტების უკანონოდ რეალიზაციის ფაქტები გამოვლინდა

საქართველოს ფინანსთა სამინისტროს საგამოძიებო სამსახურის თანამშრომლებმა

ქალაქ თბილისში, აჭარის, სამეგრელოს, იმერეთისა და კახეთის რეგიონებში კანონდარღვევით მოქმედი ათეულობით აფთიაქი გამოავლინეს,რომლებიც შესაბამისი ნებართვისა და სანებართვო პირობების დარღვევით, რეცეპტის გარეშე, ახდენდნენ სხვადასხვა დასახელების ფსიქოტროპული და სპეციალურ კონტროლს დაქვემდებარებული მედიკამენტების რეალიზაციას.

საგამოძიებო მოქმედებების შედეგად, ამოღებულია დიდი ოდენობით ფსიქოტროპული მედიკამენტი, მათი რეალიზაციიდან მიღებული თანხა, ინფორმაციის შემცველი კომპიუტერული ტექნიკა და დოკუმენტაცია.

უკანონო სამეწარმეო საქმიანობის ფაქტებზე ბრალდებულის სახით პასუხისგებაში მიეცნენ როგორც სააფთიაქო დაწესებულებების ხელმძღვანელები, ასევე იქ მომუშავე, დანაშაულებრივ ქმედებაში ჩართული პირებიც.

ჯამში, სისხლისსამართლებრივი დევნა განხორციელდა 58 ფიზიკური პირისა და 15 იურიდიული პირის მიმართ. სასამართლოს კანონიერ ძალაში შესული განაჩენებით, მათ ნაწილს გარკვეული პერიოდით აეკრძალათ ფარმაცევტული საქმიანობა.

აღნიშნული ქმედება გათვალისწინებულია საქართველოს სისხლის სამართლის კოდექსის 192-ე მუხლით და ისჯება თავისუფლების აღკვეთით 3-დან 5 წლამდე ვადით.

ტარდება შესაბამისი ღონისძიებები აღნიშნულ დანაშაულში შემჩნეული პირების დადგენა-მხილების მიზნით.

: საზოგადოება; 26 ოქტომბერი 2023; გადასვლები: 947

რაჭა-ლეჩხუმისა და ქვემო სვანეთის პოლიციის დეპარტამენტს ლევან დარახველიძე უხელმძღვანელებს

შინაგან საქმეთა სამინისტროს რაჭა-ლეჩხუმისა და ქვემო სვანეთის პოლიციის ახლადშექმნილი დეპარტამენტის დირექტორად პოლიციის პოლკოვნიკი ლევან დარახველიძე დაინიშნა. ამ დრომდე მას იმერეთის, რაჭა-ლეჩხუმისა და ქვემო სვანეთის პოლიციის დეპარტამენტის დირექტორის მოადგილის თანამდებობა ეკავა.

ლევან დარახველიძე შინაგან საქმეთა სამინისტროში 2005 წლიდან სხვადასხვა თანამდებობაზე მუშაობდა.

შეგახსენებთ, იმერეთის, რაჭა-ლეჩხუმის და ქვემო სვანეთის პოლიციის დეპარტამენტი რაჭა-ლეჩხუმისა და ქვემო სვანეთისა და იმერეთის დეპარტამენტებად გაიყო.

: საზოგადოება; 25 ოქტომბერი 2023; გადასვლები: 709

აირჩიე პროფესია სკოლაში-რას გულისხმობს პროექტი?

ქუთაისის ადგილობრივი თვითმმართველობის ინიციატივით, განათლების ღონისძიებების პროგრამის ფარგლებში, მიმდინარე წელს კიდევ ერთი ახალი პროექტი დაიწყება.

პროექტი „ აირჩიე პროფესია სკოლაში“ მიზნად ისახავს ქუთაისის საჯარო სკოლებში VIII, IX და X კლასელი მოსწავლეებისთვის დასაქმების კომპეტენციების გაძლიერებას, არაფორმალურ საგანმანათლებლო პროცესებში ჩართვის გზით.

აღნიშნული პროექტი ეტაპობრივად მოიცავს ქუთაისის ყველა საჯარო სკოლას. წელს პროექტში ჩაერთვება 6 მაღალკონტინგენტიანი სკოლა : 1-ლი, მე-2, მე-3, მე-17, 30-ე და 41-ე საჯარო სკოლები.

თითოეულ სკოლაში ჩამოყალიბდება მინიმუმ 30 მოსწავლისგან შემდგარი ჯგუფი, რომლებსაც, კვირაში ერთხელ, საგაკვეთილო პროცესის დასრულების შემდეგ, ჩაუტარდებათ შეხვედრები განსაზღვრულ თემებზე: საკუთარი თავის შეცნობა, რბილი უნარების გაძლიერება, ფინანსური წიგნიერება, ზრდაზე ორიენტირებული აზროვნება, პროფესიული ურთიერთობების დამყარება, შრომის ბაზარზე არსებული მდგომარეობა, მოთხოვნადი პროფესიები, სამუშაოს ძიების უნარები, სამუშაო ეთიკა და ქცევა, სამეწარმეო უნარები.

შეხვედრებს გამოცდილი ახალგაზრდული მუშაკები და ტრენერები გაუძღვება. პროექტის განხორციელებას ა(ა)იპ „ახალგაზრდული ჰორიზონტი“ უზრუნველყოფს.

: საზოგადოება; 25 ოქტომბერი 2023; გადასვლები: 886

ბაღდათის მუნიციპალიტეტის მერმა მოსახლეობასთან საანგარიშო შეხვედრა გამართა

ბაღდათის მუნიციპალიტეტის მერმა კახა ენუქიძემ, მოსწავლე ახალგაზრდობის სახლში, მოსახლეობასთან საანგარიშგებო შეხვედრა გამართა.

received 973922890365863

ბაღდათის მუნიციპალიტეტის მერმა ადგილობრივ მოსახლეობას 2024 წლის ბიუჯეტის პროექტი და პრიორიტეტები გააცნო, რომლის შემუშავებასაც წინ უძღვოდა მოსახლეობის ფორუმის (დასახლების საერთო კრების ინოვაციური მოდელი) მოწყობა, მუნიციპალიტეტის 130 მცხოვრების მონაწილეობით.

ფორუმზე მოსახლეობამ შეაფასა მიმდინარე წლის ბიუჯეტი, მოეწყო მსჯელობა მუნიციპალიტეტში არსებულ პრობლემებზე, მოამზადა იდეეები და წარადგინა რეკომენდაციები მომავალი წლის ბიუჯეტისთვის. საერთო ჯამში 50 იდეა იქნა რეკომენდაციის სახით შეთავაზებული ადგილობრივი თვითმმართველობისთვის. იდეები ეხებოდა ინფრასტრუქტურის, კულტურისა და ხელოვნების, განათლების, სოფლის მეურნეობის , ტურიზმის განვითარებისა და მეწარმეობის, გარემოს დაცვის, თავდაცვის, სოციალური საკითხების, სპორტის, ახალგაზრდობის სფეროების განვითარებას. მოსახლეობის მიერ წარდგენილი 50 იდეიდან 15 გათვალისწინებული იქნა 2024 წლის ბიუჯეტში.

საანგარიშგებო შეხვედრაზე მოწვეული იყო ყველა ის პირი, ვინც მოსახლეობის ფორუმში მონაწილეობა მიიღო. ღონისძიების შესახებ ინფორმაცია ასევე მიეწოდათ მუნიციპალიტეტის სხვა მაცხოვრებლებს, რომლებიც არ ესწრებოდნენ ფორუმს, მაგრამ დაინტერესებულნი არიან მომავალი წლის ბიუჯეტის გაცნობით. შეხვედრა პრეზენტაციის და შემგომში დისკუსიის ფორმატში გაიმართა. ღონისძიების ორგანიზებაში ბაღდათის მუნიციპალიტეტის მერიას მხარდაჭერა განათლების განვითარების და დასაქმების ცენტრმა გაუწია პროექტის: „მოქალაქეთა გაძლიერება ადგილობრივ მმართველობაში მდგრადი განვითარების მიზნით“ ფარგლებში. პროექტი განათლების განვითარების და დასაქმების ცენტრის (EDEC) მიერ გაეროს განვითარების პროგრამის (UNDP), დანიის საგარეო საქმეთა სამინისტროსა და საქართველოს მთავრობის მხარდაჭერით ხორციელდება.

: საზოგადოება; 25 ოქტომბერი 2023; გადასვლები: 828

ვანში თევზის ელექტროშოკური მოწყობილობით დაჭერის ფაქტი გამოავლინდა

ელექტროშოკური მოწყობილობით უკანონო თევზჭერის 5 ფაქტი გამოვლინდა. ინფორმაციას გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტი ავრცელებს.

სამართალდარღვევები გამოვლენილია ქვემო ქართლში, სამცხე-ჯავახეთში, იმერეთსა და შიდა ქართლში.

მარნეულის მუნიციპალიტეტის სოფელ თეკალის მიმდებარედ, მდინარე დებედას კალაპოტში, მოქალაქეები ელექტროშოკური მოწყობილობისა და მოსასმელი ბადის გამოყენებით ახდენდნენ უკანონო თევზჭერას. სამართალდამრღვევებს მოპოვებული ჰქონდათ 1 კგ-მდე სხვადასხვა სახეობის თევზი.

ახალციხის მუნიციპალიტეტის სოფელ აწყურის მიმდებარედ, მდინარე მტკვარზე, მოქალაქეს, თევზჭერის აკრძალული საშუალების - ელექტროშოკური მოწყობილობის გამოყენებით, უკანონოდ ჰქონდა მოპოვებული 7,280 კგ სხვადასხვა სახეობის თევზი.

ვანის მუნიციპალიტეტის სოფელ ამაღლებაში, მოქალაქე, მდინარე რიონზე ახდენდა თევზჭერას ელექტროშოკური მოწყობილობის გამოყენებით.

ქარელის მუნიციპალიტეტის სოფელ ახალსოფლის, ასევე ხაშურის მუნიციპალიტეტის სოფელ გომის მიმდებარედ, მდინარე მტკვრის კალაპოტში, მოქალაქეები, გასაბერი ნავებიდან თევზჭერისას, ასევე იყენებდნენ ელექტროშოკურ მოწყობილობებს.

უკანონოდ მოპოვებული თევზი, ასევე ნავები და თევზჭერის აკრძალული საშუალებები დაილუქა. სამართალდამრღვევების მიმართ შედგა შესაბამისი დოკუმენტაცია.

: საზოგადოება; 25 ოქტომბერი 2023; გადასვლები: 947

საჩხერე-ჭიათურა-ზესტაფონის გზის რეაბილიტაცია სრულდება

შიდასახელმწიფოებრივი მნიშვნელობის გომი-საჩხერე-ჭიათურა-ზესტაფონის საავტომობილო გზის 21.7 კმ-იანი მონაკვეთის (კმ84-კმ107) სარეაბილიტაციო სამუშაოები დასრულების ეტაპზეა. ამასთან, გრძელდება 16 სხვადასხვა მონაკვეთზე დამეწყრილი უბნების სარეაბილიტაციო სამუშაოები.

რეაბილიტირებული მონაკვეთი ჭიათურის მუნიციპალიტეტში იწყება და ზესტაფონის მუნიციპალიტეტში სრულდება. გარდა იმისა, რომ განახლებული გზა ერთმანეთთან აკავშირებს ჭიათურასა და ზესტაფონს, ეს გზა არის 3 მუნიციპალიტეტისა და გზის მიმდებარე სოფლების რეგიონულ ცენტრთან დამაკავშირებელი მიმართულებაც.

ჭიათურა-ზესტაფონის მონაკვეთზე გზის საფარი მნიშვნელოვნად იყო დაზიანებული. მრავლად იყო მეწყრული ადგილები, რაც ართულებდა ავტოტრანსპორტის გადაადგილებას.

პროექტის ფარგლებში, სრულად განახლდა გზის სავალი ნაწილი, მოეწყო ახალი წყალარინების სისტემა, გზის საყრდენი კედლები, ადგილობრივ გზებთან მიერთებები და მოსახლეობის ეზოებში შესასვლელები. საგზაო მოძრაობის უსაფრთხოების გაუმჯობესების მიზნით, მოეწყო ახალი საგზაო ნიშნები, თვალამრიდები და დასრულდა გზის სავალი ნაწილის ჰორიზონტალური მონიშვნა.

პროექტები სახელმწიფო ბიუჯეტიდან დაფინანსდა. სარეაბილიტაციო სამუშაოების ღირებულებამ 19,7 მილიონი ლარი შეადგინა. დამეწყრილი უბნების სარეაბილიტაციო სამუშაოების ღირებულება 30.3 მილიონი ლარია.

დღის სიახლეები

საზოგადოება

Search