ძირითადი მიმართულება არის საგზაო ინფრასტრუქტურა, საბავშვო ბაღების მშენებლობა, სასმელი წყლის სისტემების რეაბილიტაცია და სკვერების მოწყობა/რეაბილიტაცია.

 

საქართველოს პრემიერ-მინისტრის მიერ ინიცირებული პროგრამის ,,განახლებული რეგიონები“ ფარგლებში, ქალაქ თერჯოლის ცენტრალური უბნის (რუსთაველის ქუჩა) ურბანული განახლება მიმდინარეობს. 

 

პროექტი მოიცავს 5 შენობისა და 2 პარკის რეაბილიტაციას. ცენტრალური უბნის, კერძოდ კი, რუსთაველის ქუჩაზე მდებარე შენობების განახლებას. პროექტის ფარგლებში, შენობების კარ-ფანჯარა იცვლება ახალი იზოპროფილის ვიტრაჟებით, ფასადებზე თბოსაიზოლაციის გამოყენებით, ძლიერდება მათი ენერგოეფექტურობა, წესრიგდება საფეხმავლო ზოლი და  ეწყობა მიმდებარე სკვერები და პარკები, სადაც განახლდება ბავშვთა გასართობი სივრცეები. 

 

ასევე, საპილოტე რეგიონების ინტეგრირებული განვითარების პროგრამის ფარგლებში თერჯოლის მუნიციპალიტეტში მიმდინარეობს N3 საბავშვო ბაღის სამშენებლო სამუშაოები, რომელიც დასრულდება 2022 წლის დეკემბერში. პროექტის ღირებულებაა 2 243 845 ლარი.

 

თერჯოლის მუნიციპალიტეტში სოფელ რუფოთსა და ქვედა სიმონეთში დასრულდა  საჯარო სკოლების და  შენობების სრული რეაბილიტაცია, წყალ-კანალიზაციის და სახანძრო სისტემის აღდგენა-განახლება, არსებული ფართების გადაგეგმარება შესაბამისი სტანდარტებისა და რეგულაციების მიხედვით. სკოლების რეაბილიტაციის შედეგად შესაძლებელი იქნება სოფელ რუფოთის საჯარო სკოლაში მინიმუმ 200  მოსწავლის,  ხოლო ქვედა სიმონეთის საჯარო სკოლაში - 250 მოსწავლის მიღება.