ანტიკორუფციული მოძრაობა წყალტუბოს მუნიციპალიტეტში შეუსრულებელ პროექტებზე საუბრობს.მოძრაობის იმერეთის ორგანიზაციის თავმჯდომარის, თემური ცამციშვილის ინფორმაციით, წყალტუბოში, 9 აპრილის ქუჩაზე მდებარე მე-15 ბაღი, რომელიც გერმანიის განვითარების ბანკის ფინანსური მხარდაჭერით აშენდა და 227 000 ევრო დაჯდა, ჯერ კიდევ არ ფუნქციონირებს.სამუშაოები 2020 წლის ივლისში დაიწყო და 2021 წლის 31 აპრილს დასრულებული უნდა ყოფილიყო.
საბავშვო ბაღი დევნილთა დასახლებაში მდებარეობს. სამუშაოების დაწყებას წყალტუბოს მაშინდელი მერი, გრიგოლ იოსელიანი ესწრებოდა.დაწესებულება 75 ბავშვზეა გათვლილი.
ანტიკორუფციულ მოძრაობაში ინტერესდებიან, რატომ არ ფუნქციონირებს საბავშვო ბაღი, რომელიც მერიას ჩაბარებული აქვს, როგორც დასრულებული პროექტი.
წყალტუბოს მუნიციპალიტეტის პრესსამსახურიდან მოწოდებული ინფორმაციით,აღნიშნულ ბაღს არ აქვს კანალიზაცია,შესაბამისად დაწესებულება აღსაზრდელებს ვერ იღებს.
წყალტუბოს მერიამ აღნიშნული ხარვეზის გამო ვერ გახსნა ბაღი,რომლის დამკვეთიც თავად არ ყოფილა. როგორც პრესსამსახურში გვითხრეს,მერიას შენობა არ ჩაუბარებია. ბაღის შენობა მუნიციპალურ საკუთრებაში ოფიციალური დოკუმენტით,2021 წლის აგვისტოში არის გადაცემული.
აღსანიშნავია,რომ 2021 წლის ანგარიშში,მუნიციპალიტეტს ბაღის შესახებ ინფორმაცია,როგორც დასრულებული დაწესებულების ისე აქვს შეტანილი.
