ბაღდათის მუნიციპალიტეტში ბაღდათი-საირმის მიმართულებით გაწმენდითი სამუშაოები მეორე დღეა ინტენსიურად მიმდინარეობს. მოსული უხვი ნალექის შედეგად გადაადგილება ამ დრომდე შეფერხებული იყო.
გაწმენდითი სამუშაოების პროცესს იმერეთში სახელმწიფო რწმუნებული ზვიად შალამბერიძე, ბაღდათის მუნიციპალიტეტის მერთან კახა ენუქიძესთან ერთად ადგილზე გაეცნო.
,,უხვმა თოვლმა იმერეთის რამდენიმე სოფელში ავტომობილების გადაადგილების პრობლემა შეუქმნა, მათ შორის საირმის მიმართულებითაც. ფაქტიურად მთელი ღამის და დღის განმავლობაში მიმდინარეობდა სპეციალური ტექნიკით გაწმენდითი სამუშაოები. ამ ეტაპზე გზა გაიხსნა და აღნიშნულ მონაკვეთზე გადაადგილება შესაძლებელია, როგორც მსუბუქი, ასევე მაღალი გამავლობის ავტომობილებისთვის. დამსვენებლებს, რომლებიც არიან საირმეში უკვე შეუძლიათ დაბრუნება სახლებში“ - ზვიად შალამბერიძე.
ადგილზე მთელი ღამის მანძილზე მობილიზებული იყო სპეციალური ტექნიკა, რათა მოძრაობა უმოკლეს ვადებში განახლებულიყო.
