ქუთაისის საერთაშორისო აეროპორტში ფრენები განახლდა, ასაფრენ-დასაფრენი ზოლის რეაბილიტაცია დასრულებულია.
პირველი რეისი გვიან ღამით მინსკიდან შესრულდა, რომელსაც 80 მგზავრი ჩამოჰყვა, ქუთაისიდან კი 92 - გაფრინდა.
ქუთაისის საერთაშორისო აეროპორტის ასაფრენ-დასაფრენი ზოლის რეაბილიტაცია გუშინ დასრულდა. გუშინვე დასრულდა ასაფრენ-დასაფრენი ზოლის მარკირება, რის შემდეგაც ფრენების მიღება შესაძლებელი გახდა.
ქუთაისის აეროპორტის ასაფრენ-დასაფრენი ზოლის გეგმური რეაბილიტაცია 10 ოქტომბერს დაიწყო. სამუშაოები 24 ოქტომბერს უნდა დასრულებულიყო, თუმცა უამინდობის გამო 30 ოქტომბრამდე გაგრძელდა.
რეაბილიტაციის პერიოდში, ფრენები თბილისის აეროპორტიდან სრულდებოდა.
რეაბილიტაციის პროექტის ბიუჯეტი 8 მლნ ლარი იყო, რომელიც ქუთაისის აეროპორტის ოპერატორი კომპანია - საქართველოს აეროპორტების გაერთიანებამ საკუთარი შემოსავლებიდან დაფარა. სარეაბილიტაციო სამუშაოებს სამშენებლო კომპანია Black Sea Group ახორციელებს.
